بڵووزەێ ئاگر دار وەن

Category: شيعر

Date: 2018-07-10T17:55:00+0000
بڵووزەێ ئاگر دار وەن

کزە جارێ ئەگەر بەێتێ خوەنیمن

تیەڵە سازێ ئەگەر جارێ ژەنیمن

دڵ داخینمان ئاخینە وەختێ

دە بەزمێ چۊ گوڵ لاڵە خەنیمن

بووِ شەو گرتگە ڕووژەیل ئیمە

سەفا نەیریمن ئاو شەومەنیمن

هە چۊ ئاسارە گیروودەێ تڵسم

شەوِ بێ دەروەچِ ئەهریمەنیمن

شەماڵەێ واێ ئەجەڵ ها دە جمشت و

کولێ تەرتِ دەمِ پەنجەێ شەنیمن

منیمە تاشەوان، دەێ ڕۊ مەغارە

کولێ پەێوەس وە یەێ تاڵ بەنیمن

خوەشە سزیانمان ڕا شەونشینەیل

بڵووزەێ ئاگر دارِ وەنیمن

هە جوور خانەقین دەو دەیشتِ داخە

هەڵاکِ هۊنگاوِ ئەڵوەنیمن

نە کەڵ ماگە دە کەڵوەز جوور جاران

نە دی ئیمەیشە واشەێ دەروەنيمن

 دە شوونِ ماڵ و مەڵوەن بۊمنە گوم

خوەمان مزنەم هە ماڵ و مەڵوەنیمن

شرین، نام ترِ فەرهادمانە

وە ول وەیلانِ شار ئەرمەنیمن

گەنم داگە وە باێ خەرمان ئیمە

ونە کەێ ئێقرە ئیمە گەنیمن!

دە دۊرەو ئاسووِ ڕووژێ دیارە

وەرەو ئەو ئاسووە پاڕوو ژەنيمن

زاهر سارايي

related