2016-01-03 16:24:47

فه‌يسه‌ڵ وت: ئه‌وسا هه‌ميشه‌ خه‌ياڵ ژيانيگ خوه‌ش و پر ئه‌مان كرديام وه‌ل شوقه‌يگ و مووچه‌ى خاس، وه‌لێ دوياخر فه‌يسه‌ڵ دوياى گه‌شتيگ پڕ مه‌ترسى وه‌ دريژايى مانگيگ هه‌ر وه‌ل ره‌سينى ئه‌را سوێد بريار گله‌وخواردن دا ئه‌را عراق.

له‌ى باوه‌ته‌و، ريكخرياگ كووچ ناوده‌وڵه‌تى ئه‌وه‌ ده‌رخست ك ده‌سميه‌ت 779 عراقى داگه‌ له‌ مه‌سه‌له‌ى گله‌وخواردن له‌ ئۆرپا وه‌ خواست خوه‌يان له‌ ته‌شرين دويه‌م/ نۆڤه‌مبه‌ر گوزه‌يشت، ك يه‌يش دو ئه‌وه‌نه‌ى ئه‌و شماره‌ى مه‌ردمه‌سه‌ ك له‌ مانگ ته‌شرين يه‌كه‌م گوزه‌يشته‌ گله‌وخواردنه‌، ك ئه‌يانه‌يش جوور فه‌يسه‌ڵ ده‌سميه‌ت دريانه‌.

بڕيگ له‌ عراقيه‌يل بڕيار گله‌وخواردن دان دوياى ئه‌وه‌گ جاڕس بوين له‌ داواككردن ماف په‌نابه‌رى سه‌خت و هه‌ر وه‌و خاتريشه‌ نائوميديش بوين له‌وه‌ر نه‌وين كار و له‌ هه‌مان وه‌خت ئحساس وه‌ حنيه‌ت ئه‌را ماڵ و هاوڕيه‌يليان كردن و بڕيگيش له‌ليان ناچار بوين گله‌و بخوه‌ن له‌وه‌ختيگ ك داواكاريه‌يليان ره‌ته‌و كريا له‌باوه‌ت ماف په‌نابه‌رى.

وه‌ى خاتريشه‌ فه‌يسه‌ڵ ئه‌را رووژنامه‌ى واشنتۆن پۆست باس له‌و وه‌خته‌يل و چه‌ن مانگه‌ كرد ك له‌ كه‌مپ په‌نابه‌ره‌يل برده‌سه‌ى سه‌ر له‌ نزيك شار مالمو سوێدى و وت: ژيان له‌ورا فريه‌ ناخوه‌ش و سه‌خته‌ و خوه‌راكيان ته‌نانه‌ت پشيه‌يليش ناخوه‌نه‌ى.

فه‌يسه‌ڵ هه‌ميش وت: من كووچ كردم وه‌ره‌و ئۆرپا و ئه‌وه‌ ئه‌ڕام ده‌ركه‌فت ك ئۆرپا ته‌نيا فكره‌يگه‌، به‌ڵكوو له‌ڕاسى جوور ناوچه‌ى باب ئه‌لشه‌رقيه‌ له‌ ناوڕاس به‌غدا.

فه‌يسه‌ڵ دگان وه‌ ئه‌وه‌يش نا ك له‌وه‌ر هووكاره‌يل ئابوورى روى له‌ ئۆرپا كردگه‌و بڕيار داگه‌ باس ئه‌وه‌يش بكا ك تويش هه‌ڕه‌شه‌ هاتگه‌ له‌لايه‌ن ميليشيايه‌يل و ئاماژه‌ وه‌يه‌يش كرد و وت: ئه‌گه‌ريش گيانم فريه‌ له‌ مه‌ترسى بوياتاد گله‌و نه‌خواردم.

باوگ فه‌يسه‌ڵ 8000 دۆلار له‌بان ره‌سانن كوڕه‌گه‌ى ئه‌را ئۆرپا خه‌رج كرد و وه‌ل ئه‌وه‌يشا كوڕه‌گه‌ى تكا له‌لى كرد پويل گله‌وخواردنيشى ئه‌را عراق ئه‌راى ره‌وانه‌ بكا.

عودى فه‌يسه‌ڵ موحى باوگ فه‌يسه‌ڵ ئه‌وه‌ ده‌رخست ك كوڕه‌گه‌ى گشت خزمه‌تگوزاريگ له‌ده‌س داگه‌ له‌ورا، چوينكه‌ له‌ماڵ گشت خزمه‌تگوزارييگ ئه‌ڕاى ئاماده‌ بويه‌و خزمه‌ت كرياگه‌.

هه‌ر له‌ هه‌مان باوه‌ت، ستار نه‌ورووز قسه‌كه‌ر وه‌ناو وزاره‌ت كووچ و كووچبه‌ره‌يل وت: هه‌زاران كووچكه‌ر عراقى گله‌وخواردنه‌ ئه‌را عراق و هه‌زارانيش خوازيارن گله‌و بخوه‌ن.

وه‌ل ئه‌وه‌يشا باڵوێزخانه‌يل عراقى له‌ ئۆرپا سه‌عاته‌يل زيايه‌ كار ئه‌كه‌ن ئه‌را دابينكردن به‌ڵگه‌يل گه‌شت وه‌ختى ئه‌را ئه‌و په‌نابه‌ره‌يله‌ ك خوازيارن گله‌و بخوه‌ن ئه‌را عراق.

نه‌ورووز ئاماژه‌ وه‌يه‌يش كرد ك فريه‌يگ له‌ جايه‌ڵ جوانه‌يل عراقى له‌ تاوسان گوزه‌يشت روى له‌ ئۆرپا كردنه‌و وه‌گووره‌ى ئامار نه‌ته‌وه‌يل يه‌كگرتگيش ئه‌وه‌ ده‌ركه‌فت ك عراقيه‌يل 8% پيك ئه‌يه‌رن له‌ جه‌م ئه‌و يه‌ك مليۆن كووچكه‌ر و په‌نابه‌ره‌يله‌ ك له‌ 2015 ره‌سينه‌سه‌ ئۆرپا له‌ڕى ده‌رياوه‌، ك يه‌يش ئه‌كاده‌ 80 هه‌زار عراقى.

نه‌ورووز باس له‌وه‌يش كرد ك ئى كووچكردنه‌ كاريگه‌رى راسه‌وخۆ داشتگه‌ له‌بان ئه‌وانه‌گ ك وه‌ڕاسى هه‌وه‌جه‌ وه‌ ماف په‌نابه‌رى داشتنه‌، چوينكه‌ بيگومان كه‌سه‌يل فريه‌يگ هه‌ن ناڵنن وه‌ده‌س گرژى و تون وتيژى.

ئبراهيم عه‌بدوڵڵا ئێزيدى يه‌كيگه‌ له‌وانه‌ ك وه‌ڕاسى هه‌وه‌جه‌ وه‌ ماف په‌نابه‌رى داشتنه‌ و نزيكه‌ى 11 هه‌زار دۆلار خه‌رج كردگه‌ تا بڕه‌سێده‌ ئه‌ڵمانيا، وه‌لێ دوياى چه‌وه‌ڕيكردن ئه‌را وه‌رگرتن ماف په‌نابه‌رى ئه‌را ماوه‌ى چوار مانگ ئه‌وه‌ وه‌خاستر زانست گله‌و بخوه‌ێد ئه‌را ناو ئه‌و كه‌مپ په‌نابه‌ره‌يله‌ ك هيشته‌ى جى له‌ باكوور عراق له‌ ته‌شرين يه‌كه‌م/ ئوكتۆبه‌ر گوزه‌يشت.

عه‌بدوڵڵا له‌ ساڵ گوزه‌يشت وه‌ل خيزانه‌گه‌ى كووچكرد وه‌ره‌و ئۆرپا له‌وه‌ختيگ ريكخرياگ ترۆريستى داعش زاڵ بوى له‌بان قه‌زاى شه‌نگاڵ ك زوورم مه‌ردمه‌گه‌ى ئێزيديه‌ و شماره‌ى فريه‌يگ له‌ليان كوشياو له‌ قه‌وره‌يل وه‌جه‌م نريان و داعش ده‌سكرده‌ فرووشتن ژن و دويه‌ته‌يليان له‌ بازاڕه‌يل.

ئه‌وه‌ بوى ك هيزه‌يل پێشمه‌رگه‌ى كوردستان له‌ى دوياخره‌ دوياى جه‌نگه‌يل سه‌ختيگ وه‌ پشتگيرى هيزه‌يل ئاسمانى ئه‌مريكى داعش له‌و شاره‌ دويره‌و خستن و شه‌نگاڵ ئازاد كردن، ك هيمان تائيسه‌يش ئاوايى عه‌بدوڵلا له‌ ده‌ورگرد شاره‌گه‌ ها ژير ده‌سڵات ئه‌و ريكخرياگ ترۆريستيه‌.

ئمجا هه‌رچه‌نى عه‌بدوڵڵا هويچ چشتيگيش شك ناوه‌ێد له‌وه‌ر تاترى گله‌و بخوه‌ێد، وه‌لێ نگه‌رانه‌ له‌وه‌گ ده‌سڵاته‌يل ئه‌ڵمانى ڕى وه‌پى نه‌يه‌ن خيزانه‌گه‌ى گرده‌و بكاو نه‌تويه‌نێد چه‌وى بكه‌فێده‌ هاوسه‌ره‌گه‌ى و كوڕه‌گه‌ى ك ته‌مه‌نى 16 ساڵه‌.

عه‌بدوڵلا وت: له‌يرا هه‌ر كه‌مپه‌ و له‌واريش هه‌مان چشت و هه‌وڵ ئه‌وه‌يش دام خيزانه‌گه‌م جيواز بكه‌م وه‌ره‌و ئۆرپا، وه‌لێ‌ وه‌ قسه‌ى خوه‌ى ئه‌وه‌ ده‌ركه‌فت ك جوور كه‌مينه‌ ئحساس وه‌ مه‌قبوليه‌ت ناكا و تواناى مه‌ندنه‌وه‌ نه‌يرێد.

وسام ره‌زاق ته‌مه‌نى 34 ساڵه‌و كرانشين بويه‌ له‌ عراق ، وه‌ل هاوسه‌ر و هه‌ر چوار مناڵه‌گه‌ى وه‌رجه‌ كووچكردنى ئه‌را فنله‌ندا له‌ ئه‌يلوول/ سپته‌مبه‌ر گوزه‌يشت سه‌ياره‌ ته‌كسيه‌گه‌ى فرووشت ئه‌را ئه‌وه‌گ بتويه‌نێد وه‌پى بره‌ێده‌ ئۆرپا ك سه‌رچه‌وه‌ى رزق و رووزيى بويه‌ و باس له‌وه‌ ئه‌كا ك گه‌شته‌گه‌ى 27 رووژ دريژه‌ داشتگه‌ له‌ عراقه‌و ئه‌را فنله‌ندا.

وسام ره‌زاق ئويشێد: من ئه‌گه‌ر 20 له‌ سه‌ديش له‌و ئه‌زه‌رته‌يله‌ بوينياتام ك خه‌ياڵى كرديام، ئه‌وه‌ بيگومان له‌ فنله‌ندا مه‌نديام گله‌و نه‌خوارم ئه‌را عراق، يه‌يش بيجگه‌ ئه‌وه‌گ ره‌زاق سه‌رچه‌وه‌ى رزقه‌گه‌يشى له‌ ده‌سدا.

}