ئەرا دویەم جار حکومەت عراق باڵوێز تورکیا چڕی

Category: هــــه‌واڵ عــیراق

Date: 2020-06-18T15:39:02+0000
ئەرا دویەم جار حکومەت عراق باڵوێز تورکیا  چڕی

شەفەق نیوز/ وەزارەت دەرەوە لە بەغداد، ئمڕوو پەنچشەممە، دووارە داوای هاتن باڵوێزە تورکیە کرد، و یادداشت تونیگ داگە دەسیەو، لەوەر وەردوامی په‌لامار هێزەیل توركیه‌ ئه‌را بان ناوچەیل سنوری لە هەرێم کوردستان.
وەزارەتەگە لە بەیاننامەیگ ك رەسیە ئاژانس شەفەق نیوز وت؛ عراق وە تونترین وشەیل رەتکاری و ناڕەزایی دووارەکردن په‌لاماره‌یل هێزەیل تورکی ره‌د کەێد ك روژ ١٧ حوزەیران پێشیل حورمەت وسەروەری وڵاتەگە كردگه‌ وه‌ گورز ئاسمانی و پەلامار ناوچه‌یل سنور ناودەوڵەتیمان.
وەزارەتەگە هەمیش وت؛ دووپات رەتکردن یەکجاریمان کەیمن لەی پێشیلکردنەیلە ک پەیمان و یاساگان ناودەوڵەتی پێشیل کەێد، وجەخت کەیمن لەبان گرنگی پابەندبوین لایەنە تورکیەگە، وەوسانن پەلامارەگە، وکیشانەوەی هێزە پالامارده‌ره‌گە لە ناو خاك عراق ک دویەکە دزەکردنە ناوی، ولەشوونەیلیان و لە کامپ سەربازی بەعشیقە و ئەو شوونەگان تر.
بەیاننامەگە ئاماژەدا ک تورکیا خوەی هووکار زیایبوین شیواشیو ئەمنی بویه‌ لەناوچە سنوریە هاوبەشەگە لەناوبەینمان، ک ( بانگەواز ئاشتی) تورکی وەل پارتی کرێکاران کوردستان ساڵ ٢٠١٣ بویە هووکار جیگر کردن فرەی لە ئی حزب تورکیە لەناو خاك عراق، وەبی رەزامەنی یا راوێژکاری عراق، ک لە وەخت خوەی هێشت لەلای ئەنجومەن ئاسایش نارەزایی بیەیمن.
وەزارەت دەرەو وتیش؛ دووارە داوای هاتن باڵوێزە تورکیە کرد، ویادداشت ناڕەزایەتی تون زاراوەیگ داگە دەسیەو، وداوی وازهاوردن لەلی کرد لە ئیجوور کارەیل چزدارە، وپێشیلکارەیل رەتکریاگە. وداوا لە حکومەت تورکی کرد تا دەنگ دانایی بژنەفێد، وسنوریگ ئەرا ئی پەلامارەیلە بنەێد، وهەمیش عراق ماف شەرعی خوەی هەڵگرێد لە گشت رێکارەیلیگ ک بوودە مقەیەتی سەروەری وسەڵامەتی گەلەگەی، لەناویان داواکاری لە ئەنجومەن ئاسایش و رێکخراوە هەرێمی وناودەوڵەتیەگان ئەرا هەڵسانن وە وەرپرسایەتی خوەیان. وەزارەتەگە وەرجە دوو رووژ داوای هاتن باڵوێزە تورکیە کرد، ویادداشت ناڕەزایی داگە دەسیەو لەبان پێشیل کردنەیل وەرین لەلایەن فڕۆکەوانی تورکی.
سەرچەوەیگ خۆجێی وەرپسیگ لەوەختیگ وەرین ئمڕو خەوەردا لە کوشیان یەک مەدەنی لە پەلامار ئاسمانی فڕۆکەیل تورکی،ک ناحیەی سیدەکان لە پارێزگای هەولێر پایتەخت هەرێم کوردستان کردنە ئامانج.
سەرچەوەگە ئەرا ئاژانس شەفەق نیوز وت: فڕۆکەیل جەنگی تورکی دویەشەو لە دیروەخت ، پەلامار لەوەڕگایەیل سروشتی دان لە پردەسبان و کیلە شین و کانی خۆمار لە ناحیەی سیدەکان ک شوانەیل لە وەرز تاوسان رینه‌یان ئه‌را لەوەڕ به‌نه‌ ئه‌و شووینه‌یله‌ . سەچەوەگە هەمیش وت؛ گورزە ئاسمانیەگە شوانیگ کوشت.

related