شكايه‌تيگ دادوه‌رێ دژ عه‌بدولمه‌هدى به‌رزه‌و كرياگه‌و خه‌زعه‌لى وشدارى ئه‌ياد

شكايه‌تيگ دادوه‌رێ دژ عه‌بدولمه‌هدى به‌رزه‌و كرياگه‌و خه‌زعه‌لى وشدارى ئه‌ياد
2019-10-02T08:15:28+00:00

شه‌فه‌ق نيوز/ محه‌مه‌د مه‌جيد رسه‌ن ساعدى سه‌رۆك گردبوينه‌وه‌ى پاريزه‌ره‌يل جيل ئه‌لعه‌تا, ئاشكراى به‌رزه‌وكردن شكايه‌تيگ دادوه‌رێ كرد دژ عادل عه‌بدولمه‌هدى سه‌ركرده‌ى گشتى هيزه‌يل چه‌كدار و شماره‌يگ تر له‌ سه‌ركرده‌يل ئه‌منى له‌ئه‌نجام ئه‌و ياساشكنييه‌ ك په‌يڕه‌و كرياگه‌ له‌ وه‌خت خوه‌ينيشانداينه‌يل و له‌ ئه‌نجامى ده‌يان قوربانى كه‌فتنه‌و.

 

ساعدى له‌ به‌ياننامه‌يگ وت: گردبوينه‌وه‌ى پاريزه‌ره‌يل ده‌س ئه‌كاده‌ دامه‌زرانن سێ محوه‌ر ياسايى، يه‌كه‌ميان به‌رزه‌وكردن شكايه‌تيگ دژ سه‌رۆك وه‌زيره‌يل و سه‌ركرده‌يل تر ك تاوان كوشتن وه‌ ئه‌نقه‌رز ئه‌نجام دانه‌ و هيز هاوردنه‌سه‌ كار دژ خوه‌ينيشانده‌ره‌يل و دويه‌ميش پشت به‌سانن وه‌ خوه‌ينيشانده‌ره‌يل ئاشتيخواز و وه‌رگريكردن له‌ليان و سێيه‌ميش دامه‌زرانن ليژنه‌يگ له‌ پاريزه‌ره‌يل ئه‌را چه‌وديريكردن ماف كه‌س وكار كوشياگه‌يل و زه‌خمداره‌يل.

 

لاى خوه‌ييشه‌و قه‌يس خه‌زعه‌لى سه‌ركرده‌ى عه‌سايب ئه‌هل هه‌ق، له‌ به‌ياننامه‌يگ وت: كه‌فتنه‌وه‌ى قوربانيه‌يليگ بيتاوان له‌ رۆڵه‌يل خوه‌ينيشانده‌رمان و زه‌خمداربوين له‌ ڕز هيزه‌يل ئه‌منى وه‌و شماره‌ نيشانه‌س ئه‌را وجوود ده‌س خراوه‌كار ك ئه‌خوازێد پشيوى بكاو سه‌قامگيرى بشيونێد ته‌نانه‌ت ئه‌گه‌ر له‌بان هساو گيان بيتاوانه‌يليش بويه‌.

 

جى باسه‌، خه‌زعه‌لى هه‌ميش وت: ئيمه‌ له‌لاى خوه‌مانه‌و وشدارێ دايمنه‌ له‌ وجوود ئيچنه‌ كه‌سه‌يليگ ك خراوه‌كارن و تائيسه‌يش وشدارى ئه‌يه‌يم له‌باره‌يانه‌و، چوينكه‌ هاوڵاتيه‌يل ماف خوه‌يانه‌ خوه‌ينيشاندتين بكه‌ن و داواى مافه‌يل خوه‌يان بكه‌ن.

Shafaq Live
Shafaq Live