2016-02-02 17:07:25

رووژنامه‌گه‌ ئاماژه‌ وه‌ ئه‌وه‌ كرد ك هه‌رێم كوردستان ناڵنێد وه‌ده‌س قه‌يران ئابوورى خراوتر له‌وه‌گ حكومه‌ت به‌غدا وه‌ده‌سيه‌و ناڵان، وه‌ل ئه‌وه‌يشا كارمه‌نده‌يل حكومى و جه‌نگاوه‌ره‌يل پێشمه‌رگه‌يش ك جه‌نگ دژ ريكخرياگ ترۆريستى داعش ئه‌كه‌ن ئه‌را ماوه‌ى چه‌ن مانگيگه‌ مووچه‌يليان وه‌رنه‌گرتنه‌و هه‌ر وه‌و خاتريشه‌ ناڕه‌زايى و خوه‌ينيشانداينه‌يل ئاڵشت بوى ئه‌را كاره‌يل تون وتيژى.

رووژنامه‌ ئه‌مريكيه‌گه‌ باس له‌وه‌يش ئه‌كا ك ئى روێداگه‌يله‌ وێنه‌يليگ نمايش ئه‌كا ئه‌را ده‌وڵه‌ته‌يل به‌شدار له‌ جه‌نگ دژ داعش و له‌ هه‌مان وه‌خت ئه‌و كاره‌ساته‌يل ئابووريه‌ ك له‌ئاكام داوه‌زين نرخ نه‌فت جه‌هانى په‌يا بويه‌ گرفت گه‌ورايگه‌و نه‌فتيش نزيكه‌ى 90% داهات حكومه‌ت عراقيه‌.

رووژنامه‌گه‌ له‌زووان شيه‌وكه‌ره‌يل و وه‌رپرسه‌يل حكومه‌ت عراقييشه‌و وت: هه‌رچه‌نى بار ئابوورى سه‌ختيگه‌، وه‌لێ جه‌نگ دژ داعش تا راده‌ى فريه‌يگ كاريگه‌ر نيه‌ وه‌ بوونه‌ى ده‌سميه‌ته‌يل بڕيگ له‌ ده‌وڵه‌ته‌يل ده‌ره‌كى ئه‌را عراق له‌ جه‌نگى دژ ئه‌و ريكخرياگ ترۆريستيه‌، ئه‌را نموونه‌: وڵاته‌يل يه‌كگرتگ قه‌رزز تازه‌ ئه‌ياده‌ به‌غدا ئه‌را سه‌ندن چه‌ك و ده‌وڵه‌ته‌يل تريش چه‌ك و ته‌قه‌مه‌نى وه‌پى ئه‌وه‌خشن.

رووژنامه‌گه‌ ئاشكراى يه‌يش كرد ك نزيكه‌ى 8 مليۆن كه‌س له‌ عراق پشت وه‌ مووچه‌ى حكومى به‌سن، ك شايه‌ت ده‌وڵه‌ت ناچار بدێ له‌ بودجه‌ى كه‌مه‌و بكاو مه‌ترسى ئه‌وه‌يش ئه‌كريه‌ێد ك شۆك ئابوورى ئاڵشت بدێ ئه‌را گرژى كومه‌ڵايه‌تى وه‌شيوه‌يگ فراوانتر له‌ى وه‌خته‌يل سه‌خت و كيشمه‌كيش و جه‌نگه‌يل تايفيه‌.

له‌ى باوه‌تيشه‌و، موه‌فه‌ق روبه‌يعى ئه‌ندام په‌رله‌مان و راوێژكار وه‌رين ئاسايش نه‌ته‌وه‌يى وت: ئه‌را ماوه‌ى 18 ماگه‌ داعش هه‌ڕه‌شه‌يگ له‌بان عراق دروس كردگه‌و باوه‌ڕم ئه‌وه‌سه‌ ئيمه‌ سه‌ركه‌فتيم له‌ روى وه‌ڕوى بوينه‌وه‌ى، وه‌لێ ئيسه‌ى هه‌ڕه‌شه‌ى ئفلاس دارايى له‌ عراق په‌يا بويه‌.

رووژنامه‌ى ناوبرياگ وت: روبه‌يعى په‌كه‌رى خوه‌ى نيشانداگه‌ له‌ تاوسان گوزه‌يشت له‌ساى په‌رزه‌وبوين پله‌ى گه‌رمى و كه‌مى كاره‌باو وتگه‌: ياخيبوين مه‌ده‌نيانه‌ له‌ وڵاته‌گه‌ په‌يا ئه‌دێ و جفتياره‌يليش هه‌وڵ ئه‌وه‌ ئه‌يه‌ن هه‌قه‌يليان له‌ حكومه‌ت وه‌ربگرن و ئيمه‌يش ترسيه‌يم له‌ قه‌يران ئابوورى و ناتوانايى حكومه‌ت له‌بان داين مووچه‌ى مليۆنه‌ها كارمه‌ند و يه‌يش وڵاته‌گه‌ په‌لكيش ئه‌كا وه‌ره‌و كاره‌ساتيگ كومه‌ڵايه‌تى و ئاكامه‌گه‌ى مه‌ترسيداره‌.

له‌ مه‌سه‌له‌ى داوه‌زين نرخ نه‌فتيش رووژنامه‌ ئه‌مريكيه‌گه‌ وت: داوه‌زين نرخه‌يل نه‌فت عراق ناچار ئه‌كا ڕى وشوونه‌يل پڕ ژانيگ بگرێده‌ وه‌ر، ئمجا هه‌ناى ك به‌رميليگ نه‌فت وه‌ 90 و 100 دۆلار فرووشيا له‌ى ساڵه‌يل دوياخره وه‌رجه‌ قه‌يرانه‌گه‌، باره‌گه‌ جياوازتر بوى.

هه‌ر له‌ هه‌مان باوه‌ت، لوئه‌ى ئه‌لخه‌تيب راوێژكار له‌ حكومه‌ت عراقى و دامه‌زرنه‌ر په‌يمانگه‌ى ئه‌لتاقه‌ ئويشێد: عراق هه‌وه‌جه‌ وه‌ خاسسازيه‌يل بنه‌ڕه‌تى ديرێد له‌ بواره‌يل ئابوورى و كومه‌ڵايه‌تى.

ئه‌لخه‌تيب باوه‌ڕى ئه‌وه‌سه‌ ئه‌و خاسسازيه‌يل بنه‌ڕه‌تيه‌ له‌لايه‌ن حكومه‌ته‌و بايه‌سه‌ سيستم باجداين و كه‌مه‌وكردن پشتگيرى سوزه‌مه‌نى و به‌شه‌يل خوه‌راك مانگانه‌ى جوور شه‌كه‌ر و چاى و برنج و ڕوين و چشته‌يل تريش بگرێده‌و، چوينكه‌ ئه‌گه‌ر له‌ حاڵه‌تيگ ئى گامه‌يل له‌وه‌ر گيريا، ئه‌وه‌ بيگومان كاره‌گه‌ جياواز ئه‌دێ و هاووڵاتى ئه‌تويه‌نێد ئه‌را رزقى پشت وه‌ حكومه‌ت بووه‌سێد.

دوياخريش رووژنامه‌گه‌ باس له‌وه‌يش كرد ك عراق هه‌وڵ ئه‌وه‌ ئه‌ياد متمانه‌ى عراقيه‌يل وه‌ ده‌س بارێد و له‌ هه‌مان وه‌خت هاووڵاتيه‌يليش هه‌وڵ ئه‌وه‌ ئه‌يه‌ن دارايه‌يليان له‌ه‌ بانكه‌يل بكيشنه‌وه‌و ئاماژه‌ وه‌يه‌يش كرد ك سه‌ندووق نه‌خت ناوده‌وڵه‌تييش هه‌وڵ ئه‌وه‌ ئه‌ياد كار وه‌ل حكومه‌ت عراقى بكاو خاسسازى له‌ بودجه‌گه‌ى بكاو هه‌وڵ دابينكردن مليۆنه‌ها دۆلار ئه‌راى ئه‌ياد جوور قه‌رز.

}