فه‌يليه‌يل كورد و پيكهاته‌ى فه‌يلى.. كى كى هه‌ڵوژنێد؟

فه‌يليه‌يل كورد و پيكهاته‌ى فه‌يلى.. كى كى هه‌ڵوژنێد؟
2018-05-05T17:54:00+00:00

به‌ش دويه‌م

شه‌فه‌ق نيوز/ سياسه‌ت چه‌ن روييگ ديرێد، وه‌لێ ئه‌وانه‌گ روييه‌ خراوه‌گه‌ێ وه‌كار ئه‌يه‌رن كه‌م نيين، هه‌رچه‌نى واريگ يا كرده‌وه‌يگ نيه‌ بتويه‌نێد خوه‌ى له‌ بازنه‌ى ره‌خنه‌ ده‌ربكاو ئاسته‌يل پرس و پرسكارى و مه‌زه‌نه‌يل له‌خوه‌يه‌و بكا، وه‌لێ ئه‌و داراييه‌ مه‌زنه‌ كريا ك له‌بان دعايه‌ى ته‌سفيركردن و وه‌كنارخستن يه‌كترى خه‌رج كريا له‌ هه‌ڵوژاردنه‌يل ئمساڵ و خه‌رجكردن له‌بانى وه‌ ده‌يان مليۆن دۆلار، له‌يرا پرسيار ئه‌وه‌سه‌ ئه‌و داراييه‌ چه‌نيگه‌ ك ه‌رخان كريا ئه‌را ويرانكردن ماڵ فه‌يلى؟!

 

ئيمه‌ هايم له‌و باوه‌ڕه‌ ئه‌وانه‌گ كورسييگ كۆتا ته‌رخان كردن ئه‌را كورده‌يل فه‌يلى له‌ ئه‌نجومه‌ن نوێنه‌ره‌يل عراقى، ئه‌وانه‌ خاوه‌ن ده‌يان كورسيين و ئاماده‌ نيين قوربانى وه‌ى ته‌نيا كورسيه‌ بيه‌ن، وه‌لێ هه‌وه‌جه‌ وه‌ ئه‌وه‌ ديرن ركابه‌رى هووكارى بوێ ئه‌را وه‌ده‌سهاوردن ئى ته‌نيا كورسيه‌ ك حاڵه‌تيگ له‌ چويچيان و ناڕه‌حه‌تى دروسكرد له‌ناو ماڵ رووڵه‌يل ملله‌ت ك ناڵنيد وه‌ده‌س ده‌يان كيشه‌ى بى كووتا.

 

تا ئمڕوو، وه‌ل ئه‌و هه‌مگه‌ كيشه‌و مه‌ينه‌تيه‌يله‌ ك هاته‌سه‌ تويشمان، كيشه‌يل مه‌سه‌له‌ى ناسنامه‌ى نه‌ته‌وه‌ وه‌و گرنگييه‌و نيه‌ تا په‌ره‌يليگ يا دوسيه‌يگ ئه‌راى واز بكه‌يم. يه‌يش عوزره‌و ده‌روين تيه‌رێده‌ له‌رزه‌ وه‌ ئه‌ه‌گ ملله‌تيگ تويش سزاو له‌ناوبردن وه‌جه‌م باێد له‌لايه‌ن نه‌ياره‌يلێ له‌ى هه‌ڵوژاردنه‌يله‌ وه‌ بوونه‌ى داشتن چه‌ن زاراوه‌يگ و ئايين و مه‌زه‌وه‌يل جوراوجوور.

 

پرسيار ئه‌وه‌سه‌، ئايا ناسنامه‌ى نه‌ته‌وه‌يى ئنسانى فه‌يلى هالاى عه‌ره‌ب يا لاى كورد؟ ئه‌وانه‌يش ك جوور پيكهاته‌يگ يا نه‌ته‌وه‌يگ جيا له‌ كورد قسه‌ له‌بانمان ئه‌كه‌ن ئمڕوو كه‌من، وه‌لێ وه‌ ئاشكرا فكره‌يليان خه‌ڵه‌تانن نه‌فره‌تكرياگيگه‌ قسه‌ له‌و له‌ناوبردن وه‌جه‌مه‌ ئه‌كا ك جيوه‌جى كريا وه‌خاتر فه‌وتانن لاشه‌و خاك و ژيانمان، ئه‌و فكره‌يشه‌ له‌وه‌ر خاتر له‌ناوبردن هه‌ر شوونه‌واريگ نه‌ته‌وه‌ييمان جيوه‌جێ ئه‌كريه‌ێد، ك يه‌يش مه‌سه‌له‌يگ هاورياگه‌ له‌بان بنه‌ماى ته‌كليفكردن ئه‌و ده‌وڵه‌ته‌و هاتگه‌ ك ملله‌ت خوه‌ى له‌لى بترازيه‌ێد دگان وه‌ هويچ ملله‌تيگ تر نانه‌ێد، ك وه‌ ئاسانى ناسناو و هووزه‌يليان و نه‌ته‌وه‌يليان وه‌ليا ئاڵشت ئه‌دێ وه‌ ته‌نيا تيكه‌ڵبوينيگ، ئمجا له‌بان هه‌مان هاوكيشه‌يش هويچ عه‌ره‌بييگ وه‌ كورد نادێ، وه‌لێ مه‌سه‌له‌يگ پيشبينيكرياگه‌ هه‌زاران و بگر زياتريش كورد بوونه‌ عه‌ره‌ب.

 

وه‌ل ئه‌وه‌يشا ك هه‌رچه‌نى كۆمه‌ڵگاى عراقى پيكهاتگه‌ له‌ چه‌ن پيكهاته‌يليگ نه‌ته‌وه‌يى و له‌ يه‌ك بازنه‌ى سياسى ژيه‌ن، وه‌لێ تيكه‌ڵ نيين و له‌ناو يه‌كترى نه‌تاويانه‌سه‌و، يه‌يش وه‌و مانا تائيسه‌ ئى وڵاته‌ ئه‌و شوونه‌ نيه‌ ئه‌را گشتلايگ يه‌ك قه‌زان بخوه‌ن و بوونه‌ يه‌ك ملله‌ت، به‌ڵكوو وه‌چه‌واشه‌وه‌، ئه‌و شوونه‌ ك نه‌ته‌وه‌ى گه‌وراتر له‌تى بدێ هه‌وڵ سزانن ملله‌ته‌يل تر ئه‌ياد تا بوونه‌ خوه‌ڵه‌كوو و هويچ ئه‌سه‌ريگيان نه‌مينێد.

 

ئيمه‌يش له‌ بارودوخ ئاسايى لێدوانه‌يل هاوشيوه‌ى كه‌ميگ ئه‌ژنه‌ويم له‌باره‌ى فه‌يليه‌يل ك باس له‌ داوڕيان نه‌ته‌وه‌يى ئه‌كا وه‌شيوه‌يگ ئاشكرا جوور ئه‌وه‌گ وه‌رانوه‌ر شه‌به‌ك و ئێزيديه‌يل روێ دا و ئاماژه‌ وه‌ ئه‌وه‌ ئه‌كا ئه‌وانه‌ كورد نيين. له‌ مه‌يدان سياسييش تيكڵايلا و ئاڵشتكارى به‌ره‌و سه‌نگه‌ره‌يل و دابه‌شكردن تومه‌ت و ناسناوه‌يل خراو له‌و مه‌سه‌له‌يله‌ بوێ ك روێ ئه‌ياد، ته‌نيا مه‌گه‌ر ره‌فيقه‌يلمان دريغيكه‌ر و كه‌مفام بوياتان، ك دوشمنه‌يلمان زيره‌ك و خراو بوياتان، چوينكه‌ ئيچنه‌ لێدوانه‌يليگ له‌ليانه‌و ده‌رنه‌چێ له‌ هه‌ر حاڵه‌تيگ وه‌رانوه‌ر هه‌ر پيكهاته‌يگ عه‌ره‌ب و هويچ سياسه‌تيگيش هاوشيوه‌ له‌ دژيان وه‌كار ناوريا.

 

بيگومان هه‌رسێ خوله‌يل وه‌رين هه‌ڵوژاردنه‌يل وه‌خاتر وه‌ديكردن عوزر له‌وه‌ر ئه‌وه‌گ كانديده‌يلمان ده‌نگ وه‌ده‌س ناوردن، وتيان شماره‌ى ئه‌و فه‌يليه‌يله‌ ك به‌شدارى نه‌كردنه‌ له‌ هه‌ڵوژاردن زياتر بويه‌ له‌ شماره‌ى به‌شدار بويه‌يل. يه‌يش ماناى ئه‌وه‌سه‌ ئه‌وانه‌ جاڕس بوينه‌ له‌ ئاڵشتكارى و دريغى كردنه‌ وه‌رانوه‌ر گرنگى به‌شدارى، وه‌لێ له‌ى هه‌ڵوژاردنه‌يل ئيسه‌ كيين ئه‌و كانديده‌يل كورد فه‌يليه‌ ك وه‌شيوه‌يگ راسه‌وخۆ به‌شدارن يا فه‌يليين و كانديدن له‌بان ليسته‌يل جياجيا؟! كيين ئه‌وانه‌گ مه‌شق سياسه‌ت ئه‌كه‌ن له‌وه‌ر وه‌ده‌سهاوردن ماف و سه‌قامگيرى زياتر وه‌بى ئه‌وه‌گ له‌ كيشه‌يلمان زياێ بكه‌ن؟ بيگومان ئه‌و فه‌يليه‌يله‌ ك له‌بان ليسته‌يل تر خوه‌يان كانديد كردنه‌ ئه‌و كاره‌ له‌وه‌ر هووكاره‌يل سياسى و فكره‌يل گشتگير و فراوانكردن مه‌رز كانديد كردنه‌، وه‌لێ مه‌سه‌له‌ى "پيكهاته" له‌خوه‌يان نه‌گرتنه‌.

 

ئى كيشه‌ له‌وانه كه‌فته‌و ك ده‌نگده‌ره‌يل فه‌يلى وه‌ ته‌نيا كورسييگ كۆتاييگ ئه‌گرنه‌ ئامانج ئه‌را ئه‌وه‌گ گشت هه‌وڵ و ته‌قلايگ و گشت ئوميديگ نه‌يلن ئه‌را يه‌كخستن ماڵ فه‌يلى!!

عه‌لى حسێن فه‌يلى

 

Shafaq Live
Shafaq Live