راويژكردن وه‌ دانا خواسته‌

Category: وتـار

Date: 2020-04-06T20:27:08+0000

سه‌ڵاح مه‌نده‌لاوى/ جارجاريگ گه‌رديمنه‌ شوون ناونيشانيگ و وه‌پى ناره‌سيمن، هه‌ناى ك پرسيد له‌كه‌سيگ هه‌ر بايه‌سه‌ مه‌رامد بڕه‌سێد و يا هه‌ڵه‌په‌ڵه‌ بكريه‌يد له‌ ره‌ساننى يا وه‌هه‌ر شيوه‌يگ تر جوور تاوداين پۆست 4 وه‌ 4، ئمجا له‌وه‌خت ته‌واوبوين گشت قۆناغيگ كه‌سانيگ هه‌ن وه‌رده‌وامى ئه‌يه‌نه‌ ريڕه‌وه‌گه‌ وه‌ ئه‌وه‌گ ركابه‌ريه‌گه‌ وه‌ سه‌ركه‌فتيگ گورج و خاستر ته‌واو بدێ، ك يه‌يش له‌يواسه‌ له‌ جموجويل حزبى له‌ سياسه‌ت و هه‌ر ئه‌وه‌يش هووكاره‌ له‌ وه‌رده‌وامى ژيان حزبى، وه‌نا مه‌رجه‌يل نموونه‌يى و ئه‌كاديميانه‌ وجوود نه‌يرێد له‌ى باوه‌ته‌و.

 

شايه‌ت ئيمه‌ گله‌و بخوه‌يم ئه‌را سه‌ره‌تا، وه‌لێ نه‌ك جوور ئه‌وه‌گ مه‌سيره‌گه‌ ته‌واو كرديم، ئمجا كه‌س حزبى بايه‌سه‌ وه‌خته‌يلى دابه‌ش بكا له‌ناونى ئه‌ركه‌يلى و خوه‌ى رووشنهويركردن و ئسراحه‌ت لاشه‌يى، ئمڕوو وه‌خت دابه‌ش كرياگه‌ له‌بان 8 سه‌عات كار و 8 سه‌عات خه‌فتن و 8 سه‌عاتيش وه‌ل خيزان و وه‌رپرسيارێتى وه‌ وجوود ئمتيازات و باس له‌ داهات ئاينده‌ ك يه‌يش جياوازى ديريم له‌بانى، له‌ سه‌رده‌مه‌لييگ مه‌ردمانيگ مناى ئه‌وه‌يان كرديان جموجويل فريه‌ كردياد له‌بان كورسى جموجويلكه‌ر و يه‌يش تازه‌و بوێ له‌ وه‌كارهاوردنى له‌ حزبايه‌تى و جى ره‌خنه‌گرتن بوى و ره‌خنه‌گريش له‌ دانيشتن بوێ و ته‌ماشاى وێنه‌يل ئاوڕويبه‌ر كردياد يا كه‌وشه‌گه‌ى هه‌ناردياد ئه‌را سبووغكردن وه‌ل كاركه‌ريگ له‌ ليست حزبيه‌يل، ئمڕوويش له‌يوا وه‌پى هاتگه‌ كه‌سه‌يليگ سه‌دان هه‌زار بيه‌ێد له‌وه‌ر جموجويليگ خوه‌شگوزه‌رى، وه‌لێ موڵكيه‌ت گرانى وه‌خويه‌و ديه‌ ته‌نانه‌ت له‌لاى چه‌پڕه‌وه‌يليش.

 

ئمجا هه‌ر له‌وه‌خت سه‌رهه‌ڵداين ديانه‌ت ئسلامييه‌و نه‌ك حزبى، فكره‌ى چه‌پڕه‌وى ده‌ركه‌ف، ك يه‌يش جه‌خت له‌وه‌ ئه‌كا ئه‌قڵ ئنسانى يه‌كيگه‌ له‌وه‌ختيگه‌و كۆمه‌ڵگايه‌يل ئنسانى دامه‌زرياگه‌.

 

ده‌ركه‌فتن چه‌پڕه‌وه‌يل له‌ ئابوورى باوه‌ڕيان ئه‌وه‌ بوى ك ئه‌وانه‌ يه‌كه‌مين كه‌سيگ بوينه‌ ماده‌ وه‌رجه‌ ئاده‌ميزاد دانانه‌، يه‌يش له‌وه‌ختيگ فكر ئايينى مه‌رج دانا ئه‌را كه‌هه‌نه‌يل ك بايه‌سه‌ زاهديگ ساده‌ و خوه‌شه‌ويس بدێ له‌لاى گشت و تون بوون له‌بان كافره‌يل و له‌ناونى خوه‌يان ره‌حمدار بوون و وه‌بوونه‌ى ره‌فتار هه‌ڵوژاردن كه‌سه‌يليگ هاوردن خوه‌يان له‌بان جه‌هان ده‌ره‌كى خاستر زانستن له‌ سه‌ده‌ى 19 و كه‌سه‌يل تر له‌بان مه‌ردمانيگ وه‌ناو ماسوشستى وه‌بى ئه‌وه‌گ بزانن كى له‌وه‌رجه‌ خوه‌يان بويه‌ و هه‌ميشه‌ باس چشته‌يليگيش كرديان وه‌رجه‌ خوه‌يان بويه‌ و هه‌ر له‌وه‌ر ئه‌نجامه‌يل چه‌واشه‌كاريش له‌ ره‌فتاره‌يل هه‌ڵه‌ كاره‌سات هات له‌ هه‌وڵيگ ئه‌را كپه‌وكردن ئه‌وانه‌گ فكره‌و كرديان، ئمجا له‌ كورده‌وارى وتيان(دانا يا وتوشماڵ) و له‌ عه‌ره‌بى وه‌ عارف، دى له‌ڕوێ تاكيشه‌و كه‌س زه‌ره‌د نه‌كرد ئه‌گه‌ر راوێژ وه‌ كه‌سيگ دانا بكرديايد له‌ خوه‌د داناتر و ئاموژگارييش ئه‌كريه‌ێد ك بخريه‌ێده‌ خشه‌ى كاره‌يل، چوينكه‌ سه‌ركردايه‌تىوه‌رين هه‌وه‌جه‌ نه‌ويه‌، وه‌لێ ئيسه‌ ته‌نانه‌ت(كۆرنا)يش هاوشيوه‌يگ بوێ له‌لى.