رویداویگ ئەڵاجەوی.. ماشینیگ لە بەرزی ٧٦ مەتر کەفێدە خوار و کەسیگ لەناوی نەمرد
تووڕ "سی ئێن ئێن" خەوەری ئەمریکی وت: رویداوەگە لە ناوچەیگ بویە وەناو «کناراو شەیتان» وە دویری ٣٨ کێلومەتر وەرەو باشوور سان فرانسیسکۆ لە بان رییگ وەگەرد کناراو زەریای ئارام.
بریان بوتینگر وەرپرس مقیەتیکردن شارگە لە ناوچەگە وت: فرە سەرسام بویمن هەنای زانستیمن ک کەسەیل ناو ماشینەگە لە مەرگ قورتار بوینە، ک ژن و پیاویگ وەگەرد دوو مناڵ ٩ و ٤ ساڵان لەناو ماشینەگە بوینە.
بوتینگر وتیش: رویداویگ لەی شوینە دەگمەن نییە، وەلێ چشتە دەگمەنەگە ئەوەسە کەسیگ لەیجویر رویداو مەرگباریگ قورتار بوود.
وەگورەی سی ئێن ئێن، ماشینەگە «تسێلا» لە ریەگە دەرچگ، و وەرپرسەیل وتنە؛ خوەیڕانستن ماشینەگە مەوقەی رویداوەگە نەخریاسە کار.
بوتینگر وتیش: ئەو زەرەدەیلە ک وە ماشینەگە رەسین نشان دەن ک ماشینەگە داگەسە چشتیگ ئیجا چەن پلیگ خواردیە تا لەبان پاچکەیلی بنیشێدەو.
دیاری کرد ک کەسەیل ناو ماشینەگە لە هووش خوەیان بوینە، وە هەلیکۆپتەر بەرزەو کریان، ئیجا بریانە خەسەخانە.
پولیس وت: ژن و پیاوەگە زەخمدار بوینە وەلی زەخمیان مەرگبار نییە، و دوو مناڵەگەیش هویچیان نییە.
