زياتر له 30 ساڵه‌ ماڵه‌گه‌ى كرده‌سه‌ مه‌نزڵگاى ماره‌يل

زياتر له 30 ساڵه‌ ماڵه‌گه‌ى كرده‌سه‌ مه‌نزڵگاى ماره‌يل
2019-08-28T21:18:08+00:00

شه‌فه‌ق نيوز/ عه‌بدولستار ئه‌مين ته‌مه‌ن (55 ساڵ) ساڵه‌يل دوير و دريژيگه‌ خى داسه‌ په‌روه‌رده‌كردن ئاژه‌يل ده‌يشته‌كێ ك هه‌رچه‌نى مه‌ترسيدارنيش، ك وه‌و خاتريشه‌ ماڵه‌گه‌ى له‌ شار دهۆك له‌ هه‌رێم كوردستان عراق ئاڵشت كردگه‌ ئه‌را مه‌نزڵگاى ماره‌يل.

 

ئه‌مين فريه‌ خوه‌شاڵه‌ ئه‌را ئى پيشه‌ ك زياتر له‌ 30 ساڵه‌ وه‌پيه‌و خه‌ريكه‌و شماره‌ى ماره‌يل له‌لاى بويه‌سه‌ 40 مار و باس له‌وه‌يش ئه‌كا ك په‌يوه‌ندييگ سووزدارێ وه‌ليانا ديرێد.

 

ئه‌مين ئويشێد: من له‌ساڵ 1984ه‌و هه‌ر له‌ سه‌رده‌م جايه‌ڵييم تائيسه‌ خه‌ريك په‌روه‌رده‌كردن ماره‌يلم له‌ ماڵه‌گه‌ى خوه‌م و دوياى ئه‌وه‌يش ك ژن خوازيم و مناڵيش ئه‌رامان بوێ، هووكاره‌ێ مناڵه‌يلميش كردم له‌بان وازيكردن وه‌ل ماره‌يل وه‌بى ئه‌وه‌گ رخيان له‌ مار بچێد.

 

ئى پياو په‌نجا ساڵانه‌ ئويشێد: مار ته‌نيا هه‌ر وه‌ ناوه‌گه‌ى رخه‌وبه‌ره‌، وه‌لێ ئه‌را من له‌يوا نيه‌ و مه‌ترسيى له‌بان من كه‌متره‌ تا مه‌ردمان تر، من خوه‌شيان توام و گشت ئه‌ندامه‌يل خيزانه‌گه‌ميش خوه‌شيان له‌ مار ئه‌يه‌ێد و وازى وه‌ليانا ئه‌كه‌ن و هويچ وه‌ختيگ وه‌پيان ناڕه‌حه‌ت نيه‌ون.

 

ئه‌مين زياتر وت: ماره‌يل ته‌نيا له‌ غورفه‌يگ نامينن، به‌ڵكوو وه‌ناو مه‌ڵه‌گه‌يا گه‌ردن و من زياتر له‌ 35 مار ديرم و له‌يوا ئحساس ئه‌كه‌م فريه‌ وه‌پيانه‌و په‌يوه‌سم.

 

وه‌ل ئه‌وه‌يشا وت: من ئى ماره‌يله‌ له‌گشت شوونه‌يليگ جه‌مه‌و ئه‌كه‌م و جارجاريگيش كه‌سه‌يليگ ئاگادارم ئه‌كه‌ن ك مار له‌ ماڵ ديرن و ترسيه‌ن له‌لى و ئه‌خوازن له‌لى قورتار بوون، ئمجا وه‌و خاتريشه‌ په‌يوه‌ندى وه‌پيمه‌و ئه‌كه‌ن و قورتاريان له‌لى ئه‌كه‌م.

 

ئى پياوه‌ باس له‌وه‌يش ئه‌كا ك هه‌فته‌ى دوجار گووشت ئه‌خاده‌ وه‌رده‌م ماره‌يلێ و خوه‌راكيان ئه‌ياد.

 

دوياجار ئه‌مين وت: ئى ماره‌يله‌ شه‌كه‌ريش وه‌پيان ئه‌يه‌م، چوينكه‌ مار شه‌گه‌ر بخوه‌ێد په‌يوه‌ندى خاسيگ وه‌لدا په‌يا ئه‌كا، جوور ئه‌وه‌گ خوه‌ى له‌لى باسكرد.

Shafaq Live
Shafaq Live