ئەنبار نووڕێدە ئەزموون گەشتوگوزار کوردستان
شەفەق نیوز/ دانیشتگەیل ئەنبار، لە خوەرئەڵات عراق، ئومید دیرن ک راگەیانن داناین ناعوورەیلە لەناو لێست جەهانی "یونیسکۆ"، بوودە سەره‌تایگ ئەرا بەرزەوکردن ئاست گەشتوگوزاری لە پارێزگاگە، و بوودە چاپیگ ئەرا ئەزموون هەرێم کوردستان، ئەوەیش وەگرنگیداین وە شۊنەیل گەشتوگوزاری و مقیەتیکردنیان، و چۊی هەرێم کوردستان بۊیە شۊن نووڕستن گشت عراقیەیلە و دەوڵەتەیل جەهانیش.
مەبرووک جغێفی قایمقام قەزای حەدیسە ئەرا ئاژانس شەفەق نیوز ئۊشێد: شاندیگ لە وەزارەت سامانە ئاویەیلە سەردان شارەگە کرد، و بڕیار دریا کورنیشیگ تر، وەگەرد چوار ناعوور گەپ لەناوچەیلە دروس بکریەێد، تا بوودە سەیرانگای گەشتوگوزارییگ ک گەشتیارە لە جوراوجور شارەیل عراق و ئەو دەوڵەتەیلیش بکیشێد.
و دیاری کرد ک حکومەت خۆجێی ئەنبار کار ئەرا جیوەجیکردن پڕۆژەییلیگ گەشتوگوزاری لە قەزای حەدیسە و ئەو قەزایل خوەرئەڵات کەێد، وەتایبەت دۊیای راگەیانن داناین ناعوورەیلە لەناو لێست ئاسەواری جەهانی.
وتیش: پلانەیلیگ هەس ئەرا دروسکردن چەن ناعووریگ لە ئاوایەیل دەورگرد قەزاگە، چۊنکە ئامادەکریانە ئەرا ئەو کارە، وتیش؛ ناعوورەیلە وەدەس پیشەدارەیلیگ لە خەڵک حەدیسە دروس کریەن.
جغێفی دووپات کرد ک لە وەخت راگەیانن داناین ناعوورەیلە لەناو لیست یونیسکۆ، دەسکردیمنە پیشوازیکردن لە گەشتیارەیل لە شارەیل جوراوجور وڵاتەگە، و کۆمپانیایلیگ گەشتوگوزاری هەس ک وەی نزیکە کاروانەیلیگ خه‌نه رێ ئەرا سەردان ناوچەیل خوەرئاوا وەتایبەت ناعوورەیلە لە شار هیت و بەغدادی و حەدیسە.
لەلای خوەییش، سینان عیساوی وەڕیەوبەر گەشتوگوزار و ئاسەوار ئەرا ئاژانس شەفەق نیوز وت: گەشتوگوزار لە ئەنبار هالە نوای گەشەکردن گەورەیگ، ئەوەیش وە تەرخانکردن پۊل ئەرا جیوەجیکردن بڕێ لەو پڕۆژەیلە ک گەشتوگوزاری بەرزەو کەن، و ئەوەسا وەگەرد تەواوبونی توێژینەوە راگەیانن لەلی کریەێد، و لەو پڕۆژەیلە دروسکردن و ئامادەکردن ناعوورەیلەس لە ناوچەیل خوەرئاوای ئەنبار.
عەزاوی داناین ناعوورەیلە لەناو لیست یونیسکۆ جۊر گام گەپیگ دانا، باوجی گەشەپیدان خوازێد، و بڕیار دەسکردن وەو کارە دریا، تا بوودە شۊنیگ گەشتوگوزارییگ ئەرا هەزاران لە گەشتیارەیل عراق و جەهان.
و دوپات کرد ک شاندەیلیگ بیگانە سەردان ناوچەیل خوەرئاوایی ئەرا نووڕستن ناعوورەیلە و شیوەی دروسکردنیان لەو ناوچەیلە کردن، تا گەشتیارەیل وەخوەی بکیشێد، وه‌تایبەت دۊیای دانانی لەناو لیست یونیسکۆ.
عیساوی وتیش: وەگەرد عەلی دلێمی پارێزگار ئەنبار و چەن ریخریاییگ ناودەوڵەتی رێک کەفتیمن تا کۆنگرەی فراوانیگ ئەنجام بیریەێد وەناونشان (گەشتوگوزاری ئەنبار لەناوبەین راسی و تەما)، و مکیس بڕێ لە باڵیۆزەیل و وەڕیەوبەرەیل کۆمپانیایلە کریا ک گرنگی وە بەرهەمهاوردن دەن، و ئەوەسا لە سەرەتای ساڵ ئایندە کۆنگرەگە بەسیەێد.
سەباح حەدیسی ک دارتاشە و پیشەکار دروسکردن ناعوورە لە ناوچەیل خوەرئاوایی ئۊشێد: ناعوورەیلە لە ناوچەیل خوەرئاوا کەفتنە وەر زەرەدەیل گەورەیگ لەوەر جەنگ دژوە داعش تیرۆریست، و هەمیش بڕێ لەلیان خراو کریا لەوەر گەشەکردن شیوەی ئاویاری نوو.
حەدیسی لە قسەیلی ئەرا ئاژانس شەفەق نیوز وتیش: بایەتە بڕیار داناین ناعوورەیلە لەناو لیست ئاسەواری جەهانی بوودە سەرەتایگ ئەرا بەرزەوکردن ئاست گەشتوگوزاری لەو ناوچەیلە، و ئەوەسا کار ئەرا دروسکردن ناعوورەیلیگ تر کەیمن، لەبان ئەو سەختیەیلە ک لە دابینکردن کەرەستەیل سەرەتایی کەفێدە وەرمان، و هەمیش لەوەر ئەوە ک شمارەی پیشەکارەیلە فرە کەمە، چۊنکە ئەو پیشە کەفتیەسە وه‌رلەناوچگن، وەلێ ئومیدیگ لە حکومەت خۆجێی دیریمن تا بتۊینیمن گەورەترین شمارە لەلیان دروس بکەیمن، و کەلتوور ناوچەیلمان گلەو بەیمن.
ساڵح مەحمود تۊژینەوەکار لە باوەت ئابووری ئۊشێد: ناوچەیل خوەرئاوای ئەنبار، شۊنەیل گەشتوگوزاری فرەیگ هاناویان، جۊر ناعوورەیلە و دەریاچەی بەنداو حەدیسە، ک چواردەوری باخ وەزۊی کشتوکاڵیە، و توانای وەكارهاوردنی هەس تا سەیرانگایلیگ لەنزیک و بکریەێد، و بوودە شۊنیگ گەشتوگوزاری و داهات فرەیگ ئەرا حکومەت خۆجێی بارێد.
مەحمود لە قسەیلی ئەرا ئاژانس شەفەق نیوز وت: چەن پێشنیارییگ هەس ک وە خەرج حکومەت خۆجێی توانای جیوەجیکردنیان هەس، تایبەت لە ناوچەیل دەورگرد ناعوورەیلە، تا گەشتیارەیل ئەرا سەردان ئەو ناوچەیلە و نووڕین ئاسەورارەیلی بکیشێد، و بزانن چۊین باوگ وباپیریان وەو شیوەیلە ئاویاری کردنە، و چۊین کشاوەرزەیل ئەو مەوقە رەسینە ئاستەیل بەرزیگ لە بەرهەمهاوردن و هەناردەی بەرهەم کشتوکاڵی، هەرچەن دروسکردن و وەکارهاوردن ناعوورەیلە ئەرا ئاویاری زەۊیەلیان سەختە.
