2020-02-29 09:32:10

شه‌فه‌ق نيوز/ گرووپه‌يل سه‌ر وه‌ئيران له‌ عراق، له‌ ماوه‌ى ئاينده‌ رۆڵ تازه‌يگ دوينن دوياى شكه‌ست و فشاره‌يل ك هاته‌ تويش فه‌سيل"كه‌تيبه‌يل حزبوڵڵا"له‌ى ماوه‌ى دوياخره‌، جوور ئه‌وه‌گ ماڵپه‌ڕ"جاست سيكورتى"ئاماژه‌ وه‌پيكرد ك تايبه‌ت وه‌ مه‌سه‌له‌ى ئاسايش نه‌ته‌وه‌يى.

له‌ى باوه‌ته‌و، كريستن سميس نويسه‌ر له‌ شيه‌وكردنيگى له‌باره‌ى ئاينده‌ى نفوز ئيرانى له‌ حكومه‌ت عراقى و ستراتيجيه‌ت تازه‌ى له‌ وڵاته‌گه‌ دوياى كوشيان قاسم سوله‌يمانى سه‌ركرده‌ى فه‌يله‌ق قودس و ئه‌بو مه‌هدى موهه‌ندس جيگر سه‌رۆك ده‌سه‌ى حه‌شد شه‌عبى له‌ په‌لاماريگ ئه‌مريكى، ئاماژه‌ وه‌ ئه‌وه‌ كرد ك حزبوڵڵا سه‌ركرده‌گه‌ى و شماره‌يگ له‌ چه‌كداره‌يلێ له‌ده‌سداگه‌ و بنگه‌يليشى تويش په‌لاماره‌يليگ هاتگه‌ له‌ماوه‌ى دو مانگ گوزه‌يشت.

باس له‌وه‌يش كرد كه‌تيبه‌يل حزبوڵڵا له‌ حاڵ حازر تويش دقه‌تكارييگ تون هاتگه‌، ئاماژه‌ وه‌يه‌يش كرد ئه‌حمه‌د حمێداوى ئه‌مينداره‌ گشتيه‌گه‌ى له‌لايه‌ن واشنتۆنه‌و خرياسه‌ ليست تيرۆر ك يه‌يش فشاره‌يل فريه‌يگ ئه‌خاده‌ بان كه‌تيبه‌يل.

نويسه‌ره‌گه‌ وت: ئيران له‌ ماوه‌ى ئاينده‌ هه‌وڵ په‌ياكردن فه‌سيليگ تر ئه‌ياد ئه‌را شوونگره‌وه‌ى كه‌تيبه‌يل حزبوڵڵا تا چالاكيه‌يليگ دژ وه‌ وڵاته‌يل يه‌كگرتگ و هاوپه‌يمان ئه‌نجام بيه‌ێد.

نويسه‌ره‌گه‌ يه‌يش ده‌رخست ك "بزووتنه‌وه‌ى نوجه‌با" كانديده‌ ئه‌را وه‌رگرتن ئه‌و رۆڵه‌ ك لێدوانه‌يليگ دژ وڵاته‌يل يه‌كگرتگ ده‌ركرد له‌ ماوه‌ى مانگ گزه‌يشت و باس له‌وه‌يش كرد فه‌سيله‌يل تر هاوشيوه‌ له‌ په‌رله‌مان عراقى جوور "عه‌سايب ئه‌هل هه‌ق" و "كه‌تيبه‌يل ئيمام عه‌لى" به‌رژوه‌نديه‌يل سياسى و ئابوورى ديرن ك ناخوازێد له‌ده‌سيان بيه‌ێد ئه‌گه‌ر ئى رۆڵه‌ وه‌رگرتن.

نويسه‌ر باس له‌وه‌يش كردگه‌، بزووتنه‌وه‌ى نوجه‌با هه‌ڕه‌شه‌ له‌ گرتنه‌ ئامانج هيزه‌يل ئه‌مريكى ئه‌كاو بڕيگ وێنه‌يش بڵاو كردگه‌ له‌وه‌ختيگ چه‌وديرى جموجويل هيزه‌يل هاوپه‌يمان كردگه‌ونويساننه‌يليگ له‌قه‌يه‌و نويساگه‌ جوور: ئيمه‌ نزيكتريم له‌وه‌گ ئيوه‌ زانينه‌ێ.

ئمجا هه‌رچه‌نى ك به‌شيگه‌ له‌ حه‌شد شه‌عبى، وه‌لێ كه‌متر سووزدارى وه‌ل حكومه‌ت عراقى داشت و فراكسيۆن په‌رله‌مانى نه‌يرێد و كه‌متر گرنگى داسه‌ تيكه‌ڵبوين له‌ سياسه‌ت ناوچه‌يى وه‌ چه‌واشه‌ى فه‌سيه‌يل تر له‌ حه‌شد و له‌ هه‌مان وه‌خت چالاكيه‌يليش ديرێد له‌ ده‌يشت وڵات، له‌ سوريا ليواى رزگاركردن جۆلان دامه‌زران ك ئامانجى ده‌سميه‌تداين حكومه‌ت سوريا بوێ له‌ حاڵه‌تيگ هه‌وڵ هاوردنه‌وه‌ى ئى ناوچه‌ بيه‌ێد.

وه‌ل ئه‌وه‌يشا ئه‌كره‌م كه‌عبى سه‌ركرده‌ى، چالاكيه‌يليگ داشت له‌ ده‌يشت مه‌رزه‌يل عراق، ك چه‌ن وێنه‌يگى گيرياگه‌ وه‌ل حه‌سه‌ن نه‌سروڵڵا سه‌ركرده‌ى حزبوڵڵاى لوبنانى و يه‌كه‌مين سه‌ركرده‌يگيش بوێ چه‌وى كه‌فته‌ ئسماعيل قائانى شوونگره‌وه‌ى سوله‌يمانى و هه‌ڕه‌شه‌ى ده‌ركردنيش له‌ هيزه‌يل ئه‌مريكا كرد له‌ عراق.

نويسه‌ره‌گه‌ ئاماژه‌ وه‌يه‌يش كردگه‌، بزووتنه‌وه‌گه‌ رێگه‌يگ ئه‌گرێده‌ وه‌ر ئه‌را وه‌رگرتن ئه‌و وه‌رپرسيارێتيه‌ ك حزبوڵڵا و ئه‌بو مه‌هدى موهه‌ندس هيشتنه‌ى جى له‌ماوه‌ى روێ وه‌ڕوێ بوينه‌وه‌ى دوشمنه‌يل ئيران له‌ عراق له‌ڕوێ سه‌ربازييه‌و.

له‌ هه‌مان وه‌خت نويسه‌ره‌گه‌ يه‌يش وتگه‌: ك فه‌سيله‌يل تر له‌وانه‌گ سه‌ر وه‌ حه‌شد شه‌عبيين له‌ حكومه‌ت عراقى و رۆڵ سه‌ربازێ نه‌يرن، سوود له‌ وجوودى وه‌رئه‌گرن له‌ مه‌سه‌يل نفوز و ته‌مويل و گرده‌وكردن زانيارێ.

}