2020-02-15 18:44:40

هادى جله‌و مه‌رعى/ خوه‌شه‌ويسى ئحساسيگ نيه‌ ته‌نيا وه‌رانوه‌ر كه‌سه‌يل تر, به‌ڵكوو مه‌شقيگيشه‌، ئمجا قه‌شه‌ ڤالنتاين له‌سێداره‌ دريا نه‌ك له‌وه‌ر ئه‌وه‌گ وه‌رگرى له‌ خوه‌شه‌ويسى كرد جوور ئحساسيگن به‌ڵكوو له‌وه‌ر ئه‌وه‌گ ئاينپه‌روه‌ر بوێ و كاره‌يل ماره‌برين ئه‌نجام دياد و كار له‌ مامڵه‌ى هاوسه‌رگيرى كردياد وه‌ چه‌واشه‌ى فه‌رمانه‌يل حاكم سته‌مكار.

 

خوه‌شه‌ويسى له‌ هه‌مان وه‌خت مه‌شقيگه‌، هه‌ر وه‌و خاتريشه‌ مه‌شق جنسى وه‌(مه‌شق خوه‌شه‌ويستى)تاريف ئه‌كه‌ن، ئمجا گابريل گاريسا ماركيز كۆڵۆمبى له‌ روايه‌ته‌گه‌ێ(خوه‌شه‌ويسى له‌ سه‌رده‌م كۆلێرا)داهێنان كرد و شايه‌ت جه‌هان هه‌وه‌جه‌ وه‌ ئه‌وه‌ كرديان كتاوه‌يليگ ئه‌و روايه‌تكاره‌ بخوه‌نن ناونيشانه‌يلى نه‌خوه‌شيه‌يل بدێ، جوور (تاونه‌)گه‌ى كامۆ، يا نه‌خوه‌شى محوه‌ر روايه‌ته‌گه‌ بدێ، جوور ئه‌وه‌گ (سائيرون وه‌ته‌نيا هانه‌ ژيان) و پاڵه‌وانه‌گه‌ى تويش نه‌خوه‌شى هاتگه‌.

 

ئمڕوو جه‌هان له‌بان كه‌فتنه‌وه‌ى كاره‌سات ژيه‌ێد، ڤايرۆس كۆرۆنا له‌ سه‌ره‌تاى 2020 روێ له‌ لاشه‌ى چينيه‌يل كرد و هه‌زاران كه‌س تويشهاتن و سه‌دان كه‌س كوشتگه‌و دى نازانيم تا كوورا ره‌سنيده‌مان و شماره‌ى ئه‌و كه‌سه‌يله‌ ك تويشى ئه‌يه‌ن چه‌نيگ ئه‌دێ و قوربانيه‌يلى چه‌نيگه‌ و كه‌ى وسيه‌ێده‌و؟ وه‌لێ ناتويه‌نيم خوه‌مان بيه‌يمنه‌ ده‌سه‌و، به‌ڵكوو بايه‌سه‌ زياتر دگان وه‌خوه‌مان بگريم و داهێنان بكه‌يم و قوربانى بيه‌يم و هاوكارى ئه‌را روێ وه‌ڕوێ بوينه‌وه‌ى ئافات و نه‌خوه‌شى و كاره‌ساته‌يل بكه‌يم. چوينكه‌ زه‌وى جوور گه‌ڕه‌كيگ نيشته‌جێ بويچگ وه‌پى هاتگه‌و مه‌ردمه‌گه‌ى يه‌كترى ئه‌ناسن وه‌ ناو و هزر و نيازه‌يليانه‌و، ئمجا هه‌ر بايه‌سه‌ روێ وه‌ڕوێ ترس وه‌ خوه‌شه‌ويسى بويمنه‌و ك رێيگه‌ ئه‌را سه‌ركه‌فتن له‌بان سه‌ختيه‌يل ژيان.

 

له‌ى باوه‌ته‌و, بى بى سى، هه‌واڵيگ گرنگ له‌ شوونيگ له‌ نزيك چين بڵاو كرد، ك هه‌زاران كه‌س له‌ ئاهه‌نگيگ وه‌جه‌م هاوسه‌رگيرى به‌شدارى كردنه‌ ك له‌لايه‌ن يه‌كێتى خيزان له‌وه‌ر ئاشتى و يه‌كخستن جه‌هانييه‌و ساز كريا, ك ناسرياگيشه‌ وه‌ناو كه‌نيسه‌ى ته‌وحيد له‌ كۆرياى باشوور، ك له‌ناوه‌ند تشونغشيم ئه‌را ئاشتى جه‌هانى له‌ غابيونغ له‌ نزيك سۆل پايته‌خت ئه‌نجام دريا سه‌ربار وجوود مه‌ترسى بڵاوبوينه‌وه‌ى ڤايرۆس كۆرۆنا وه‌بوونه‌ى گرده‌وبوين جه‌ماوه‌رى فريه‌يگ.

 

شايه‌ت شۆكيگ بدێ ئه‌را جه‌هان له‌ روێ وه‌ڕوێ بوينه‌وه‌، وه‌لێ هه‌ر زوى مه‌ترسيه‌يلى له‌ناو بريه‌ێد و ده‌س ئه‌كريه‌ێده‌ پيچانن زه‌خمه‌يل و كاركردن له‌بان دروسكردن ژيان و ئاراسته‌كردن مانايه‌يه‌يل جوانى له‌تى، نه‌ك جوور خوه‌شه‌ويسى دروسكه‌ر ژيان.

}