شيه‌وكردنيگ.. ئه‌راچه خورئاوا ناخوزاێد داعش بنبڕ بكريه‌ێد؟
هه‌رچه‌نى يه‌كگرتنيگ ناوده‌وڵه‌تى هه‌س ئه‌را دژايه‌تى داعش، وه‌لێ هيمان ئه‌و ريكخرياگه هه‌ڕه‌شه‌يگ ئاسايشيه له خوه‌رهه‌ڵات ناوين و جه‌هان، وه‌و خاتريشه زوورم ئه‌و ناوچه‌يله ك له تاوسان 2014 ده‌س گرته بانيان له سوريا و عراق تائيسه‌يش هانه ژير ده‌سڵاتى ك هه‌رچه‌نى چه‌ن شاريگيش له به‌رژه‌وه‌ندى هيزه‌يل عراقى له‌ده‌سداگه.
جه‌نگ موسڵ وه تازه‌ترين په‌لاماريگ تاريف ئه‌كريه‌ێد ك هاته‌سه تويش داعش له مه‌يدان كوشتار له ناوچه‌يگ ك وه‌پى وتريه‌ێد "خلافه‌ت" و له عراق و سوريا ئاشكراى كرد، ك وه‌ل ئه‌وه‌يشا ئه‌و په‌لاماره‌يله ك هاته‌سه تويش داعش ترس فريه‌يگ نه‌خسته‌سه‌و له‌لاى ئه‌و ريكخرياگه يا وه‌رده‌م له توانايه‌يلى نه‌گرتگه له ئه‌نجامداين په‌لاماره‌يلى له ده‌يشت.
داعش تا ئيسه‌يش زاڵبوين و حوكم خوه‌يشى له‌ده‌س نه‌ياگه، به‌ڵكوو وه‌سه‌ربازكردن ئلزامييش چه‌سپانگه له‌بان ده‌يان هه‌زار له جه‌نگاوه‌ره‌يلى له‌وه‌ر ئاڵشتكردنيان له‌جياى زه‌خمداره‌يلى و تواناى مه‌شقداينيان له جه‌نگ و شوونه‌يل جياياى به‌ره‌يل جه‌نگ هه‌ر له جه‌له‌ولا له نزيك مه‌رزه‌يل عراق و ئيران تا حه‌له‌ب له سوريا.
داعش تويه‌نست دوباره زاڵ بدێده بان چه‌نه‌ها ناوچه ك زويتر له‌ژير ده‌سڵات خوه‌ى بوينه‌و له‌ئاكام جه‌نگه‌يل له‌ده‌سيان داو له‌وانه‌يش ناوچه‌يل شار شه‌رقات له عراق و شار ئه‌خته‌رين له ريف حلى باكوور، ك يه‌يش ريككه‌فت بوى وه‌يه‌كه‌و له مانگ ئوكتۆبه‌ر گوزه‌يشت.
خوه‌رئاوا ترس له‌وه ديرێد داعش هان بدريه‌ێد له‌بان په‌لاماره‌يل ترۆريستى و جيوه‌جيكردنى له حاڵه‌ته‌يليگ ك زاڵ بوونه بانيان له خوه‌رهه‌ڵات ناوين، چوينكه جارجاريگ داعش ته‌قينه‌وه له‌و ده‌وڵه‌ته‌يله ئه‌نجام ئه‌ياد ك به‌شدارن له هاوپه‌يمان ناوده‌وڵه‌تى.
له گه‌وراترين كرده‌وه‌يل داعش له خوه‌رئاوا، په‌لاماره ترۆريستيه‌گه‌ى مانگ نۆفه‌مبه‌ر 2015 بوى له فره‌نسا، ئه‌ويش دوياى دو مانگ له‌دوياى ئه‌وه‌گ فره‌نسا په‌لاماره‌يل ئاسمانى ئه‌نجام دا ئه‌را بان چه‌ن بنگه‌يگ داعش له سوريا، ك يه‌يش له‌يوا له‌ه په‌رله‌مان بريتانى كرد دودڵ بوود له به‌شداريكردن ته‌ياره‌يلى له په‌لامارداين بنگه‌يل ئه‌و ريكخرياگه له عراق و سوريا.
مه‌ترسيه‌يل دژايه‌تى داعش فيشتر ئه‌دێ له ديارده‌ى گورگه‌يل ته‌نيا ك ئاماده‌ن ئه‌را جيوه‌جيكردن فه‌رمانه‌يل له هه‌ر په‌لاماريگ ترۆريستى، ك له‌ى باوه‌تيشه‌و تووڕ سكاى نيوز ئه‌وه ده‌رخست ك زوورم ترۆريسته‌يل له‌وانه‌گ له ماوه‌ى 15 ساڵ زيندانى كريانه ئازاد كريانه‌و حاڵ حازر گه‌ردن له‌ناو جاده‌يل بريتانى.
وه‌ل ئه‌وه‌يشا ده‌وڵه‌ته‌يل خوه‌رئاوا ترس له گله‌وخواردن چه‌كداره‌يل داعش ديرن ئه‌را وڵاته‌يل ره‌سه‌ن خوه‌يان له شوون واينيان له جه‌نگه‌يل عراق و سورياو ئۆرپيه‌يل و ئه‌مريكيه‌يليش له ئنتقام ئه‌و ريكخرياگه ترسيه‌ن.
له‌ى باوه‌ته‌و، باتريك كوكبرن نويسه‌ر ناودار بريتانى ئويشێد: وه‌ل وشدارى فريه‌يگ له حكومه‌ت عراقيه‌و، وه‌لێ واشنتۆن گووش نه‌يا ئه‌وه‌گ جه‌نگ وه‌رده‌وامه له سوريا ك جيواز بدێ ئه‌را عراق و جه‌نگ ناوخوه‌ييش له‌لى بكه‌فێده‌و.
كوكبرن له باوه‌تيگى له رووژنامه‌ى ئه‌ندبندنت، وت: واشنتۆن مناى نورى مالكى سه‌رۆك وه‌رين وه‌زيره‌يل عراقى نه‌كرد ك دو ماوه‌ى سه‌رۆكايتى داشت و كار له‌بان قويله‌وكردن ناكووكيه‌يل تايفى كرد و له‌يوا له داعش كرد وه‌گووره‌ى ئه‌و ژينگه ك ئه‌راى گونجيا نفوزى فيشتره‌و بكا له عراق.
له هه‌مان وه‌خت خوه‌رئاوايش گرينگى وه وجوود داعش نه‌يا له ليبيا، ك چه‌كداره‌يلى جيگرن له شار سرت و زاڵن له‌بان چه‌ن بنگه‌يگ ستراتيجى و له‌وانه‌يش زانكۆى سرت و نه‌خوه‌شخانه‌ى سه‌ره‌كى و هۆڵ واغادوغو ئه‌را كۆنگره‌يل، يه‌يش بيجگه بريگ ناوچه‌يل تر له شار سبراته.
بيجگه ئه‌وه‌يش ده‌وڵه‌ته‌يل هاوساى عراق و سوريايش تومه‌تبار وه پشتگيريكردن ريكخرياگ داعش ئه‌كريه‌ن وه پويل و چه‌ك و خوه‌يبه‌خشه‌يل، ئه‌ويش له‌ساى بيده‌نگى خوه‌رئاوا ك شايه‌تيده‌ر بوى له‌بان كرده‌وه‌يل فرووشتن و دزيكردن نه‌فت و شوونه‌واره‌يل له ڕقه‌و موسڵ.
وزاره‌ت وه‌رگرى رووسى له مانگ ديسه‌مبه‌ر گوزه‌يشت ئه‌وه ده‌رخست ك به‌ڵگه له‌بان ئه‌وه ديرێد ك ره‌جه‌ب ته‌يب ئه‌ردوغان سه‌رۆك توركى و خيزانه‌گه‌ى قانجاز ئه‌كه‌ن له دزيكردن نه‌فت له‌ناو ئه‌و خاكه‌يله ك هانه ژير ده‌سڵات داعش له سوريا و عراق.
له‌ليش فيشتر هاوپه‌يمان ناوده‌وڵه‌تييش ك توركيا له‌تى به‌شداره وه‌سه‌رۆكايه‌تى وڵاته‌يل يه‌كگرتگ، بيده‌نگه له‌وه‌رانوه‌ر ئاژاوه‌ى چه‌ك له هه‌ر يه‌ك له سوريا و عراق ك داعش له‌لى نه‌ف وه‌رئه‌گرێد وه‌شيوه‌يل جياجيا جوور ئه‌وه‌گ بارزگانه‌يل و فرووشياره‌يلى نه‌ف له‌لى وه‌رئه‌گرن.
