له په‌رله‌مان هه‌وڵ ئه‌را هه‌ڵوه‌شاننه‌وه‌ى فه‌رمانده‌يى سه‌ربازێ له شاره‌يل عراقى دريه‌ێد
شه‌فه‌ق نيوز/ هيزه‌يل جياجياى په‌رله‌مانى و سياسى، ك زوورميان پشتگيرى له فه‌سيله‌يل حه‌شد شه‌عبى ئه‌كه‌ن له عراق و نزيكن له رينمايه‌يل ئيران، جموجويل ئه‌وه ئه‌كه‌ن پرووژه برياريگ بخه‌نه ڕوێ ئه‌را هه‌ڵوه‌شاننه‌وه‌ى سه‌ركردايه‌تى فه‌رمانده‌يى سه‌بازێ له پاريزگاو شاره‌يل جياجياێ عراقى، وه ئه‌وه‌گ ناده‌ستووريه.
سه‌ركردايه‌تيه‌يل فه‌رمانده‌يى، ك شماره‌يان 11 سه‌ركردايه‌تيه، له‌وه‌خت حكومه‌ت نورى مالكى له‌ساڵ 2008 تازه‌وه كرديان و تاوه‌خته‌يل نزيكيگ جێ ره‌تكردنه‌وه هيزه‌يل عه‌ره‌بى سنى بوى و داواى لاوردنى كريا، وه‌لێ ئيسه مه‌سه‌له‌گه جياس و ئه‌وه‌گ ئه‌وسا داواى هه‌ڵوه‌شاننه‌وه‌ى كردياد، ئيسه ئه‌خوازێد بمينێد و ئه‌وه‌گ وه‌رگرى له‌لێ كردياد، ئيسه ئه‌خوازێد هه‌ڵوه‌شيه‌ێده‌و، هه‌ر له سه‌ركردايه‌ى فه‌رمانده‌يى فورات ناوڕاس تا باديه‌و جزيره‌و ئه‌نبار و دجله‌و سامه‌ڕا و فه‌رمانده‌يى به‌غدا.
جى باسه، وه‌گووره‌ى ئه‌نداميگ له په‌رله‌مان، ئه‌وه ده‌ركه‌فت ك جموجويليگ وجوود ديرێد له‌لايه‌ن فراكسيۆنه‌يل جياجيايگ له‌وه‌رجه گشتيانيش له‌ناو هاوپه‌يمانى بنياتنان ك ئامانج له‌لى هه‌ڵوه‌شاننه‌وه‌ى فه‌رمانده‌يى هاوبه‌شه وه ته‌واوى.
