قه‌زافى چوين هه‌وڵ واين سه‌دام دا؟

قه‌زافى چوين هه‌وڵ واين سه‌دام دا؟
2017-04-22T16:00:00+00:00

شه‌فه‌ق نيوز/ جه‌لال تاڵه‌بانى سه‌رۆك وه‌رين عراقى ره‌زامه‌نى نيشاندا له‌بان له‌سێداره‌داين سه‌دام حسێن، يه‌يش دادوه‌ر مونير حه‌داد سه‌رپه‌شيار له‌بان دادگاييكردن سه‌دام حسێن سه‌رۆك وه‌رين عراقى ئاشكراى كرد.

 

حه‌داد له‌ گفتگوويگ له‌ به‌رنامه‌ى "نقطة نظام" له‌ كه‌ناڵ ئاسمانى ئه‌لعه‌ره‌بيه‌، وت: تاڵه‌بانى سڵاى راسه‌وكردن بريار له‌سێداره‌داين يا دواخستنى نه‌ياشت، چوينكه‌ ياساى دادگايه‌يل ناوده‌وڵه‌تى ڕى وه‌ى چشته‌ نايه‌ن.

 

حه‌داد وت: شوونه‌گه‌ى سه‌دام تايبه‌ت بويه‌ ئه‌را له‌سێداره‌داين و شماره‌گه‌يشى له‌ ريزبه‌ندى كه‌سه‌يل له‌سێداره‌درياگ 64 بوى، ئه‌ويش خسته‌ دروو ك موه‌فه‌ق روبه‌يعى راوێژكار وه‌رين له‌ ئاسايش عراق هويچ په‌يوه‌ندييگ وه‌ مه‌سه‌له‌ى دادگاييكردنه‌گه‌ داشتوود و جه‌ختيش له‌وه‌ كرد ك پزيشك زيندانه‌گه‌ ئمزا له‌بان به‌يان وه‌فاته‌گه‌ى سه‌دام كردگه‌.

 

وه‌سيه‌ت سه‌دام

 

وه‌سيه‌ت سه‌دام حسێن سه‌رۆك وه‌رين عراقى چه‌ بوى؟ دادوه‌ر مونير حه‌داد جواو ئى پرسياره‌ ئه‌ياد و ئويشێد: پياو ئايينى سنى مه‌زه‌و ئاماده‌ نه‌وين ئه‌را بردن وه‌سيه‌ته‌گه‌ى سه‌دام و من ئه‌و ده‌وره‌ وه‌رگرتم و وه‌ختيگيش وه‌رجه‌ له‌سێداره‌داين داوا له‌ سه‌دام كردم وه‌سيه‌گه‌يش بويشێد، وت: بژيه‌ێ كوڕم.

 

قه‌زافى و هه‌وڵى ئه‌را واين سه‌دام

 

حه‌داد ئاشكراى ئه‌وه‌ كرد ك ياساى عراقى ڕى نايه‌ێد كه‌سيگ له‌ رووژ جه‌شنى بدريه‌ێد له‌ سێداره‌، وه‌لێ ئيمه‌ باوه‌ڕمان ئه‌وه‌ بوى ك سه‌دام حسێن شايه‌ت بهه‌يواێد له‌ زيندان و هه‌ر وه‌و خاتريشه‌ دادوه‌ره‌يل فه‌رمان له‌سێداره‌ى سه‌دام و ره‌فيقه‌يلى ده‌ركردن وه‌بى ئاگادارى راوێژكاره‌يل ئه‌مريكى، چوينكه‌ ئه‌مريكيه‌يل هه‌وڵ دوياخستن حوكمه‌گه‌ى ديان ئه‌را ماوه‌ى 14 رووژ.

 

حه‌داد ئاشكراى ئه‌وه‌يش كرد ك معه‌مه‌ر قه‌زافى سه‌رۆك وه‌رين ليبى هه‌وڵ ئه‌وه‌ داگه‌ له‌ڕى داين رشبه‌ت وه‌ پاسه‌وانه‌يل ئه‌مريكى سه‌دام بواينێد.

 

دادوه‌ره‌يل به‌عسى

 

مونير حه‌داد باس له‌وه‌يش كرد ك دادگاى سه‌دام وه‌گشتى سه‌روه‌خوه‌ى بويه‌و ئه‌نجومه‌ن دادگا كانديدى كردوێد و 35 دادوه‌ريش له‌تى له‌ به‌عسيه‌يل بوينه‌و له‌ هه‌مان وه‌خت دگان وه‌ئه‌وه‌يش نا ك ياساشكنى فريه‌يگيش بويه‌ له‌ئاكام ده‌خاڵه‌ت كه‌سه‌يليگ سه‌ر وه‌ رژيم وه‌رين.

 

حه‌داد هه‌ميش وت: وه‌ل ئه‌وه‌يشا ره‌خنه‌يش له‌ تيم وه‌رگرى له‌ سه‌داميش گريا له‌و وه‌خته‌يله‌، چوينكه‌ فيشتر ئعلامى بوينه‌ تا ئه‌وه‌گ ياسايى بوون و ئاماژه‌ وه‌يه‌يش كرد و وت: ئه‌وان  ته‌ماشاى من جوور خاسترين دادوه‌ريگ كردنه‌ له‌ دادگاگه‌و وتيش: هه‌ناى ك سه‌دام حسێن  هاته‌سه‌ ناو دادگاگه‌يش جوور دادوه‌ريگ بيلايه‌ن و سه‌روه‌خوه‌ى ته‌ماشام كردگه‌.

 

Shafaq Live
Shafaq Live