ده‌رچگن يۆنان له ناوچه‌ی يۆرۆ
ئابووريناسه‌يل باوه‌ڕيان ئه‌وه‌سه يۆنان سيناريۆی فريه‌يگ ديريد له حاڵه‌ت ده‌رچگنی له ناوچه‌ی يۆرۆ و ئاڵشتبوين له سكه‌ی ئۆرپی ئه‌را "دراخما"، وه‌ل ئه‌وه‌يشا كه‌سه‌يليگ له‌يوا دوينن ك داوه‌زين نرخ خه‌رجكردن دراخما ڕی وه يۆنان ئه‌ياد له كلكرده‌يلی فيشتره‌و بكاو په‌ره پيه‌يده كه‌رته‌يل زينگ له ئابووری جوور كه‌رت گه‌شتوگوزار، يه‌يش وه ئه‌وه‌گ ك پويل خه‌رج نزم هان گه‌شتيار ئه‌ياد له جه‌هان يۆنان جوور وڵاتيگ گه‌شتياری هه‌ڵوژنن.
داوه‌زين نرخ خه‌رجكردن دراخمايش ئه‌دێده ده‌سميه‌تده‌ر له زيايكردن توانای ركابه‌ری ئه‌را كاڵايه‌يل يۆنانی له‌بان كاڵايه‌يل ئۆرپی، ك يۆنانيش ناوداره وه داشتن روين زه‌يتوون و يه‌يش ركابه‌ری تيژيگ دروس ئه‌كا ئه‌را روين زه‌يتوون ئيتاڵی و ئسپانی.
دوياخريش گله‌وخواردن ئه‌را دراخما شايه‌ت په‌ره بياده ئابووری يۆنانی دويای ئه‌وه‌گ يۆنان زويتر ناچار بوی سياسه‌ت ئابووريه‌گه‌ی بگونجنيد وه‌ل سياسه‌ت كزه‌وكردن و داوه‌زاننی ك له‌لايه‌ن ده‌وڵه‌ته‌يل قه‌رزده‌ره‌و چه‌سپيا له‌بانی له‌چوارچيوه‌ی به‌رنامه‌ی وه‌هاناڕه‌سين ئابووری.
بيجگه ئه‌وه‌يش ده‌رچگن يۆنان له ناوچه‌ی يۆرۆ ئه‌دێده مايه‌ی گه‌شه‌كردن بازاڕ موڵك و موڵكه‌يل عه‌قاری له وڵات، ئه‌ويش وه بوونه‌ی داوه‌زين نرخ پويل بيگانه له بازاڕه‌يل و له‌لايگ تريشه‌و هاتنه‌وه‌ی دراخمايش كاريگه‌ری خراو په‌يا ئه‌كا وه بوونه‌ی به‌رزه‌وبوين خه‌رج چه‌وڕيكردياگ داهات و له‌وانه‌يش نه‌فت و غاز و پيشه‌سازيه‌يل قورس.
يۆنان له دانيشتنه‌يلی وه‌ل ئۆرپيه‌يل جوور خنكياگ مامڵه ئه‌كاو ئه‌را يه‌يش نه‌ف له مه‌ترسی سه‌ركرده‌يل يه‌كێتی ئۆرپی وه‌رئه‌گريد له ده‌رگن ئه‌سينا له‌ناوچه‌ی يۆرۆ و هه‌ر وه‌و خاتريشه چه‌وديره‌يل پيشبينی ئه‌وه ئه‌كه‌ن ك فريه‌يگ له كومپانيا و كارخانه‌يل له كار بكه‌فن له‌وه‌ر داوه‌زين نرخ پويل نيشتمانی دراخما ك بڕه‌سيده ٤٠%.
مه‌ترسه‌يل تر پيشبينيكرياگ له حاڵه‌ت ده‌رچگن يۆنان له‌ناوچه‌ی يۆرۆ ئه‌وه‌سه ك نواگيری قه‌رز له وه‌به‌رهاوه‌ره‌يل بكريه‌يد و خه‌رج ئه‌و قه‌رزه‌يليشه به‌رزه‌و بدێ، يه‌يش بيجگه مه‌ترسيه‌يل تر ئابووری و سه‌رمايه‌داری.
له‌باوه‌ت قه‌رزه‌يل سيادی يۆنانيش، شماره‌يگ له ئابووريناسه‌يل باوه‌ڕيان ئه‌وه‌سه ك يۆنان ٢٤٠ مليار يۆرۆ قه‌رزاره ئه‌را سه‌ندووق نه‌خت ناوده‌وڵه‌تی و پابه‌ند نادێ له داينه‌وه‌ی، وه‌ل ئه‌وه‌يشا پيشبينی يه‌يش ئه‌كه‌ن مه‌سه‌له‌ی كووچكردن وه‌رده‌وام ئه‌را وڵاته‌يل ئۆرپی زيای بكا وه‌خاتر گه‌ردين له‌شوون ده‌رفه‌ت كار خاستر، ك هه‌رچه‌نی كووچكردن ده‌سميه‌ته ئه‌را كه‌مه‌وكردن ئه‌و فشاره‌يل كومه‌ڵايه‌تيه ك له‌ئامام بيكاريه‌و په‌يا ئه‌دێ، وه‌لی كيشه ئه‌را وڵاته‌گه دروس ئه‌كا ئه‌را ماوه‌ی دريژيگ له‌ڕی له‌ده‌سداين چالاكيه‌يل نيشتمانی.
هه‌ر له‌وه‌ر ئه‌وه‌يش سه‌ركرده‌يل ناوچه‌ی يۆرۆ هه‌وڵ ئه‌يه‌ن مقه‌يه‌تی له هه‌ڵويست و توانای خوه‌يان بكه‌ن له دانيشتن وه‌ل يۆنان ك ماوه‌يگ تر له‌ڕی راپرسييگ ئه‌را وه‌رگرتن يا ره‌ته‌وكردن مه‌سه‌له‌ی ده‌رچگن يۆنان له ناوچه‌ی يۆرۆ ساز ئه‌كريه‌يد له‌باوه‌ت مه‌سه‌له‌ی كزه‌وبوين ئابووری يۆنان، ك يه‌يش هه‌ڕه‌شه‌يگه ئه‌را چويچيان يه‌كێتی ئۆرپا ك كه‌سه‌يليگ باوه‌ڕيان ئه‌وه‌سه وه‌رگه‌ی داوه‌زين دارايی ناگريد.
ج . أ
