هەولێر کەرەنتین تەندروسی لەبان قەزایگ چەسپنێد

Category: هــــه‌واڵ كــوردى

Date: 2020-06-09T12:34:38+0000

شەفەق نیوز/ فرسەت سوفی پارێزگار هەولێر، ئمڕوو سێشەممە، راگەیان ك کەرەنتین تەندروسی لەبان قەزای چۆمان چەسپانن ، دویای تۆمارکردن تویشهاتنەیل وە ڤایڕۆس کۆڕۆنا.
سوفی لە کۆنگرەی رۆژنامەوانییگ ئمڕوو ک پەیامنێر ئاژانس شەفەق نیوز لەناوی بوی وت: ئەگەر وەزویی رێکارەیلیگ زوینە وپەلە وەجی ناریمن، ئەوەسا چیمنە ناو قۆناغ مەترسیدار ودەسپاچەکەر، وتیش؛ ئمڕوو کەرنتین تەندروسی لەبان قەزای چۆمان چەسپانیمن دویای دەرکەفتن ٢٠ تویشهاتن لەناوی وە کۆڕۆنا. وهەمیش وت؛ بڕیگ وتییاد ک ئی قەیەغە لەپێناو خواستەیل سیاسی یا ئەرا نواگردن خۆپیشاندان وەکارهاوریاگە، وتیش؛ لە ئەنجام نا پرسیارەتی چەن کەسو لایەنیگ رەسیمنە ئی رەوش ئیسە.
سوفی ئاماژەدا ک ئیسە تەقەڵا دەیمن تا یەکجاتر کۆنتڕۆڵ رەوشەگە بکەیمن، بەڵکم وەگورەی رێکارەیل نوو، ومقەیەتی هاووڵاتیەیل وروژانەکارەیل کەیمن.
پارێزگارەگە هەمیش دیاری کرد ک دەور ٧٠٠ دوکان لەوەر ناپابەندبوین وە رێوشوێنە مقەیەتیەگان بەسیا . جەختیش کرد ک هەر شوینیگ پابەندی وە رێوشوێنە مقەیەتیەگان نەکەێد ئەوەسا رێکارەیل یاسایی وەلیەو وەکارتیەێریمن.
سوفی لەباوەت بڕیگ ئامار تایبەت وەکۆڕۆنا، وت؛ زیاتر لە ٤٣ هەزار تاقیكاری لە هەولێر ئەنجام دریاگە، ١٣ هەزار لەلی لە خاڵەیل وەشکنین بویە.
هەمیش وت؛ ٢٧ هوتێل وشوقەی هوتێلی ئەرا کەرەنتین تەندروسی تەرخان کردیمن، و لە ماوەیل وەرین کەرەنتین زیاتر لە ٥ هەزار کەس لە هەولێر کردیمن، و رەوشەگە هیمان هادەس خوەمان، وتوێەنیمن کۆنتڕۆڵی بکەیمن، وەلی بایەسە پابەند بویمن وە رێکارە مقەیەتیەگان، یا ئەوسا کارەگان لە ژیر کۆنتڕۆڵ دەرچن.