فریشتەی پاپەتی

Category: شيعر

Date: 2020-06-14T17:19:40+0000

فریشتەی پاپەتی
خەوەر لەخانەقینەوا
یەک دەس مناڵی دینەوا
بریقە دەی لە چەرمگی
لە ژیر زوخاڵ تەقینەوا
سفت پەنجەی باوگی گردیە
بچیمنەوا
بچیمنەوا
دەسوینەکگانم بگرە دەس
وەدەنگ هاوار من بڕەس
بووڵەو خوتەی دڵم فرەس
دی دیرە باوە وەی شەوە
بچیمنەوا
ئەرا پڕ دەورم دویکەڵە
هاکوو دڵم؟
ئەرا چە سینەم پویچەڵە
دی خوەش نیە ئی مەتەڵە
دەرم بکە لەی گیچەڵە
مەتەڵى تر دی بویشەوا
بچیمنەوا
لەماڵ هی یارو بویش ئەرام
یارو مناڵ جوانیگە
لەناو یەک باخچەی نیشتیە
ئەیلای گوڵە
ئەولای گوڵە
پڕ سایکیەو دارو چڵە
وەهەرکو روی کەی میوەیە
یا نقوڵە
یەک هەمکە وەیلکان هادەسی
خوەشی وە ئەندازەی دڵە
وەهارەگەی فرە خوەشە
نە وەک وەهارم بی لەشە
تاقەی گوڵم لە ژینەوا
هەڵی کەنین لەڕیشەوا
بچیمنەوا
دوژمن وەکوت وەکوت پڕی
کراسە جوانەگەم دڕی
چەس دی من کوردی ها وەرم
بریق باقەو گڕگڕی
ملوانک جوانی ها ملم
ئەویش بڕی
گەردن ملوانک هەڵگری
دی چوی سەرم باوە بنەی وەسینەوا؟
بچیمنەوا
چوی میرگەگانم هەڵچنم
نمنم کراسم
گوڵوەنم
تو گیان کەڵاتو ئەڵوەنم
بیلا بچیم دی دڵ تەنگم
روشنایی نیەونم وی چەوە
بچیمنەوا
ئەی باوە من دڵم تەنگە
خەنینەگانم بی دەنگە
ئەو دوژمنە
ئەو ناشرینەو پر ژەنگە
چەو دا لە گیسو دەمچەوم
لەی کەلپەلەی ڕەنگاوڕەنگە
خودا خو من مناڵیگم
وەبی گوناهم لە جەنگە
چوی کوشتنەم وەی دینەوا
بچیمنەوا
وەت نا نازارەگەی دڵم نیچیمنەوا
چیمنە بەهەیشت
گشت کارەگان ئەڕا خودا ئویشیمنەوا
ئەی باوە چوی بجمە بەهەیشت
کەوشەیلم هانە خوینەوا؟.
• كه‌نعان حاته‌م