وزەی نەفت وزەی دەسڵاتدارە... ک ری وەوەزی پاک نیەێد

Category: وتـار

Date: 2020-05-31T12:47:50+0000
وزەی نەفت وزەی دەسڵاتدارە... ک ری وەوەزی پاک نیەێد

شه‌فه‌ق نیوز/ وزە، جوولەخەر سەرەکی ئابووری جهانە، هەر لەوەخت چالاکی پیشەسازی وکشتوکاڵی ولە قۆناغەیل جوراجور مێژوو، لەوەختیگ مرۆڤ ئاگر پەیاکرد، تا رەسیە زوخاڵ کوچگین ئیجا نەفتو گاز، وزە بویە چشتیگ سەرەکی لە گەشەی شارستانیەت، ئەراوە دەوڵەتەیل هەوڵدان تا دابین وزە ئەرا خوەیان بکەن، چوینکە نەگ تەنیا پیشەسازی وکشتوکاڵی لەبان وزە وەردەوام بوود، بەڵکم گەواستنەوە وپەیوەندی وگوزران ئایەم لەوەر كەشوهەوا، بیجگە تەکنۆلۆژیا وەگشت بەشەگانی.
هەر لەبان ئی بنەما، وەزە یەکیگ لە هاندەرە سەرەکیەگانە ئەرا ململانه‌ و جەنگ، وهەوڵدان دەوڵەتە گەوراگان ئەرا کۆنتڕۆڵ کردن سەرچەوەیل وزە لە جهان، ئەراوە دەوڵەتە ئەوزەڵبویەگان هەمیشە بوونە مه‌یدان جەنگەگان، وخاسترین بەڵگە ئەوەسە ک وەچەو خوەمان دوینێمنەی.
فرەجار دوینیمن و ژنەفیمن لەبان وزەیل نووەوبوی یا وزەی جیگر ئەران نه‌فت یا وەزەی پاک، بەڵکم نێەکەفێدە وەرچەو جوور وەزەیگ وەکاهاوریاگ، تەنانەت ئەگەر وەرێژەی کەمیگیش.
ئاو بوودە وزە، چوونکە هایدڕۆجین فرەیگ هاتی، وچەن جاریگ ژنەفتیمن ک جیاکردنەوەی لەو ئاوە وەچەن ره‌و‌شێگ ئەنجام دریاگە، بەڵکم ئایا ئەگەر ئیسە ئاو نەویەسە وزە وخەریکە بوودە جەنگیگ جهانی لەبانی!.
وزەی خوەر لەفرە شوین وەکار هاوریاگە، بەڵکم وەسنوریگ تەنگ، چوونکە زەوی گەورایگ تواێد ئەرا خانە خوەرینەگان، وئیجا ئەمارکردن وزەگە هەمیش وەگران درەوس بوود.
وزەی هەوا، لە شوینەیلیگ تایبەت، ک كەشوهەوای گونجیاگە وەکارهاوریاگە، وه‌لی هیمان نەڕەسیەسە ئەو وەکارهاوردنە وڵاوە.
ئی سێ هۆکارە لە کوردستان وئاسانی پەیا بوون، بیجگە وەزەی تافه‌ی ئاو، ئەگەر بەنداوەیلیگ زیاتر دروس بکریەێد، چوینکە خوەر زاڵیگ دیریمن، و شوینەیل گونجیاگ ئەرا وەکارهاوردن وا لەناوبەین کویەگان دیریمن. بیجگە فرەیگ لە وزەیلیگ نوەوبوی ئەرا نمونە جوور وزەی شەپۆل دەریا ووزەی جادە و هتد..،
لە فرەشوین جهان ئی دەرفەتەیلە ئەرا وزەیل پاک ونوەوبوی هەس ، ته‌نیا ئەرا وەجیهاوردنی پشتگیری دارایی و تەکنۆڵۆژی خوازێد، هەڵبەتە دارایی و تەکنۆلۆژی هانە ژیر دەس دەسڵات، ودەسڵاتیش پشت وە کۆمپانیا نەفتیەگان بەساگە، ئایا کام کۆمپانیای نەفتی پشتگیری ئەرا ماڵ رمیان خوەی کەێد؟

related