ليژنه‌يگ په‌رله‌مانى گرنگترين ته‌وه‌ر ئه‌را حكومه‌ت له گفتگوو وه‌ل ئه‌مريكا ديارى ئه‌كا
شه‌فه‌ق نيوز/ ليژنه‌ى ئاسايش و وه‌رگرى له په‌رله‌مان عراقى، گفتگوو ستراتيجى له‌ناونى واشنتۆن و به‌غدا له ناوڕاس مانگ ئاينده، وه گرنگ و نه‌فدار فريه‌يگ ئه‌را لايه‌ن عراقى تاريف كرد و جه‌ختيش له‌وه كرد عراق له‌ڕوێ سه‌ربازييه‌و پشت وه ئه‌مريكا ئه‌وه‌سێد.
له‌ى باوه‌ته‌و، عه‌باس سرووت ئه‌ندام ليژنه‌گه ئه‌را ئاژانس شه‌فه‌ق نيوز وت: گفتگوو ستراتيجى له‌ناونى واشنتۆن و به‌غدا له ناوڕاس مانگ ئاينده، نه‌فدار و گرنگه ئه‌را لايه‌ن عراقى، وه‌تايبه‌ت ك ريككه‌فتنيگ ئه‌منى ستراتيجى هه‌س وه‌تايبه‌ت له روێ سه‌ربازييه‌وه‌و چه‌كه‌يليگ هه‌ن عراق وه ملياره‌ها دۆلار له وڵاته‌يل يه‌كگرتگ ئه‌مريكا سه‌نده‌سه‌يان جوور ته‌ياره و ده‌بابه‌و چه‌كه‌يل تر و له چوارچيوه‌ى ئه‌و ريككه‌فتنيشه كاره‌يل مه‌شقداين له‌بان ئه‌و چه‌كه‌يليشه هه‌س وه‌ل كاره‌يل خاسه‌وكردنيان.
جى باسه، سرووت هه‌ميش وت: گفتگوو ستراتيجى چه‌وه‌ڕيكرياێ له‌ناونى واشنتۆن و به‌غدا فريه گرنگه‌و عراق پشت وه چه‌كه‌يل ئه‌مريكى ئه‌وه‌سێد فيشتر له چه‌كه‌يل تر و چه‌كه‌يليگ كاران و نه‌بايه‌د ده‌سوه‌ردارى بوێد و هه‌ر وه‌و خاتريشه بايه‌سه ئى گفتگووه ئه‌نجام بدريه‌ێد.
