شیعریگ ئەرا هیچ

Category: شيعر

Date: 2020-07-07T22:27:35+0000

جاروبار قسەگان لە پەنجەرەگەو کەفن
یا لە ناو کتاوەیل بوونە واران
ئیجا تا روژەیل دریژیگ هیچ نیەوود
هەمیشە لە مەوقەی بیداری ئی پرسیارە:
خەفتن بون چە دیرێد؟
*
ئەو رووژە ک لەهویرما چگ بامە خەوەر
گەردیمە ناو جادەیل بی ناویگ
سڵاو کردمە بیگانەیل
تەنیا تا بنووڕمە مناڵەگان
وەختا چەوهەشارەکی کەن
ک خاوەن ناویگن
داڵگەیل لە خانەیەگەو خەنە خوارەو
تەقەلا دام بیلم پاسەوانەیل بخەنن
ئیوارە هەژمار جیماگەیل مووگان کردم
لەبان زەوی سەرتاشخانەگە.
*
ئایا وەڕاسی توێەنستن یەکەو بگرن؟
ئەو دووانە کە لە وەخت زوویگ مردنە؟
لە کارت بویچگیگ
ئەرا سیمای سروشتییگ
پەیمان نهێنییان خوەنم.
*
لە لەش
کەمیگ مینێد
لە چەو
سوقانە چەمیایەگەی
لە ئەو قەتارە ک رەدمان کرد
هەواگەی
*
چەن رووژیگ خوازیم لەی سویکە خڕبخوەم
تەنیا تا وەناکاوەو بوینمەد
ئیجا دووارە گوما باێد.
*
ئامادە نیمن
هەر جوور گشت جاریگ
لەنوای دوکانەگە لە پاریس وسیەیمن
خودا هافیزی هەرگیز تەواو نیەوود
کارمەنەیل لە شانمانەو رەد بوون
فچنن، تەنیا خوەیان زانن
دویەکە ئەرا ئمڕوو
چ رووژیگ بوی
*
شیعریگ ئەرا هیچ
لە قسەیل گومابوی دروس کریاگە
لە رییگ بەسیاگ وپڕ لە گوڵ.
*
دانیشتیمنەسە ناو زاراوەگان
واز لە یەک نووڕستن نیەتێەریمن
هیچ نیەوودە تووشمان
گشت چشتیگ شایەت تووشمان باێد
لە ناو هەواگە گیرهات
دەسە راسەگەی پیانۆ ژەنەگە.
زابینا نائیف / سویسرا