مه‌ێ ساخته له مه‌يخانه‌يل شاريگ عراقى و وشدارى له نه‌خوه‌شى
شه‌فه‌ق نيوز/ ناره‌زاتى مه‌ردمى و ئايينى روێ له زيايبوين كردگه وه‌رانوه‌ر زيايبوين شماره‌ى دوكانه‌يل مه‌يفرووشى له شار شه‌رگات(140كم)له باكوور تكريت ناوه‌ند پاريزگاى سه‌ڵاحه‌دين، وه‌لێ وه‌ل ئه‌وه‌يشا هيمان ئه‌و دكانه‌يله مه‌شق كاره‌يليان ئه‌كه‌ن وه ئازادى ته‌واويگ له‌چوارچێوه‌ى دابينكردن پاسه‌وانى ئه‌رايان له‌لايه‌ن ده‌زگايه‌يل ئه‌منييه‌و دوياى وه‌رگرتن موڵه‌ت له‌لايه‌ن قايمقاميه‌ى شاره‌گه‌و وه‌ريه‌وبه‌رايه‌تى پۆليسه‌و ئه‌را وه‌رده‌وامى وه پيشه‌يليان.
ئمجا وه‌گووره‌ى نه‌وين چه‌وديرييش له‌بان ئه‌و مه‌ردمانه ك خه‌ريك فرووشتن مه‌ێ ساخته‌ن و بويه‌سه هووكار ئدمان و بڵاوبوينه‌وه‌ى چه‌نه‌ها نه‌خوه‌شى له‌لاى جايه‌ڵ جوانه‌يل له‌و شاره, شماره‌يگ له وه‌رپرسه‌يل قه‌زاگه گشت لێدوانيگ له‌ى باوه‌ته‌و ره‌ته‌و ئه‌كه‌ن ك هه‌رچه‌نى په‌يوه‌نديه‌يل فريه‌يگيش ئه‌نجام ئه‌گرێد، وه‌لێ وه‌ل ئه‌وه‌يشا(عه‌لى ئه‌لبه‌يده‌ر)نويسه‌ر و رووژنامه‌نويس باوه‌ڕى ئه‌وه‌شه ك خواسته چه‌وديرێ كار ئه‌و دوكانه‌يله بكريه‌ێد و نواگيرى له فرووشتن هه‌ركام له‌و شه‌راوه‌يله بكريه‌ێد ك قه‌يه‌غه‌س له فريه‌يگ له وڵاته‌يل و شاره‌يل عراقى.
ئه‌لبه‌يده‌ر ئاماژه وه ئه‌وه ئه‌كا هووكاره‌يل فريه‌يگ هه‌ن پال وه جايه‌ڵ جوانه‌يله‌و ئه‌نه‌ن ئه‌را خواردنه‌وه‌ى ئه‌و جووره شه‌راوه‌يل خراوه، له‌وانه‌يش له‌وه‌ر كه‌ميى نرخه‌يليان وه به‌راورد وه‌ل جووره‌يل تر، يه‌يش بيجگه هيز بيهووشكردنيان، وه‌لێ ئه‌و كاريشه ئه‌نجامه‌يل خراويگ له‌لى ئه‌كه‌فێده‌و له‌بان ته‌ندروستى و ئه‌قڵيه‌ت شه‌راوخوه‌ره‌يل ك فريه‌يگ له‌ليان ره‌سيه‌سه حاڵه‌ت ئدمان و يه‌يش هه‌وه‌جه وه ناوه‌نديگ تايبه‌تمه‌ند ديرێد و له پاريزگاى سه‌ڵاحه‌دينيش ئيچنه ناوه‌نديگ ده‌س ناكه‌فێد ئه‌را چاره‌سه‌ر مودمنه‌يل.
باس له‌وه‌يش ئه‌كا بيكارى و نه‌وين به‌رنامه‌يل هووشياركردن ئه‌را جايه‌ڵه‌يل جوور كتاوخانه‌و وازيگايه‌يل وه‌رزشى يه‌كيگ تره له‌و هووكاره‌يله ك هيشتگه رووڵه‌يل ئه‌و شاره قه‌بول وه شه‌راوخواردن بكه‌ن.
له هه‌مان وه‌خت ئه‌لبه‌يده‌ر جه‌خت له‌وه‌يش ئه‌كا ك لايه‌نه‌يل وه‌هيزيگ سوودمه‌نن له‌و دوكانه‌يله‌و له‌يوا كردنه پرووژه‌يل تريش واز بكه‌ن جوور هۆڵ قوماركردن و دمبه‌ڵه له‌وه‌ر ده‌سكفتن قانجازز زياتر و يه‌يش وه‌نه‌ف ئه‌و لايه‌نه‌يل و ئه‌و كه‌سه‌يله‌نه ك سه‌رپه‌رشى ئيچنه پرووژه‌يليگ ئه‌كه‌ن.
