هەرێم کوردستان کاروانەیلیگ زیاتر ئەرا دەسمیەتی زەرەدمەنەیل زەویلەرزەی تورکیا و سوریا کلکەێد
2023-02-25T09:53:54+00:00
شەفەق نیوز/ ئەحمەد موسا سەرۆک دامەزراو خێرخوازی بارزانی، ئمڕوو شەممە، راگەیان دامەزراوەگە کاروانەیلیگ زیاتر ئەرا دەسمیەتیداین زەرەدمەنەیل زەویلەرزەی ویرانکەر تورکیا و سوریا خستە ری.
موسا لە کۆنگرەیگ رووژنامەوانی وەگەرد کوهدار شیخو سەرپەرشتیار ناوچەی سەروەخوەی زاخۆ لە مەرز ئیبراهیم خەلیل ناودەوڵەتی وت: ئەوەسا دامەزراوەگە لە تەقەلای رەسانن دەسمیەتی ئەرا زەرەدمەنەیل تورکیا و سوریا وەردەوام بوود، و دووپات کرد ک دامەزراوەگە تەقەلای وەرگردن مووڵەت فەرمی دەێد ئەرا کارکردن لەناو ئەو دوو وڵاتە.
لەلای خوەییش، شیخو لەناو کۆنگرەگە وت: وەماوەی چوار رووژ توەنستیمن ٤٥ بارهەڵگر گەورە وە جویراجویر کەرەستەیل دەسمیەتی ئەرا زەرەدمەنەیل زەویلەرزەگە کل بکەیمن.
وەرحەیە، محمد مەولوود یاقوت قونسڵ تورکیا لە هەولێر، ڕووژ پەنجشەممەی گوزەشتە، راگەیان ک حکومەت و گەل هەرێم کوردستان زویترین و یەکەمین لایەن بوی ک رەسیە هاوار هاناڕەسین وڵاتەگی لەوەر ئەو زەویلەرزەی ویرانکەرە ک بویە هوکار کوشیان و زەخمداری زیاتر لە ١٥٠ هەزار کەس.
