داعش نويسينگه‌ى هاوسه‌رگيرى دويه‌ته‌يل و بيوه‌ژنه‌يل واز كرد
له‌ى باوه‌ته‌و، عه‌لى مورته‌زا ك ته‌مه‌نى 44 ساڵه ئويشێد: ريكخرياگ داعش له‌ڕى ئى نويسينگه‌يله‌و ناو فريه‌يگ ئه‌و مه‌ردمانه ئاشكرا ئه‌كا ك مه‌يل هاوسه‌رگيرى ديرن وه‌ل كار وپيشه‌و ته‌مه‌نيان، له هه‌ردوگ ره‌گه‌ز و تائيسه‌يش شماره‌ى ئه‌و ئافره‌ته‌يله ك ناو خوه‌يان تۆمار كردنه له‌ى نويسينگه‌يله ره‌سيه‌سه نزيكه‌ى 506 ئافره‌ت، ك له‌ليان هه‌ن كارمه‌ند و له‌ليانيش بيوه‌ژن و ته‌لاقدرياگ و ئه‌وانه‌گ مه‌يل شويكردن ديرن له هه‌ر جايه‌ڵيگ موسڵى.
مورته‌زا باس له تۆماركردن ناو ئه‌و دويه‌ته‌يليشه كرد ك سووكايه‌تى وه‌پيان ئه‌كريه‌ێد له‌لايه‌ن چه‌كداره‌يل داعش وه بوونه‌ى ناپووشه‌ته‌يى و نه‌پووشانن جنگ ئسلامى و يه‌يش ده‌رخست ك زوورم ئه‌وانه‌گ مه‌يل هاوسه‌رگيرى ديرن ئه‌تويه‌نن له‌ڕى ئى نويسينگه‌يله‌و ناو خوه‌يان تۆمار بكه‌ن.
نوريه ياسين ته‌مه‌ن 33 ساڵان ك بيوه‌ژنيگه و دايگ مناڵيگ دو ساڵانه و نيشته‌جى ناوچه‌ى ئه‌لمه‌يدانه له‌ناوڕاس موسڵ باس له‌وه ئه‌كا ك نويسينگه‌ى ئسلامى داعش هاوسه‌رگيرى له‌بانى چه‌سپانگه له يه‌كيگ له چه‌كداره‌يلى ك ته‌مه‌نى 59 ساڵه، وه‌لى نوريه وه قسه‌ى خوه‌ى ئى هاوسه‌رگيريه ره‌ته‌و كردگه‌و له ئاكام ئه‌وه‌يش وه‌رپرس نويسينگه‌گه ناڕازى بويه له‌بان ئه‌و ره‌ته‌وكردنه‌و وتگه بايه‌سه مناڵه‌گه‌ديش بخه‌ێده خانه‌ى په‌روه‌رده‌ى مناڵه‌يل.
نوريه ناچار بويه دوياى هه‌ڕه‌شه‌و گوڕشه‌ى فريه‌يگ ره‌زامه‌نى نيشان بيه‌ێد نه‌وه‌ك بيبه‌ش بكريه‌ێد له مناڵه‌گه‌ى و هه‌ر وه‌و خاتريشه وه ناچارى شوى وه‌پى كردگه له‌ڕى ئمزاكردن ماره‌نامه‌يگ له‌لايه‌ن دادوه‌ر شه‌رعى داعش وه‌و مه‌رجه ك هاوسه‌رى بدێ تا وه‌خت مه‌ندنى له ولايه‌ت نه‌ينه‌وا.
له‌ميا تارق ك يه‌يش كارمه‌نده ك ناچار بوى ناو راسكانى خوه‌ى ئاشكرا بكا و كارمه‌نده له وه‌ڕيه‌وبه‌رايه‌تى شاره‌وانيه‌يل نه‌ينه‌وا باس له‌وه ئه‌كا ك ريكخرياگ داعش هاوسه‌رگيرى نزيكه‌ى 22 ژنه كارمه‌ند ئمزا كردگه له‌ژير فشار و هه‌ڕه‌شه له شار موسڵ له‌ڕى ئه‌و نويسينگه‌يل خراوه ك ناچار دويه‌ته‌يل موسڵى ئه‌كا له‌بان ئه‌نجامداين پرووسه‌ى هاوسه‌رگيرى له چه‌كداره‌يل ريكخرياگه‌گه يا كه‌سه‌يل تر له‌وانه‌گ مه‌يل هاوسه‌رگيرى ديرن و ناو خوه‌يان ئه‌را ئه‌و مه‌رامه تۆمار ئه‌كه‌ن له‌ى نويسينگه‌يله.
له‌ميا ئاماژه وه ئه‌وه كرد ك په‌نج دويه‌ت له‌وانه‌گ وه‌ناچارى پرووسه‌ى هاوسه‌رگيرى وه‌پيان كرياگه هه‌وڵ واين دانه ئه‌را شوونه‌يل تر، وه‌لى له‌لايه‌ن چه‌كداره‌يل داعشه‌و ده‌سگير كريانه‌و حاڵ حازر خرانه‌سه زيندانه‌يل و چاره‌نويسيان نادياره.
ده‌يه‌ها نويسينگه‌ى هاوسه‌رگيرى له شار موسڵ واز بويه ئه‌را دويه‌ته‌يل موسڵى و بيوه‌ژنه‌يل و ته‌ڵاقدرياگه‌يل وه فه‌رمان ده‌وڵه‌ت ئسلامى داعش وه‌خاتر وه‌شويداين گه‌ورا دويه‌ته‌يل له ولايه‌ت نه‌ينه‌وا و ژنخوازين فريه‌ترين چينيگ له چه‌كداره‌يليان و هاوسه‌رگيريكردنيان له ژنه موسليه‌يل.
هه‌ر وه‌ى خاتريشه حاجه مه‌حمود سه‌لمان به‌گ ك ته‌مه‌نى 60 ساڵه، ره‌خنه له‌ى جووره هاوسه‌رگيريه و ناچاريه گرت ك چه‌كداره‌يل ريكخرياگ داعش چه‌سپننه‌ى له‌بان دويه‌ته‌يل و بيوه‌ژنه‌يل موسڵى و دويه‌ته جوانه‌يل ئه‌و شاره ك كه‌فتنه‌سه ده‌س ئه‌و ريكخرياگه.
سه‌لمان به‌گ باوه‌ڕى ئه‌وه‌سه ك ريكخرياگ ترۆريستى داعش له‌ڕى وازكردن ئى نويسينگه‌يله ژن ئه‌را چه‌كداره‌يلى بخوازێد له‌و دويه‌ته‌يل جايه‌ڵ جوان موسڵه وه‌خاتر زه‌مانه‌تكردن مه‌ندنه‌وه‌ى خوه‌يان له شاره‌گه وه‌تايبه‌ت له‌شوون ئه‌وه‌گ سه‌دان له‌ليان واين و شوونه‌گه هيشتنه‌جى وه‌رجه چه‌ن مانگيگ، ك يه‌يش يه‌كيگه له هووكاره‌يل ئى مه‌سه‌له، وه‌لى سه‌لمان به‌گ ئويشێد ئى مه‌سه‌له‌ى ئه‌را دويه‌ته‌يل موسڵ كاريگ رخه‌وبه‌ر و مه‌ترسيداره.
وه‌ل ئه‌وه‌يشا زوورم دويه‌ته‌يل و بيوه‌ژنه‌يل و ته‌لاقدرياگه‌يل ره‌خنه له‌ى جووره شيواز هاوسه‌رگيريه ئه‌گرن ك بكه‌فنه ژير هه‌ڕه‌شه‌ى وه‌رده‌وام و داوا له حكومه‌ت ناوه‌ندى به‌غدا كردنه وه زويترين وه‌خت قورتاريان بكا له‌ده‌س زوڵم و سته‌م داعش.
