ئایا دار هوکارە بوود؟

شەفەق نیوز/ کاچیا چیلبۆرگەر تۆێژینەوەی ئەوە کەێد، ئایا هوکارەکردن وەل دارەو سەرکەفێد جوور هوکارەکردن ئاژەڵ؟
تویەنیمن هوکارەی سەگیگ بکەیمن، وەختا چەپڵە ژنەفێد واتە خواردن دوینێدەو، کەم کەم، ئەگەر خواردنیش نەدوینێد، وەختا دەنگ چەپڵە ژنەفێد ورسگی بوود، ک چەپڵەگە بویە هوشدارییگ ئەرا خواردن، سەگەگە هوکارەبوی ک دەنگ چەپڵە واتە خواردن تیەێد. ئایا ئی فێڵە وەل دارەو سەرکەفێد؟
چ هوشدارییگ وەل دارەو وەکارباریمن؟
دار میموزا هەنای دەس دەێدە قەیەو گڵاگەی کرژەو بوود، ک نمونەی خاسیگە ئەرا ئی تاقیكاریە، کاچیا داریگ میموزا خستە ناو تاریکی، دویای ئەوە ژوورەگە روشن کرد، بەڵکم هویچ رەفتاریگ لە دارەگە دیار نەیا، ئمجا دەرزی چقانە ناو گڵآگانی، ودارەگە گڵاگانی کرژەو کرد، توێژینەرەگە ئی کارە چەن جاریگ دووبارە کەێد، روشن کردن، دەرزی چقانن، ئیجا تاریکەوکردن، دویای ئەوە روشنی کردەو وەبی دەرزی ‌چقانن، دارەگە گڵاگانی کرژەو کرد وە تەنیا روشنکردنەگە، دی وەبی ئەوە ک دەرزی وەکار بارێد، دیارە ک روشنکردنەگە لەلای دارەگە بویە هوشداری ئەرا دەرزیەگە، ئەیش تا دویای ماوەیگ دریژ دویای تاقی كردنەگە.
زانایل زیندەورزانی جیوازن لە رەسینەوەیان ئەرا ئی رەفتار دارە، بڕیگیان ئویشن ک کاچیا ئەرای نیە ئی کارە وەهوکارە بوین دارەگە دانەێد. لەلای باخەوانەیل خوەمان زانریاگە ک ئەگەر داریگ بەر نەگرێد، باخەوانەگە داسیگ گرێد وهەڕشە له‌ دارەگە دەێد، جوور؛ ئەی دارەگە ئەگەر بەر نەگرید بڕمەد، وفرە ناسریاگە ک ئەو دارە بەرگرێد، ئایا ئی هوکارە بویەو نەڕسیەسە زانایل زیندەوەری؟.