ئيمارات هه‌وڵ په‌يوه‌ندێ خاستر ئه‌ياد وه‌ل موقته‌دا سه‌در
شه‌فه‌ق نيوز/ ئيمارات عه‌ره‌بى مه‌يل خوه‌ێ ده‌رخست له بته‌وكردن په‌يوه‌نديه‌يل وه‌ل عراق له‌ڕێ گفتگووه‌يلى وه‌ل موقته‌دا سه‌در پياو ئايينى شيعه‌ێ عراقى له چوارچيوه‌ێ هه‌وڵه‌يل ده‌وڵه‌ته‌يل سنى له خوه‌رهه‌ڵات ناوين له‌وه‌ر ته‌حجيمكردن نفوز ئيرانى له ناوچه‌گه.
ياوه‌ريگ پايه‌به‌رز سه‌در ئاشكراێ ئه‌وه كرد ك محه‌مه‌د بن زايد ئالنهه‌يان وه‌لى عه‌هد ئه‌بو زه‌بى و جيگر سه‌ركرده‌ێ هيزه‌يل چه‌كدار له ئيمارات دانيشتنيگ وه‌ل سه‌در له ئه‌بو زه‌بى ئه‌نجام داگه.
سه‌در بيجگه ئه‌وه‌يش وه‌ل يه‌كيگ له گه‌ورا پياوه‌يل ئايينى له ئه‌بو زه‌بى باس له ڕيه‌يل خاسه‌وكردن ره‌سينه‌وه له‌ناونى شيعه‌و سونى كرد.
ئيمارات يه‌كيگه له‌و ده‌وڵه‌ته‌يل سنيه ك ئحساس وه هه‌ڕه‌شه ئه‌كا له زيايبوين نفوز ئيران له ناوچه‌گه ك له‌ڕێ جه‌ماعه‌ته‌يل شيعه‌ێ هاوپه‌يمان وه‌ليا له عراق و لوبنان ده‌ركه‌فێد.
نويسينگه‌ێ سه‌در له به‌غدا له به‌ياننامه‌يگ له‌بان ماڵپه‌ڕه ئه‌لكترۆنيه‌گه‌ێ باس له دانيشتنگه‌ێ وه‌ل ئه‌حمه‌د كوبه‌يسى پياو ئايينى كرد و وت: هه‌ردوگلا جه‌خت له‌بان گرينگى كاركردن وه رووح ئسلامى ره‌سه‌نيگ و دويرخستن تون وتيژى و فكر تونڕه‌وانه كردنه وه‌ل به‌رزه‌وكردن ده‌نگ راسى وه‌شيوه‌يگ فراوانتر له لاوردن گرژيه‌يل تايفى ك هاته‌سه تويش ناوچه‌گه‌و جه‌هان.
ئاژانس روێته‌رز بريتانييش وت: له‌باره‌ێ نزيكه‌وكردن په‌يوه‌نديه‌يليش وه‌ل سه‌در ك لايه‌نگره‌يلى پيكهاتنه له مه‌ردم فه‌قير ده‌ورگرد به‌غدا و باشوور عراق، بايه‌سه له‌بان ده‌وڵه‌ته‌يل سنى ده‌سميه‌ت بيه‌ن له‌بان كه‌مه‌وكردن ده‌سڵات ته‌هران له‌بان شيعه‌ێ عراق و له‌خوه‌يگرتن نفوزێ.
ئيمارات و سعوديه‌و مسر و به‌حره‌ين په‌يوه‌ندى وه‌ل قه‌ته‌ر بڕين له 5 حزه‌يران و تومه‌تبارێ وه ته‌مويل ترۆر و ده‌خاڵه‌تكردن له كاروبار ده‌وڵه‌ته‌يل عه‌ره‌بى و نزيكه‌وبوين له ئيران كردن.
سه‌در يه‌كيگه له‌و سه‌ركرده‌يل كه‌م شيعه له عراق ك له دويرێ ماوه‌يگ وسيه‌ن له مامڵه‌كردن وه‌ل ئيران. له مانگ نيسانيش يه‌كه‌مينن سه‌ركرده‌يگ شيعه‌ێ عراقى بوێ داوا له به‌شار ئه‌سد سه‌رۆك سوورێ كرد واز له ده‌سڵات بارێد و ناكووكييشى وه‌ل ئيران ده‌رخست و وه‌ل ئه‌و جه‌نگاوه‌ره‌يليشه ك حكومه‌ت سوورێ پشتگيرى له‌ليان ئه‌كا.
وه‌ل ئه‌وه‌يشا ئاژانس هه‌واڵه‌يل ئيماراتى له زووان وه‌لى عه‌هد ئه‌بو زه‌بى باس له قسه‌يل سه‌در كرد ك وتگه: ئه‌زموون ئه‌وه نيشانمان داگه ك هه‌ميشه بانگه‌واز ئه‌وه بكه‌يم عه‌ره‌ب و موسڵمانه‌يل نه‌ێده يه‌كه‌وه‌و حاشا له چويچيان و به‌شبه‌شبوين بكه‌يم.
سه‌ردانه‌گه‌ێ موقته‌دا سه‌در سه‌ركرده‌ێ عراقى دوياێ دو هه‌فته بوێ له سه‌ردان سعوديه ك چه‌وێ كه‌فته مير محه‌مه‌د بن سه‌لمان وه‌لى عه‌هد ئه‌و وڵاته و له‌ى باوه‌تيشه‌و نويسينگه‌ێ سه‌در وت: ئه‌و ديداره ريككه‌فتنيگ له‌بان شيه‌وكردن وه‌به‌رهاوردن ئه‌گه‌ركرياێ له‌لێ كه‌فته‌سه‌و له ناوچه‌يل شيعه‌نشين له باشوور عراق.
سه‌در ئاشكراێ برياريگ سعودييش كرد وه وه‌خشين بڕ 10 مليۆن دۆلار ئه‌را ده‌سميه‌ت عراقيه‌يل كووچبه‌ر ك وه بوونه‌ێ جه‌نگ ريكخرياگ ترۆريستى داعش كووچ كردنه وه ئه‌وه‌گ ئه‌و بڕه پويله بدريه‌ێده حكومه‌ت عراقى.
له حزه‌يران گوزه‌يشتيش به‌غدا و رياز له‌بان ئه‌وه ريككه‌فتن ك هه‌ردوگلايان ئه‌نجومه‌نيگ ريكخستنكار دامه‌زرنن له چوارچيوه‌ێ هه‌وڵه‌يل ئه‌را خاسه‌وكردن په‌يوه‌نديه‌يل.
سعوديه‌يش باڵوێزخانه‌گه‌ێ له به‌غدا له‌ساڵ 2015 واز كرد دوياێ به‌ساننى ئه‌را ماوه‌ێ 25 ساڵ وعادل جبه‌ير وه‌زير خارجيه‌ێ سعودييش له مانگ فبرايه‌ر/ شووبات سه‌ردان ده‌گمه‌نيگ ئه‌را به‌غدا ئه‌نجام دا.
