شه‌فه‌ق نيوز وه‌ شماره‌ باس له‌ كاره‌سات شه‌نگاڵ ئه‌كا

شه‌فه‌ق نيوز وه‌ شماره‌ باس له‌ كاره‌سات شه‌نگاڵ ئه‌كا
2016-08-16T11:17:30+00:00

په‌لكوتان داعش وه‌ره‌و ناوچه‌يل كوردنشين ته‌نيا مه‌ويسييگ نه‌وى تاڕاده‌يگ، به‌ڵكوو ئه‌و كاره‌ساته‌ هاته‌ تويش رووڵه‌يل يه‌كيگ له‌ كويه‌نترين ئايينه‌يل له‌ ناوچه‌گه‌ وه‌ شيوه‌يگ خراوتر له‌ له‌ناوبردن وه‌جه‌م له‌بان ده‌س چه‌كداره‌يل تونڕه‌و.

ريكخرياگ داعش باوه‌ڕيان ئه‌وه‌سه‌ ك ئێزيديه‌يل كافر و شه‌يتان په‌رسن، له‌وه‌خت داگيركردن شه‌نگاڵيش له‌ 3ى ئاب/ 2014 كوشتن وه‌جه‌م ده‌رهه‌ق پياوه‌يل ئه‌نجام داو ده‌سكرده‌ رفانن ئافره‌ته‌يل و ده‌سدريژى كرده‌ بانيان، يه‌يش بيجگه‌ رفانن ده‌يان مناڵ له‌وه‌ر خاتر وه‌كارهاوردينان له‌ جه‌نگ.

خه‌يرى بۆزانى وه‌ڕيه‌وبه‌ر گشتى كاروبار ئێزيديه‌يل سه‌ر وه‌ وزاره‌ت ئه‌وقاف له‌ حكومه‌ت هه‌رێم كوردستان ئويشێد: شماره‌ى ئێزيديه‌يل له‌ عراق نزيكه‌ى 550،000 كه‌س بويه‌ وه‌رجه‌ ئه‌وه‌گ داعش باێده‌ ناو ناحيه‌و ئاوايه‌يل شه‌نگاڵ.

بۆزانى ئويشێد: نزيكه‌ى 360،000 ئێزيدى له‌ قه‌زاى شه‌نگاڵ و ناوچه‌يل تر كووچ كردنه‌ له‌وه‌ختيگ ريكخرياگ داعش چيه‌سه‌ ناو ناوچه‌گه‌و نزيكه‌ى 1293 كه‌سيش گيان له‌ده‌سدانه‌ له‌وه‌خت كاره‌سات وه‌ناوچگن شه‌نگاڵ.

بۆزانى باس له‌وه‌يش كرد ك شماره‌ى ئه‌و مناڵه‌يليشه‌ ك يه‌تيم بوينه‌ ره‌سيه‌سه‌ 1759 مناڵ، وه‌لێ شماره‌ى ئه‌و مناڵه‌يله‌ ك داڵگه‌يليان له‌ده‌سدانه‌ 407 مناڵ بويه‌و شماره‌ى ئه‌و مناڵه‌يليشه‌ ك باوگ وداڵگيان له‌ده‌سدانه‌ ره‌سيه‌سه‌ 359 مناڵ، يه‌يش له‌وه‌ختيگ ك شماره‌ى ئه‌و مناڵه‌يليشه‌ ك باوگ و داڵگه‌يليان له‌لايه‌ن داعشه‌و ده‌سوه‌سه‌ر كريانه‌ ره‌سيه‌سه‌ 220 مناڵ.

بۆزانى ئاماژه‌ وه‌ شماره‌ى قه‌ورسانه‌يل وه‌جه‌ميش كرد ك تائيسه‌ له‌ شه‌نگاڵ دوينريانه‌سه‌وه‌و ره‌سيه‌سه‌ 30 قه‌ورسان، وه‌لێ ريكخرياگ داعش تائيسه‌ 44 مه‌زارگه‌و شوونه‌يل ئايينى رووڵه‌يل ئێزيدى ته‌قانه‌سه‌و.

بۆزانى وت: چه‌كداره‌يل ريكخرياگ ترۆريستى داعش له‌وه‌ختيگ هاتنه‌ ناوچه‌گه‌ 6413 ئێزيدى رفاننه‌، ك 3543 له‌ليان ئافره‌ته‌و 2870يش له‌ليان مناڵ و پياگ و جايه‌ڵه‌.

وه‌لێ له‌باره‌ى ئه‌وانه‌گ تويه‌نستنه‌ خوه‌يان قورتار بكه‌ن له‌ داعش له‌ ماوه‌ى دوساڵ گوزه‌يشت، بۆزانى وت: 2652 كه‌س له‌وانه‌گ رفيان تويه‌نستن خوه‌يان قورتار بكه‌ن ك 956 له‌ليان ئافره‌ت بوى وه‌ل 328 پياگ و 678 دويه‌ت مناڵ و 690 كوڕ مناڵ.

بيجگه‌ ئه‌وه‌يش بۆزانى وت: 3761 كه‌س له‌وانه‌گ رفيانه‌ هيمان له‌لاى ريكخرياگ داعش مه‌ندنه‌ ك ئه‌ويش 1909 له‌ليان ئافره‌ته‌و 1852 كه‌سيانيش پيكهاتنه‌ له‌ پياوه‌يل و مناڵه‌يل و جايه‌ڵ جوانه‌يل.

له‌ دويه‌مين ساڵياد كاره‌ساته‌گه‌ راپۆرتيگ نه‌ته‌وه‌يل يه‌كگرتگ باس له‌وه‌ كرد ك داعش له‌ناوبردن وه‌جه‌م دژ ئێزيديه‌يل له‌ سوريا و عراق ئه‌نجام داگه‌ له‌ هه‌وڵيگ ئه‌را له‌ناوبردنيان له‌ڕى كوشتن و تاوانه‌يل تر.

ئه‌و راپۆرته‌ ك له‌تى ديمانه‌ وه‌ل ده‌يان كه‌س له‌وانه‌گ كرياگه‌ ك قورتاريان بويه‌ له‌ داعش، باس له‌وه‌ ئه‌كا ك چه‌كداره‌يل داعش وه‌شيوه‌يگ په‌يڕه‌وكرياگ ده‌سكردنه‌سه‌ كوشتن و له‌ناوبردن ئێزيديه‌يل له‌ عراق و سوريا هه‌ر له‌ ئاب 2014 له‌وه‌ر كوشاننه‌وه‌ى ناسنامه‌يان له‌ چوارچيوه‌ى هه‌ڵمه‌تيگ له‌ژير ناونيشان ئه‌و تاوانه‌يله‌ ك هاتگه‌ له‌ به‌ڵگه‌يل له‌ناوبردن وه‌جه‌م له‌ ساڵ 1948.

راپۆرته‌گه‌ جه‌خت له‌وه‌ كرد ك له‌ناوبردن وه‌جه‌م ئێزيديه‌يل وه‌رده‌وامه‌، وه‌ل ئه‌وه‌يشا له‌ 40 لاپه‌ڕه‌ وه‌ناونيشان "هاتنه‌ ئه‌را كاولكارى" ده‌سنيشان تاوانه‌يل ريكخرياگ داعش كردگه‌ له‌ڕى شيه‌وكردنيگ ياسايى له‌بان نياز و كرده‌وه‌يليگ ك ئامانجى له‌ناوبردن ئێزيديه‌يله‌.

له‌ى باوه‌تيشه‌و، باولو بينهيرۆ سه‌رۆك ليژنه‌ى په‌يجوورى سه‌ر وه‌ نه‌ته‌وه‌يل يه‌كگرتگ، وت: تاوانه‌يل له‌ناوبردن وه‌جه‌م بايه‌سه‌ پاڵنه‌ر بدێ ئه‌را كرده‌وه‌يل فيشتر له‌ ئاست سياسى.

له‌ هه‌مان وه‌خت فيتيت مونتاربورن ئه‌ندام ليژنه‌گه‌يش جه‌خت له‌وه‌ كرد ك زانياريه‌يليگ پڕ دقه‌ت كه‌فته‌سه‌ ده‌سى له‌بان شوون و كرده‌وه‌يل و ده‌سكرده‌سه‌ ئاڵشت وئوڵوشتى وه‌ل شماره‌يگ له‌ ده‌سڵاته‌يل ناوچه‌يى ك په‌يوه‌سه‌ وه‌ چه‌كداره‌يل بيگانه‌.

داعش ناچار پياوه‌يل ئێزيدى كرد يا ئه‌وه‌سه‌ ئايين ئسلام هه‌ڵوژنن يا مه‌رگ و ده‌سدريژى له‌بان ئافره‌ته‌يل جايه‌ڵ جوان له‌وانه‌گ ته‌مه‌نيان فيشتره‌ له‌ 9 ساڵ و فرووشتن ئافره‌ته‌يل له‌ بازاڕه‌يل و بردن مناڵه‌يل ئه‌را جه‌نگ.

Shafaq Live
Shafaq Live