دڵته‌نگى واران
واران های ده کو ، دیارد نیه
ناز رووژه‌یل ، وه‌هارد نیه
واران های ده کو، خه‌یالم زامه
ئه‌گه‌ر دير بايده‌و، عومرم ته‌مامه
په‌نجه‌ره بى ت خه‌مين و زاره
چه‌وه‌ڕێ ناز، ئه‌وور وه‌هاره
ت های ده هه‌ر جای، گوش به‌ی وه ده‌نگم
واران وه بی ت، هه ر شه‌و دل ته‌نگم
واران هه‌م به‌وره‌و له‌نوو ته‌ڕم كه
وه‌ده‌نگ لافاود له‌نوو كه‌ڕم كه
له وه‌ختى چيده، زه‌وقم چه‌پاوه
چه‌وم چه‌وه‌ڕێ، يه‌ى قه‌تره ئاوه
به‌وره‌و هه‌م له‌نوو بوار له‌سه‌رم
بشوور تووز و ته‌م له ده‌وروبه‌رم
ده‌ماوه‌ن خه‌م ها ده ده‌رينم
خه‌ياڵ خه‌زه‌ر ها ده ده‌روينم
يه فره وه‌خته ئاسمان ته‌نگه
ئه‌را ناتند دڵم دڵ ته‌نگه
يه فره وه‌خته داران بى ئاون
له دويرى تنه هه‌ر شه‌و كه‌واون
ئاسمان كه‌و هه‌ر تووز و ته‌مه
را كووچد واران دنيا پڕ خه‌مه
ئه‌وره‌يلێ ده مى دى په‌ڕپه‌ڕه‌و نيه‌ون
چه‌وه‌يلێ شه‌وێ ساتى ته‌ڕه‌و نيه‌ون
واران ئاسمان، دی نه‌فه‌س نه‌یری
ت گشت که‌سی بوبد، ئه‌وێ دی كه‌س نه‌يرى
به‌وره و خه‌یال ، شیعرم ته‌ڕ بکه
په‌ڕه‌ێ گولباخی، هه‌م په‌ڕپه‌ڕ بكه
شه‌وێ وه‌بى ده‌نگ به‌وه‌ره‌و ديارم
تا هه‌م سه‌رده‌وا بووده وه‌هارم
من و دڵ له‌نوو ته‌ڕ بويمن يه‌ێ شه‌و
تاگه‌ر مه‌ته‌ڵد نه‌ويشيمن له خه‌و
جه‌لال كوهى
