فه‌رمانڕه‌وايی مووسای به‌رمه‌كی

فه‌رمانڕه‌وايی مووسای به‌رمه‌كی
2016-09-18T18:29:17+00:00

عه‌بدولره‌زاق به‌گ دونبولييش نویساگه‌: بنه‌ماڵه‌ى مووساى به‌رمه‌كى (150) ساڵ والى شام بوینه‌و میر عیساى كوڕى وه‌ختیگ ك هاروون ره‌شید قین له‌ى بنه‌ماڵه‌ گرتگه‌و فه‌رمان داگه‌ بنبڕیان بكا، ئه‌وانيش واينه‌و خوه‌ى ره‌ساننه‌سه‌ جه‌وه‌ڵه‌یل كوردستان و له‌ورا وه‌دزییه‌و جیگير بوینه‌، ئمجا دویاخریش وه‌ل بڕيگ له‌ ماڵه‌ دونبولیه‌يل روى كرده‌سه‌ ئازه‌ربایجان و له‌ورايش ده‌سڵات په‌یا كردگه‌و بويه‌سه‌ فه‌رمانڕه‌وا.

وه‌لى سه‌رچه‌وه‌یليگيش باس له‌وه‌ ئه‌كه‌ن ك بنه‌ماڵه‌ى به‌رمه‌كى له‌ سه‌رده‌م خه‌لافه‌ت عه‌باسى ته‌نیا چه‌ن ساڵه‌يل كه‌میگ خوه‌شبه‌خت بوینه‌و"مووساى كوڕ یه‌حیا"ى به‌رمه‌كییش دویاى كوشیان جه‌عفه‌ر براى خریاسه‌ زيندان و بيسه‌روشوون كریاگه.

بیجگه‌ ئه‌وه‌يش له‌ سه‌رده‌م به‌رایى و له‌وه‌خت ده‌سڵات عه‌باسى هویچ وه‌زیر و سه‌رۆك وه‌زیره‌یلیگ ناسناو پاشا نه‌یاشتگه‌ تا ده‌وران " ئال بوویه‌ " له‌ نیمه‌ى سه‌ده‌ى چواره‌م كووچى تا كاره‌گه‌ ئاشكرا بدێ و بزانيه‌ێد ئايا وه‌ڕاسى پاشایى ئه‌و هه‌رێمه‌ كردگه‌؟

وه‌هه‌رحاڵ شایه‌ت ئى عیسا هه‌ر هه‌مان ئه‌و عیسا بويه‌ ك" ئه‌مین زه‌كى به‌گ"ناوى ناگه‌ میرعیساى ناسرياگ وه‌" سه‌ڵاحه‌دین "ك گوایا (100) هه‌زار خیزان كورد ئێزیدى جیواز كردگه‌ ئه‌را ئازه‌ربایجان.

ئه‌مین زه‌كى به‌گ نویساگه‌: تیره‌ى دونبولى چه‌ن لقیگ له‌لى كه‌فته‌سه‌و، ئه‌ويش له‌وه‌ر ئه‌وه‌گ له‌ سه‌رده‌م "مه‌ئموون   عه‌باسى و ته‌یموور له‌نگ و سوڵتان سه‌لیم عوسمانى و سه‌فه‌ویه‌یل " بڵاوه‌ وه‌پيان كریاگه‌ ئه‌را خوه‌راسان و قووچان و گه‌نجه‌و قه‌ره‌باغ و قه‌ره‌جه‌داغ و شوونه‌یل تر ، ك دوياخريش بوینه‌ چه‌ن به‌شیگه‌و‌ جوور"دونبولى ئه‌یوبخانى، دونبولى به‌گزاده‌یى، دونبولى شه‌مسكى، دونبولى عیسا به‌گ حوویى"، وه‌ل ئه‌وه‌یشا ئى تیره‌ له‌ سه‌ده‌ى " 4 كووچی تا سه‌ده‌ى 9 كووچی" ك ئه‌كاد په‌نج سه‌ده‌ هه‌میشه‌ ده‌سڵات و فه‌رمانڕه‌وایى خوه‌یان داشتنه‌.

مه‌لا جه‌ميل رۆژبه‌يانی

Shafaq Live
Shafaq Live