شاره‌زايگ رووسى شوون ئاشكراكردن ده‌وڵه‌ت كوردستان ديارێ ئه‌كا

شاره‌زايگ رووسى شوون ئاشكراكردن ده‌وڵه‌ت كوردستان ديارێ ئه‌كا
2018-08-04T18:11:00+00:00

شه‌فه‌ق نيوز/ قسته‌نتين سيفكۆف دكتۆر له‌ زانسته‌يل سه‌ربازى و سه‌رۆك ئه‌كاديميه‌ى رووسى ئه‌را زانسته‌يل تانك و مووشه‌كى، ئه‌و شوونه‌يل سه‌ره‌كيه‌ ده‌سنيان كرد ك ئه‌گه‌ره‌يل ئه‌وه‌ هه‌س جه‌نگ جه‌هانى سێيه‌م له‌تيان به‌رپا بدێ.

 

وه‌گووره‌ى راى ئى شاره‌زا، جه‌نگه‌يل سه‌ربازى له‌ ماوه‌ى دژايه‌تيه‌يل هه‌رێمايه‌تى په‌ره‌ ئه‌سينێد ك وڵاته‌يل خوه‌رئاوا پشتگيرى له‌لى ئه‌كاو شايه‌ت ئاشكراكردن ده‌وڵه‌ت كوردييش له‌ خاكه‌يليگ بدێ ك داوڕيه‌ێد له‌ عراق و سوريا.

 

سيفكۆف ئه‌وه‌يش وه‌ دوير نازانێد ك كيشه‌يل ناوخوه‌يى ده‌وڵه‌ته‌يل گه‌ورا جوور توركيا جه‌نگ ناوخوه‌يى له‌لێ بكه‌فێده‌و.

 

ئه‌و شاره‌زا باوه‌ڕێ ئه‌وه‌سه‌ ك دوير نيه‌ دوشمانيه‌تى ئه‌مريكى ئسرائيلى وه‌ به‌شدارى وڵاته‌يل ناتۆ و هاوپه‌يمانه‌يليان روێ بيه‌ێد و له‌وانه‌يش ده‌وڵه‌ته‌يل كه‌نداو دژ ئيران و جه‌نگيگ ناوچه‌يى فراوان له‌لى بكه‌فێده‌و. مه‌رج خواستيش ئه‌را به‌رپابوين ئى جه‌نگه‌ وه‌رده‌وامبوين ئيرانه‌ له‌ به‌رنامه‌ ئه‌تۆميه‌گه‌ى يا كيشمه‌كيش سه‌ربازى وه‌ل يه‌كيگ له‌ ده‌وڵه‌ته‌يل كه‌نداو، ك شايه‌ت ئه‌ويش شانشين عه‌ره‌بى سعودى بدێ.

 

شاره‌زاگه‌ له‌يوا دوينێد، وه‌رده‌وامى جه‌نگ له‌ يه‌مه‌ن و كيشمه‌كيشه‌يل تر له‌ ئه‌فريقيا له‌بان بنه‌ماى جيوسياسى ئه‌دێده‌ هووكار روێ وه‌ڕوێ بوينه‌وه‌ له‌ناونى عه‌ره‌بى سعودى و وڵاته‌يل يه‌كگرتگ له‌لايگ و، چين و ئيران له‌لايگ تره‌و له‌وه‌ر زاڵبوين له‌بان ناوچه‌گه‌.

 

وه‌ل ئه‌وه‌يشا ئى شاره‌زا باس له‌ بارودوخ له‌ ئه‌فغانستانيش ئه‌كا ك شايه‌ت چين وه‌پيه‌و بپلكيه‌ێد و ناوچه‌يل ژير ده‌سڵات له‌ ئه‌فريقيا دابه‌شه‌و بكريه‌ێد وه‌ل هه‌وڵداين بڕيگ له‌ ده‌وڵه‌ته‌يل ئه‌مريكاى لاتينى ئه‌را ده‌رچگن له‌ژير چه‌وديرێ ئه‌مريكى.

 

وه‌لێ له‌ خوه‌رهه‌ڵات، سه‌رچه‌وه‌ى سه‌ره‌كى ئه‌را گرژيه‌يل جه‌نگى خوه‌ى له‌ دژايه‌تى ناونى دو لايه‌ن نيمچه‌ دويرگه‌ى كۆرى و له‌ناونى يابان و چين دوينێده‌و وه‌ بوونه‌ى دويرگه‌ى كيشه‌ له‌سه‌ر و له‌ناونى يابان و روسيا وه‌ بوونه‌ى دويرگه‌يل كورێل و له‌ هه‌مان وه‌خت مه‌سه‌له‌ى تايوان.

Shafaq Live
Shafaq Live