شماره‌ى حاڵه‌ته‌يل مردن وه"ڤايرۆس كۆرۆنا"له ئيران به‌رزه‌و بوێ ئه‌را 14 كه‌س
2020-02-25T09:14:28+00:00
شه‌فه‌ق نيوز/ ئمڕوو سێشه‌ممه ئيران ئاشكراى كرد، شماره‌ى حاڵه‌ته‌يل گيان له‌ده‌سدان وه ڤايرۆس كۆرۆناى تازه به‌رزه‌و بويه ئه‌را 14 حاڵه‌ت، دوياى تۆماركردن دو حاڵه‌ت تر مردن.
له‌ى باوه‌ته‌و، عه‌بدولڕه‌زا ره‌حمانى فه‌زڵى وه‌زير ناوخوه‌يى ئيرانى وت: بايه‌سه زاڵبوينيگ له‌بان ئى ڤايرۆس كۆرناى كوشنده ئه‌نجام بدريه‌يد له‌رێ پته‌وكردن يه‌كێتى و هاوكارى يه‌كگرتنه‌وه له وڵاته‌يل.
جى باسه، يه‌يش له‌وه‌ختيگه ئاژانس "ئيرنا"ى ئيرانى له زووان وه‌زير ناوخوه‌يى له كۆنگره‌يگ رووژنامه‌گه‌رى ئه‌وه ده‌رخست ك جه‌خت له‌وه كردگه حكومه‌ت له دانيشتنه‌يلى مه‌سه‌له‌ى ڤايرۆس كۆرۆنا تاووتوێ كردگه وه‌ل ده‌رئه‌نجامه‌يلى له‌ڕوێ ئابوورييه‌و له وڵاته‌گه.
