2018-12-19 19:11:00

شه‌فه‌ق نيوز/ له‌ عراق ئه‌وه‌ زانريا ك هه‌وڵ بيه‌ێد وه‌ وه‌رده‌وام ئه‌را ئاڵشتكردن ئه‌وه‌گ وه‌پى ئويشريه‌ێد وه‌رپرس گه‌ناته‌كار، وه‌لێ هه‌ميشه‌ ده‌رئه‌نجامه‌يل له‌ ئه‌وسا خراوتر بوون، يه‌يش ماناى ئه‌وه‌سه‌ هه‌وڵ ئاڵشتكردن وه‌رپرس له‌ى وڵاته‌ چ وه‌ڕيه‌يل ياسايى يا ناياسايى روێ وه‌ره‌و خاستر ناگرنه‌ وه‌ر، ئه‌را نموونه‌: دوسيه‌ێ فه‌يليه‌يل و هاوشيوه‌يليان له‌لاى وه‌رپرسه‌يل دويه‌كه‌و ئمڕوو ته‌نيا جوور ئه‌و نويسرياێ گه‌ورا بوێ ك هه‌مان نويساننه‌يليگ ئه‌گرێده‌ خوه‌ى له‌ شيوه‌و روخسار.

 

باس له‌وه‌ ئه‌كه‌ن مه‌ردمانيگ خاوه‌ن چاره‌نويس هاوبه‌ش ك له‌وه‌خت خوه‌ى جه‌وه‌ڵ نشين بوينه‌، له‌ناونى ماوه‌يگ وماوه‌يگ تر ده‌نگ ئه‌ڵلاجه‌وى و فريه‌ گه‌ورا كوچگيگ ده‌رچياد و مه‌ردم ژنه‌فتيانه‌ێ جوور ئه‌وه‌گ بانگه‌واز كردياد ئه‌را ده‌رخستن چشتيگ نهێنى، دوياخر مه‌ردمه‌گه‌ گرده‌و بوينه‌و هاوكارى كردن ئه‌را ئه‌وه‌گ يه‌كيگ له‌ليان بچێده‌ بان ئه‌و كوچگه‌، ئمجا هه‌ناى ك كه‌سه‌گه‌ ك تواسياد ئه‌و شوونه‌يليه‌ پاكه‌و بكا ك خوه‌ڵ و خه‌ڕگ گردوێده‌ى و دوياى به‌حسكردن و له‌يه‌كه‌وداين چه‌وێ كه‌فته‌ بان رسته‌يگ هه‌ڵكه‌نرياێ له‌تى ك نويسرياوێد: ئه‌وه‌گ ئه‌خوازێد نهێنى من بزانێد بايه‌سه‌ وه‌سه‌ره‌و دامبنه‌ێد.

 

مه‌ردميش دوياى هه‌وڵ و ته‌قڵاو شه‌كه‌تى فريه‌يگ و خوه‌شاڵى فريه‌يگ وه‌ قه‌ڵبه‌وكردن ئه‌و كوچگه‌ هه‌ناى ك ئه‌و رووييگه‌ێ خوه‌نينه‌و موفاجه‌يگ ئه‌رايان بوێ ك نهێنيه‌گه‌ له‌و ديم كوچكه‌گه‌ دينه‌و ك جياواز نه‌وێ وه‌ل نويسرياێ ئه‌و رووييه‌گه‌ى تر ك نويسياوێد: ئه‌وه‌گ ئه‌خوازێد نهێنى من بزانێد بايه‌سه‌ وه‌سه‌ره‌و دامبنه‌ێد!

 

ئه‌يه‌ وه‌ته‌مامى جوور بارودوخ فه‌يليه‌يله‌ له‌ گشتلايگه‌و وه‌ل كاروبار ئيسه‌ى ژيانيان له‌ى وڵاته‌ ك هه‌رچه‌نى دوسيه‌يليان قه‌ڵبه‌و بكريه‌ێد هه‌ر جوور خوه‌ێ دويننه‌ێ، وه‌تايبه‌ت له‌ ئداره‌ى مه‌سه‌له‌يل زه‌فتكردن مافه‌يل و سياسه‌ت ئاڵشتكردن يه‌كتريمان و ئه‌را ماوه‌ى ساڵه‌يل فريه‌يگ دويره‌و كه‌فتيمنه‌ له‌ گامه‌يل و كاره‌يل بويرانه‌و گونجياێ ك خزمه‌ت وه‌ى پيكهاته‌و تاكه‌يلێ ئه‌كا، وه‌لێ ئه‌راچه‌؟!

 

ئه‌وه‌گ حاشا هه‌ڵنگره‌ ئمڕوو ئه‌وه‌سه‌ ك رۆڵ و روخسارمان له‌ خه‌ريته‌ بويه‌سه‌ كه‌متر و بويچگتر له‌ئه‌وساو ئه‌و كه‌سه‌يليشه‌ ك بوينه‌سه‌ وه‌رپرس يا پۆسته‌يليگ گرتنه‌ ده‌س چ له‌ڕێ توناو هه‌وڵ خوه‌ێ يا له‌ڕێ ته‌زكيه‌ت و رينماييكردن ئه‌زانێد كيشه‌گه‌ چه‌س، وه‌لێ نه‌وين پشتگيرى و ترس له‌ كوده‌تاى ئالشتكارى رێ وه‌پى نادريه‌ێد زرنگى خوه‌ێ ده‌ربخه‌ێد له‌ وه‌رگرتن هه‌ڵويست و بڕيار وه‌رانوه‌ر دريغى حكومه‌ت و بيده‌نگێ لايه‌نه‌يل له‌باره‌ێ بڕياره‌يل خراو و دژ وه‌ مافه‌يلمان.

 

ئمجا رژيم فيدراڵى عراقى ك رێ وه‌هه‌ركه‌سيگ ئه‌ياد بدێده‌ وه‌رپرس وه‌و مه‌رجه‌گ هه‌مان كارو كرده‌وه‌ دوباره‌وه‌ بكا ك زه‌ره‌د ئيمه‌ى فه‌يليه‌يل هاله‌تى. وه‌ل ئه‌وه‌يشا پيكهاته‌گه‌ زوورم هه‌وڵه‌يليان له‌ى ساڵه‌يل وشك دوياخره‌ له‌ نه‌وين وه‌رپرسه‌يل له‌ رووڵه‌يل پيكهاته‌گه‌يان ئه‌وه‌ بوێ روخسار ئه‌و كه‌سايه‌تيه‌يله‌ وه‌ كه‌سه‌يل تر ئاڵشت بكه‌ن.

 

گشت ده‌سه‌و گرووپه‌يليش هاوبه‌شن له‌ى پرووژه‌و له‌ ره‌فتارێ و له‌به‌رهه‌م شيه‌وكردن هه‌ردوگ رووييه‌گه‌ى ئه‌و نويسريايه‌ له‌قه‌ى كوچگه‌گه‌. ئاساييشه‌ نه‌وه‌يل ئاينده‌مان له‌بان ئه‌و كوچگ گه‌ورا بوسيه‌ن و قه‌ڵبيه‌و بكه‌ن و ئه‌و ته‌نيا نويسريايه‌ بخوه‌ننه‌و ك ده‌قه‌گه‌ێ له‌باره‌ى خه‌ريككردنه‌ ئه‌را قه‌ڵبه‌وكردن ئه‌و روخساره‌يله‌ ك ئى دوسيه‌يليانه‌ وه‌ڕێه‌و ئه‌وه‌ێد. ئمجا له‌وه‌ر خاتر وه‌ده‌سهاوردن پۆسته‌يل و رازيكردن ئه‌ى وئه‌و ده‌س ئه‌كه‌نه‌ ته‌نانه‌ت وه‌ ده‌رفنكردن دوسيه‌ێ له‌ناوبردن وه‌جه‌م(جينۆسايد)وه‌ زينگى له‌ بياوان سياسه‌ت.

سوندس ميرزا

 

YesIraq