رۆمانووس ئیسپانی وەناوباگ کارلوس زافۆن ماڵئاوایی یەکجاری کرد

شەفەق نیوز/ میدیاگان و ماڵپەڕەیل توڕە کۆمەڵایەتیەگان، ئمڕوو جومعە، باس لە کۆچکردن دویایی کارلوس زافۆن کردن، لە تەمەن ٥٥ ساڵان، دویای ململانەیگ وەگەرد بیماری کانسەر.
رۆمانەیل زافۆن وە زیاتر لە ٤٠ زوان لە جهان بڵاو کریاگە، وزیاتر لە ٣٨ مەلیۆن چاپی فرووشیاگە، ودویا رۆمانەگەی ( سایکی هەوا) وەناوبانگییگ جهانی وەرگرد، ک یەکەمین رۆمانە لە زەنجیرە چوارینە رۆمانەگەی (قەورسان کتاوە لەهویرەو جگەیل) ک بیجگە ( سایکی هەوا)، ( وازی فریشتەیل)، (زیندانی ئاسمان) ، (کوماکەر گیانەیل) گرێدەو.
بڵاوکەرە ئیسپانیەگەی لە پرسەو سەرەخوەشی نووساد: ئمڕوو روژ فرە دڵتەنگیگە ئەرا تیم (بلانیتا) وەگشتی، ک ناسیدەی لە ماوەی ٢٠ کار وەلیا کرد، برادەرییگ دروس کریا ك لە بنەمای کارو پیشە رەدکرد.
بەیاننامەی بڵاوکەرە ئیسپانیەگە هەمیش وت: مردن زافۆن خوەی لەدەسچگن یەکیگ لە خاسترین رۆماننووسەیل هاوچەرخ جهانە، و لە قسەیگ لە رۆمانەگەی ( سایکی هەوا) لە بەیاننامەگە وەکار هاورد ک ئووشێد: هەر کتاویگ لەیرا دوینێد، خاوەن گیانیگە، گیان ئەوەگ نووسادێ، گیان ئەوەگ خوەنستێ، وئەوەگ ژیان کرد، و ئەوەگ خەو وەپیه‌و دی.