2019-09-28 19:19:53

شه‌فه‌ق نيوز/ بڕياره‌ له‌ ماوه‌ى رووژه‌يل ئاينده‌ سێ شاند له‌ به‌غداوه‌ سه‌ردان هه‌رێم كوردستان بكه‌ن و فراكسيۆن پارت ديموكرات كوردستانيش جه‌خت له‌بان خواست ره‌سين هه‌ردوگ حكومه‌ت هه‌ولێر و به‌غدا كرد ئه‌را ريككه‌فتن وه‌رجه‌ ره‌سين پرووژه‌ى بودجه‌ى گشتى ئه‌را ئه‌نجومه‌ن نوێنه‌ره‌يل.

 

له‌و باوه‌ته‌و، ڤيان سه‌برى سه‌رۆك فراكسيۆن پارت ديموكرات كوردستان له‌ ئه‌نجومه‌ن نوێنه‌ره‌يل، له‌ لێدوانيگ رووژنامه‌گه‌رێ وت: بڕياره‌ سێ شاند له‌ به‌غداوه‌ له‌ماوه‌ى رووژه‌يل ئاينده‌ سه‌ردان هه‌رێم كوردستان بكه‌ن و يه‌يش ده‌رخست ئه‌و شانده‌يله‌ پيكهاتنه‌ له‌ شانده‌يل ليژنه‌ى دارايى و ئابوورى و ليژنه‌ى ياسايى و ليژنه‌ى نه‌فت و غاز.

 

سه‌برى له‌باره‌ى ئامانج سه‌ردانه‌گه‌يش وت: ئه‌و شانده‌يله‌ له‌و سه‌ردانه‌ ئامانجيان ئه‌وه‌سه‌ نزيكه‌وبوين ناونى هه‌ردوگلا زياتره‌و بكه‌ن و ئه‌و ليژنه‌يليشه‌ هه‌ر يه‌ك له‌ليان وه‌گووره‌ى تايبه‌تمه‌ندى خوه‌يان نوڕنه‌ بارودوخ كوردستان.

}