دوياى خراوبوين بارودوخ ده‌ورگرد خانه‌قين.. داواكارى ئه‌را هاتنه‌وه‌ى هيزه‌يل پێشمه‌رگه
شه‌فه‌ق نيوز/ يه‌كێتى نيشتمانى كوردستان، سه‌رله‌نوو داوا كرد دوسيه‌ى ئه‌منى له ده‌ورگرد قه‌زاى خانه‌قين راده‌س وه هيزه‌يل سوپا و پێشمه‌رگه بكريه‌ێد.
له‌ى باوه‌ته‌و، زاهد ده‌لۆ ئه‌ندام له يه‌كێتى نيشتمانى كوردستان و ئه‌ندام ئه‌نجومه‌ن هه‌ڵوه‌شرياێ دياله ئه‌را ئاژانس شه‌فه‌ق نيوز وت: به‌رزه‌وبوين گرژيه‌يل و رويداگه‌يل تيرۆريستى له ده‌ورگرد خانه‌قين نيشانه‌يگه له‌بان كزى هيزه‌يل ئه‌منى و حه‌شد له مه‌سه‌له‌ى روێ وه‌ڕوێ بوينه‌وه‌ى داعش و له هه‌مان وه‌خت وجوود كيشه‌ى ئه‌منى هه‌وه‌جه وه چاره‌سه‌ر جدييگ ديرێد له‌لايه‌ن هيزه‌يل ئه‌منييه‌و له‌وه‌ر مقه‌يه‌تيكردن له گيان هاووڵاتيه‌يل و جفتياره‌يل ك كه‌فتنه‌سه ژير هه‌ڕه‌شه له ناوچه‌يليگ جياجياى ده‌ورگرد خانه‌قين.
ده‌لۆ داوا كرد دوسيه‌ى ئه‌منى راده‌س وه هيزه‌يل هاوبه‌ش پێشمه‌رگه‌و سوپاى عراقى بكريه‌ێد و سوو له ئه‌زموونه‌يل ئه‌منى پێشمه‌رگه وه‌ربگيريه‌ێد له ده‌ورگرد خانه‌قين ك تويه‌نست مقه‌يه‌تى له ئاسايش ناوچه‌گه بكا له‌وه‌ختيگه‌و رژيم وه‌رين رميا تا رويداگه‌يل ئوكتۆبه‌ر له 2017.
