ئاهه‌نگ ئه‌را واين ساز ناكريه‌ێد

ئاهه‌نگ ئه‌را واين ساز ناكريه‌ێد
2017-11-22T21:54:00+00:00

شه‌فه‌ق نيوز/ ئويشن ك عه‌داڵه‌ت وه‌بى هه‌ق وه‌رده‌وام نادێ، نه‌يش عه‌داڵه‌ت وه‌ل ناهه‌قى، ئنكار له‌ موخالفه‌تكاره‌يل و دوشمنه‌يليش وه‌ل هه‌ق و عه‌داڵه‌ت يه‌كه‌و ناگرن، ئمجا ئايا ئه‌و عه‌داڵه‌ته‌ ك عراق وجوود ديرێد ماف كورده‌يل فه‌يلى و باقى پيكهاته‌يل و چينه‌يل تر وه‌ شيوه‌يگ خاستر زه‌مانه‌ت كردگه‌؟ هه‌ر كومه‌ڵگايگ ئه‌وه‌نه‌ى ئه‌وه‌گ گرينگى ئه‌ياده‌ هه‌ق هه‌ر ئه‌وه‌نه‌ وه‌ نسبه‌ت خوه‌ى جيوه‌جى ئه‌كا له‌ ئاشتى و ئاسايش فكرى و مقه‌يه‌تيكردن له‌ گيان و ماڵ و موڵك تاكه‌يلى، عراقيش وه‌بى ئى پێوه‌ره‌ هيمان دويره‌ له‌ ئاسايش و سه‌قامگيرى.

 

ديارده‌ى لاوردن موخاله‌فتكاره‌يل و دوشمنه‌يل له‌ فكر و رينمايى يه‌كيگه‌ له‌ كه‌موكوڕيه‌يل ژيان هاوبه‌ش، ك ئه‌گه‌ر ئاده‌ميزاد وه‌ل مه‌ردمه‌يل نه‌ژياتاد ئه‌وه‌ كيشه‌ى له‌ناوبردن موخالفه‌تكاريل و دوشمنه‌يليش په‌يا نه‌وێ! وه‌لێ ژيان هاوبه‌ش ناڵنێد وه‌ده‌س ئى كيشه‌ ك شايه‌ت تاكمه‌جاريگ خوه‌ى له‌ چوارچيوه‌ێ جه‌نگ و كاره‌يل تون و تيژێ بوينێده‌و. ئشاكرايشه‌ ك مه‌هانه‌ى زاڵبوين له‌بان موخالفكار و دوسمنيش شايه‌ت هووكار بدێ له‌ مه‌سه‌له‌ێ له‌ناوبردن نه‌ته‌وه‌ يا ده‌وڵه‌ت يا حزب يا جه‌ماعه‌ت يا كه‌س، يا له‌ناوبردن ئايين يا نه‌ريت كۆمه‌ڵايه‌تى يا رووشنهويرى گشتى و ئاشكرايشه‌ ك بيجگه‌ به‌رژه‌وه‌نديه‌يل ماددى يا مه‌عنه‌وى، ده‌سڵات و په‌روه‌رده‌يش رۆڵ كاريگه‌ر ديرن له‌ ئيچنه‌ جووريگ له‌ كرده‌وه‌يل و هه‌ڵسوكه‌فتيگ.

 

په‌نديگ عه‌ره‌بى هه‌س ئويشێد"هه‌ق ها وه‌ل به‌رنده‌"، ك جى داخه‌ له‌ساى ئاشووگه‌ره‌يل نسيو كه‌مهيزه‌يل له‌ خه‌ڵات و سزا ته‌نيا مه‌رگه‌! وه‌ نسبه‌ت ئيمه‌يش، دادگاى باڵاى تاوانه‌يل له‌ زويه‌و بڕيار له‌باره‌ى له‌ناوبردن وه‌جه‌م كورده‌يل فه‌يلى ده‌ركردگه‌، يه‌يش ئسپات ئه‌و ئه‌كا ك كورده‌يل فه‌يلى وه‌ تومه‌ت جياوازى له‌ڕاى يا دژ ده‌سڵات سياسى نومه‌تبار نه‌كرياگه‌ وه‌ شيوه‌يگ چه‌كدارى يا ته‌دبيركردن ئه‌را هه‌وڵ كوده‌تاكردن، ئه‌وانه‌كيش سزايان دريا هويچ چشتيگ تائيسه‌ له‌باره‌يانه‌و نازانيم بيجگه‌ ئه‌وه‌گ ك له‌وه‌ر هووكاره‌يل شه‌خسى نه‌ويه‌و بيجگه‌ ئه‌وه‌گ چشت كه‌ميگ له‌باره‌ى هووكاره‌يل گشتى وتريا وه‌ ئه‌وه‌گ جياوازى له‌ نه‌ته‌وه‌ يا مه‌زه‌و بويه‌!!

 

پرسيار له‌يرا ئه‌وه‌سه‌ ئه‌راچه‌ كه‌سيگ با لايه‌نيگ هه‌وڵ ته‌نديدى ئه‌كه‌ن و ئه‌و پاڵنه‌ره‌يله‌ چه‌ن له‌پشت ئى كار په‌يڕه‌وكرياێ و فكر هه‌ڵه‌؟ جوور په‌يڕه‌ويگ هه‌ميش له‌ ئه‌وساو ئيسه‌يش ئويشيم ئه‌راچه‌ كورده‌يل فه‌يلى هه‌وڵ نايه‌ن و ئه‌راچه‌ هاوار ناكه‌ن و ئه‌راچه‌ مراجعه‌ت ناكه‌ن و ئه‌راچه‌ نانويسنن و ناخوه‌نن و به‌شدارى له‌ چالاكيه‌يل ناكه‌و ئه‌راچه‌ حزب و ريكخرياگ هه‌يئه‌و كومه‌ڵه‌ دروس ناكه‌ن و ئه‌راچه‌ مونته‌داى رووشنهويرى و هونه‌رى و وه‌رزشى و ...هتد دانامه‌زرنن و كى نواگيرى له‌ليان ئه‌كاو كييش هانيان ئه‌ياد؟ ك بايه‌سه‌ وه‌رجه‌ گشت چشتيگ ده‌سكه‌فته‌يل ده‌سڵات بزانيم له‌ جيوه‌جيكردن بڕياره‌يل دادگاى باڵا و بڕياره‌يليگ تر ك ده‌ريانكردگه‌.

 

بيجگه‌ زوڵم سته‌مكارانه‌ ئمڕوو و دويه‌كه‌، كيشمه‌كيش و هه‌ڵويسه‌يل ناروشنيگيش وه‌رانوه‌ر يه‌كترى داشتيم و چشت ئاشكرا ئه‌وه‌سه‌ ك ئيچنه‌ ره‌فتاريگ بار قورسيگ بوى له‌بانمان و زه‌ره‌د گه‌ورايگ ره‌سانه‌ كيشه‌گه‌مان و ئاشكرايشه‌ مه‌ردمانيگ هناى هه‌وڵ زاڵبوين له‌بان موخالفكاره‌يليان ئه‌يه‌ن وه‌ چه‌ك تومه‌تباركردن و ناوزڕانن، ئه‌وه‌ وه‌و خاتره‌سه‌ ك تواناى چشتيگ گه‌وراتر له‌وه‌ نه‌يرێد نه‌ك ره‌حمكردن وه‌ وه‌رانوه‌ره‌گه‌ێ، ئمجا بيگومان دوشمنايه‌تيكردن و ناوزڕانن خزمه‌ت وه‌ كيشه‌گه‌مان ناكه‌ن و شايسته‌ نيه‌ بدێده‌ ه‌شيگ له‌ مێژوومان.

 

چه‌وديريكه‌ره‌يل ئاگادارن له‌وه‌گ كورده‌يل فه‌يلى هه‌وڵ ئه‌را گشت ئه‌وانه‌گ باس كريان دانه‌، ك هه‌رچه‌نى ئاكامه‌گه‌يشى وه‌و جووره‌ نه‌ويه‌، چوينكه‌ كه‌مى شاره‌زايى و ئه‌زموون و فريه‌يى دوسمنه‌يل و له‌ده‌سداين توانا و دريغيكرن و ئه‌نانيه‌ت هاوشيوه‌ى سه‌ركه‌فتن نيه‌! له‌لايگ تريشه‌و تائيسه‌يش زووانيگ هاوبه‌ش نيه‌ گشتلايگ بفامنه‌ى، يا وه‌ وه‌مانا مه‌جازيه‌گه‌ێ خاسترين نامه‌و پيشنيار و به‌رنامه‌يگ وه‌هه‌ر زووانيگ چه‌س ك پيشكه‌ش بكريه‌ێد؟ يه‌يش له‌ وه‌ختيگ ك عه‌ره‌بى و فارسى و توركى و زووان داڵگى وه‌ته‌نيا وه‌كارمان نايه‌ێد، چوينكه‌ نه‌وه‌يل غوربه‌ت و كووچ و زووان هاوبه‌ش نه‌يرن بفامن له‌يه‌كترى وه‌ئه‌وه‌گ بڵاو بوينه‌سه‌و له‌ وڵاته‌يل جياجياى جه‌هان!! له‌باره‌ى مه‌سه‌له‌ى تايبه‌ت وه‌ نه‌وه‌يل ناوخوه‌ييش ك جاڕس و سه‌رگه‌ردانن، فريه‌يى كاره‌سات ك هاته‌سه‌ تويشيان هويچ ده‌رفه‌تيگ وه‌پيان نه‌ياگه‌ ئه‌ياكه‌يان ده‌س بياده‌ ژير باڵ ئه‌واكه‌يان و ناتويه‌نن روێ وه‌روێ كار وه‌جه‌ميش بوونه‌و.

 

به‌رنامه‌ى به‌عس ئه‌وه‌ بوى ك له‌يوا له‌ليمان كرد هووكاره‌ى گشت جووره‌ ريه‌يل مه‌رگ بويمن و وه‌ ناهميبوين كۆمه‌ڵايه‌تى و سياسى و دويره‌وخستن و ده‌يان تومه‌ته‌يل تريش سه‌دان هه‌زار كورد فه‌يلى دويره‌و خست و هه‌زاران له‌ جايه‌ڵه‌يليان بيسه‌روشوون كرد.

 

ئاشكرايشه‌ له‌ مه‌يدان سياسى و هه‌ڵوژاردنه‌يليش ك ئه‌گه‌ر ماڵمان يه‌كه‌و نه‌خه‌يم و روێ له‌  په‌يوه‌نديه‌يليگ دوير له‌ تايفه‌چێتى و نه‌ته‌وه‌يى نه‌كه‌يم، ئه‌وه‌ ناتويه‌نيم ركابه‌رى بكه‌يم ئه‌را ده‌سخستن شماره‌يل ئاماده‌كرياێ له‌ڕێ له‌قه‌ب و باسكردن روێداگه‌يل و كاره‌ساته‌يل ك هاته‌ تويشمان و نه‌ك له‌ڕێ ئاژاوه‌كارى و ناوزڕانن و سووكايه‌تى وه‌ يه‌كترى، چوينكه‌ ئه‌گه‌ر عيبره‌ت وه‌ شماره‌ بوياتاد ئه‌وه‌ نه‌بايه‌د‌ ئه‌و ده‌نگه‌يله‌ مه‌حاڵ بوياتان ك وه‌ده‌س هاتن و ته‌نانه‌ت ئه‌وانه‌كيش چينه‌ ناو ركابه‌رى جوور سه‌روه‌خوه‌ى و به‌شدار بوون له‌ يه‌ك چشت، ئه‌ويش ئاهه‌نگسازيه‌‌ وه‌ واين!!

عه‌لى حسێن فه‌يلى

Shafaq Live
Shafaq Live