2020-02-08 20:35:59

عه‌بدوڵڵا جه‌عفه‌ر كوفلى/ په‌يامه‌يليگ فريه‌يگ ئاراسته‌ى حكومه‌ت هه‌رێم كوردستان كريا وه‌ سه‌رۆك و وه‌زيره‌يلى و ده‌زگايه‌يلى له‌بان ئاست جه‌هان له‌ كه‌سايه‌تى و لايه‌نه‌يل جياجيايگ وه‌ رينمايى و ئامانجه‌يل جياجيايگ و گشتيانيش ئامانجيان حكومه‌تيگ بته‌و بوێ وه‌ كاره‌يل و خزمه‌تگوزاريه‌يلى و بتويه‌نێد بنيات پيه‌ڵه‌يليگ له‌ متمانه‌ بنه‌ێد وه‌ل رووڵه‌يل ملله‌ت و له‌ئاست وه‌رپرسيارێتى بدێ، هه‌ر په‌ياميگيش رووشنايى خستياده‌ بان لايه‌نيگ له‌وه‌ر ئه‌وه‌گ له‌ ديد نويسه‌ره‌گه‌ى وه‌ ئه‌وه‌گ ئه‌ولا تره‌ وه‌ گرنگى له‌گشت لايه‌نيگه‌و، له‌ى خاڵيشه‌ هه‌ر حكومه‌تيگ له‌ حكومه‌ت گزه‌يشت و حكومه‌ت دوياى خوه‌ى جياوازه‌. ئاڵشتكارى له‌ روخساره‌يل له‌ڕوێ پۆسته‌يله‌و له‌ حكومه‌ت وه‌رين يه‌كيگ له‌ هووكاره‌يل يا وه‌سيله‌يل كاروه‌پيكرياێ بوێ ئه‌را تامداين حكومه‌ت وه‌ خوين تازه‌يگ ك فكره‌ى تازه‌و رووحيگ به‌رز مه‌عنه‌وێ هه‌ڵگرتگه‌.

 

ئمڕوو جه‌هان پڕه‌ له‌ روێداگ و گورجيه‌گه‌يشى له‌ خه‌ياڵ نيه‌و له‌چوارچيوه‌ى شيه‌وكردن و گه‌ردين له‌شوون هووكاره‌يلى ده‌رچى له‌ساى پيشكه‌فتن ته‌كنۆلۆجى و زانستى ك ئى جه‌هانه‌ كرده‌سه‌ ئاوايى بويچگيگ، ك شايه‌ت بڕيگى وه‌ختى و موفاجئه‌ بدێ و بڕيگيشى ريشگدار بدێ له‌ قويلايى و بكه‌فێده‌ بان له‌ناونى ماوه‌يگ و ماوه‌يگ تر، ك يه‌يش له‌يوا كرد گشت ملله‌ته‌يل كاريگه‌ر بوون وه‌پى و له‌ليانيش هه‌ن كاريگرى ديرن له‌بان به‌رنامه‌و سياسه‌ته‌يل ناوده‌وڵه‌تى و ته‌كلايه‌نى و له‌ليانيش هه‌ن گوزه‌ركه‌ر.

 

تێبينى له‌ڕێ چه‌وديريكردن ئه‌وه‌سه‌ ك رويداگه‌يل جه‌هانى و عراقى و وه‌هه‌ر شيوه‌يگ كاريگه‌رى ديرن له‌بان به‌رنامه‌يل حكومى له‌ هه‌رێم و فريه‌جاريش بويه‌سه‌ هووكار وسانن وه‌شيوه‌يگ يه‌كجارى  يا ئفليجى و دوياخستن وه‌تايبه‌ت له‌ مه‌سه‌له‌ى بودجه‌ى ساڵانه‌و به‌سانن مه‌رزه‌يل له‌وه‌ر هووكاره‌يليگ ته‌ندروستى يا ئه‌منى يا سياسى، ك يه‌يش كاريگه‌رى خراو ئه‌كاده‌ بان كاره‌يل رووژانه‌و ساڵانه‌ى حكومه‌ت و فريه‌جاريش ئه‌خاده‌ى وه‌ر ره‌خنه‌.

 

وه‌لێ ئه‌وه‌گ جى سرنجه‌، ئه‌وه‌سه‌ ك حكومه‌ت هه‌رێم له‌ جيوه‌جيكردن به‌رنامه‌يلى ك په‌يوه‌سه‌ وه‌ روخساره‌يل وه‌رين په‌يوه‌س ئه‌كا وه‌ جيوه‌جيكردن ئى به‌شه‌ وه‌ رويداگه‌يل جه‌هانى يا هه‌رێمى يا عراقى و باوه‌ڕمان ئه‌وه‌سه‌ راسى نيه‌ له‌ى سپارده‌، چوينكه‌ ئاڵشتكردن كه‌سيگ وه‌ كه‌سيگ تر ك هه‌رچه‌نى پله‌و پايه‌و شاره‌زايى داشتوود وه‌ كاروباريگ ناوخوه‌يى دانريه‌ێد و چشت تازه‌ له‌ ئاساره‌يگ تره‌و نايه‌ێد، به‌ڵكوو له‌ ڕووڵه‌يل ملله‌ت كوردستانه‌و شايه‌ت زياتر له‌ قۆناغ تازه‌يش بڕه‌سێده‌و. ئمجا بيگومان دوياخستن ئى گامه‌ وه‌رده‌وامى ئه‌ياده‌ ريڕه‌و وه‌رين و ئاره‌زووه‌يل ويران ئه‌كا له‌لاى ملله‌ت و جموجويل په‌ك ئه‌خا، چوينكه‌ ئه‌وه‌گ مه‌ندگه‌ له‌بان ئوميد و ئاره‌زوو ئاڵشتكارى مه‌شق سياسه‌ت رازيكردن ئه‌كا يا وه‌حوكم پۆسته‌گه‌ى و په‌يوه‌نديه‌يلى هه‌وڵ ئه‌ياد بمينێد ك ئوميد له‌ وه‌رگرتن پۆست هه‌ڵگرتگه‌و ئوميد و ده‌رفه‌تيش له‌ده‌س ئه‌ياد.

 

ئمجا په‌يوه‌سكردن روێداگه‌يل وه‌ل يه‌كترى ئامانجى خاس ئه‌دێ له‌ مه‌سه‌له‌يليگ و خراويش ئه‌دێ له‌ بڕيگ مه‌سه‌له‌ى تر، هه‌ر وه‌و خاتريشه‌ بايه‌سه‌ له‌بان حكومه‌ت جيايى له‌ناونيان بكاو رێ راس و دروسيگ بگرێده‌ وه‌ر له‌وه‌ر خاتر ئه‌نجامداين ئه‌ركه‌يليگ خاستر ، ك ئى په‌يوه‌سكردنيشه‌ له‌ هه‌رێم وه‌ ناساق دوينيم و ئوميده‌واريم ده‌سوه‌پيكردنى دوير بدێ له‌ په‌يوه‌سكردنى وه‌ل رويداگه‌يل ناوخوه‌يى يا ده‌ره‌كى، چوينكه‌ ژيان وه‌رده‌وامه‌و هه‌ر وه‌رده‌وامه‌.

}