له‌ به‌غدا، ماچ ٨ كه‌س تویش کۆڕۆنا كرد

Category: هــــه‌واڵ جیــهانى

Date: 2020-05-13T00:26:53+0000

 

شەفەق نیوز/ جاسب حجامی وەڕیەوبەر تەندروسی کەرخ، سێشەممە، باس لە بڕیگ لە هاوڵاتیەیل کەرد ک رێەوشوێن سەلامەتی تەندروسی ئەرا نواگردن لە بڵاوبوین ڤاێڕۆس کۆڕۆنا وەئاسان دانانە، وئاماژە کرد لە تویشهاتن هەیشت کەس وە ڤاێڕۆس کۆڕۆنا، وه‌خاتر ژیرپانان قیەغەو رێنماییەگان.

 حجامی هەمیش وت؛ ئی نامە رەسیە پیم لە وەڕیەوبەر کەرت گەشەپێدان چەودێری تەندروسی سەرەتایی، بیماریگ ک دویای توێیشهاتنی وە ڤاێڕۆس کۆڕۆنا لە شار حوریە، دوتیگ ناوی (ح..) وخەسورەیلی سەردان ( ع... ) کردنە وخوەی بیمارە، برای بیمارەگە هوشداری داسه‌ پییان لە ئەگەر تویشهاتنی وە کۆڕۆنا، وت؛ خوازین قاومان بوینین؟.

وتیش؛ خوەیو تاتگی هاتن وگشتیان دەس کردنە ماچکردن وباسکردن ونیشتن وەل بیمارەگە، ئیسە ٨ کەس بایەسە بچنە کەرەنتینە.

حجامی دووپاتە کرد ک ئەو هەیشت کەسە، وەرجە کەمیگ تویشهاتنیان مسۆگەر بوی، و سێ مناڵ هاناویان، وتیش؛ لەشەوەکی تا شەو هەر هوشداری ده‌یمن وکەس گووش نیەگرێد.

لە لاینیگ تر فەرمانگەی تەندوسی کەربەلا، روژ سێشەممە، باس خاسەوبوین ٥ حڵەت لە ڤاێڕۆس کۆڕۆنا لە پاریزگاگە کرد، و دیاری کرد ک چوار لە خاسەوبویەل مناڵن.

سەلیم کازم وەڕیەوبەر راگەیانن فەرمانگەگە، لە بەیاننامەیگ رۆژنامەوەانی ك رەسیە شەفەق نیوز وت؛ ئمڕوو، ٥ تویشهاتگ کۆڕۆنا خاسەوبوین، چوار لەلیان تەمەنیان ناوبەین ٣-٩ ساڵە. دوانیان بران، وتیش ک خاسەوبویە پەنجمینەگە کەسیگە خەڵک قەزای حسێنیەیە ك تەمەنی ٦٣ ساڵە. گشت خاسەوبویەیل پارێزگاگە رەسینە وه‌ ٩٠ کەس، وئەو ١٣ حاڵەتەگە هانە ژیر چارەسەری چەودێری تەندروسی خەسیگ. 

جی باسە ک رێژەی گشتی تویشهاتگەیل پارێزگاگە رەسیە ١١٠ کەس ك تا ئیسە 7 كه‌س لەلیان مردگە.

لە میسان، فەرمانگەی تەندروسی پارێزگاگە ٩ خاسەوبوی نوو لە تویشهاتگەیل ڤاێڕۆس کۆڕۆنا تۆماركردگه‌ . عەبدلحسێن جابری وەڕیەوبەر گشتی فەرمانگەگە لە بەیاننامەیگ وت؛ ئەنجام تاقیكاریه‌یل لە تاقێگەی تەندروسی گشتی لە بەغداد ئەرا دوویم جار لە شوین یەک، سەڵامەتی ٤ حاڵەت نوو چەسپان، ک وەرجەیە تویش ڤاێڕۆس کۆڕۆنا بوین، وتیش؛ دویای خاسەوبوین ئی حاڵەتەیلە رێژەی تویشهاتگەیل ک یەکجاری خاسەوبوین لە سەرتای قەیران کۆڕۆنا تا ئمڕو رەسیە ٦٢ کەس لەناو ٧٢ تویشهاتگ ک پارێزگاگە تۆماری کردوید