په‌روه‌رده‌ له‌ناوچه‌یل‌ ده‌‌یشت‌ سنور‌ هه‌رێم

په‌روه‌رده‌ له‌ناوچه‌یل‌ ده‌‌یشت‌ سنور‌ هه‌رێم
2014-02-15T13:39:55+00:00

له‌باره‌ی‌ ڕه‌وش په‌روه‌رده‌ له‌ناوچه‌يل كوردستانی ده‌‌یشت‌ ئداره‌ی‌ هه‌رێم، نويسه‌رێگ كورد ئويشێ: میدیاگانیش گرنگی‌ وه‌بوار‌ په‌روه‌رده‌یی ناوچه‌يل كوردستانی‌ ده‌‌یشت‌ ئیداره‌ی‌ هه‌رێم ناده‌ن‌و كار له‌بان ئه‌و بواره‌ نه‌كردنه‌.

 

(محه‌مه‌د عه‌لی‌ سه‌ید موراد) وه‌ڕێه‌و‌به‌ر‌ په‌روه‌رده‌ی‌ خانه‌قین وه‌وه‌كاله‌ت سه‌ر وه‌ هه‌رێم‌ كوردستان له‌وباره‌وه‌ ئويشێ‌:"ئاشكراس ك‌‌ ئيسه‌ دو په‌روه‌رده‌‌ له‌خانه‌قین هه‌س، په‌روه‌رده‌یگ ك ‌سه‌ر وه‌ حكوومه‌ت ناوه‌نده‌‌و په‌روه‌رده‌یه‌گتریش سه‌ر وه‌هه‌رێم كوردستانه‌، كێشه‌گه‌يش ئه‌وه‌سه‌ ك‌ هه‌ردو په‌روه‌رده‌گه‌ له‌یه‌ك بنا ده‌وام ‌كه‌ن‌و فره‌ قه‌ره‌باڵغی دروستكردنه‌، وه‌لێ وه‌گشتی‌ ڕه‌وش په‌روه‌رده‌ له‌ناوچه‌گه‌ خراو نییه‌، هه‌ردو په‌روه‌رده‌گه‌ی خانه‌قین هاوكار یه‌كترن".

 

نه‌وين‌ ڕه‌وشێگ‌ په‌روه‌رده‌یی گونجياێ و خاس له‌ناوچه‌يل كوردستانی‌ ده‌‌یشت‌ ئداره‌ی‌ هه‌رێم هۆكاره‌يل فره‌ێگ دێرێ‌، وه‌قسه‌ێ‌ (محه‌مه‌د عه‌لی‌ سه‌ید موراد) وه‌ڕێه‌و‌به‌ر‌ په‌روه‌رده‌ی‌ خانه‌قین وه‌وه‌كاله‌ت ‌سه‌ر وه‌هه‌رێم‌ كوردستان‌، یه‌كێگ له‌هۆكاره‌گان كێشه‌ی وه‌ڕێه‌وبه‌ره‌گانه‌‌، كێشه‌یگتر په‌روه‌رده‌ییش له‌و ناوچه‌يله‌ ئه‌وه‌سه‌ ك گشت‌ وه‌ڕێه‌وبه‌ر‌ خوه‌ندنگه‌گان سه‌ر وه‌پارێزگای‌ دیاله‌ن، بێجگه‌ له‌وه‌گ‌ مامۆستای‌ كوردی‌‌ له‌خوه‌ندنگه‌گان هه‌س.

 

له‌قه‌زای‌ خانه‌قین ته‌نيا 19 خوه‌ندنگا‌ سه‌ر وه‌ئیداره‌ی‌ گه‌رمیانن، ئه‌وه‌كان‌ تر سه‌ر وه‌پارێزگای‌ دیاله‌ن ك‌ حكوومه‌ت‌ فیدراڵی‌ به‌غدا سه‌رپه‌رشتیان ئه‌كا.

 

وه‌ڕێه‌و‌به‌ر‌ په‌روه‌رده‌ی‌ خانه‌قین وه‌وه‌كاله‌ت ئاماژه‌‌ وه‌ ئه‌وه‌يشكرد، ئيسه‌ له‌سنوور‌ په‌روه‌رده‌ی‌ خانه‌قین 19 خوه‌ندنگا هه‌س ك سه‌ر وه‌گه‌رمیانن، بێجگه‌ له‌و 19 خوه‌ندنگا‌، گشت خوه‌ندنگاگانتر سه‌ر وه‌ناوه‌ندن‌و وه‌ڕێه‌وه‌به‌ره‌گانیانيش سه‌ر وه‌ دیاله‌ن، داوایشكرد، ئه‌گه‌ر بكريه‌ێد بنایه‌يگ ئه‌ڕا وه‌ڕێه‌و‌به‌رایه‌تی‌ په‌روه‌رده‌ی‌ خانه‌قین سه‌ر وه‌هه‌رێم‌ كوردستان واز بكريه‌ێد‌، ئه‌و وه‌خته‌ كێشه‌گه‌یان چاره‌سه‌ر ‌بوود، ده‌وامیشیان جێگیر بوود، چوينكه‌ ئيسه‌ هه‌ر به‌شێگ‌ په‌روه‌رده‌ی‌ خانه‌قین سه‌ر وه‌گه‌رمیان 20 تا 30 كه‌س هاتێ‌، ك‌ فره‌جار په‌ك كاروباره‌يليان ‌خه‌ێد.

 

له‌باره‌ی‌ هه‌مان باوه‌ته‌و‌، نويسه‌رێگ ئويشێ، بارودۆخ په‌روه‌رده‌ له‌ناوچه‌يل كوردستانی ده‌يشت ئیداره‌ی‌ هه‌رێم خاس نییه‌.

(له‌تیف فاتح فه‌ره‌ج) نويسه‌ر‌ و ڕووژنامه‌نويس وت‌:"وه‌گشتی‌ بارودۆخ په‌روه‌رده‌ له‌ناوچه‌یل‌ ده‌‌یشت‌ ئیداره‌ی‌ هه‌رێم خاس نییه‌، هه‌روه‌و جووره‌گ له‌هه‌رێم دنیایگ كێشه‌ هه‌س‌ له‌ڕوی‌ كوالێتی‌ به‌رز خوه‌ندنگا‌‌‌و هه‌وه‌جه‌يل‌ خوه‌ندكاره‌يل، ده‌رسه‌يليان ‌و شاره‌زایی مامۆستاگان، له‌ی ناوچه‌يليشه‌ هه‌مان كێشه‌ هه‌س‌".

 

له‌باره‌ی‌ ئه‌رك‌ میدیاوه‌ ك چوين كاركردگه‌ ئه‌ڕا خاستركردن‌ ڕه‌وش په‌روه‌رده‌یی له‌لایگ ‌و ده‌رخستن‌ كه‌موكوڕیه‌یل‌ ڕه‌وش په‌روه‌رده‌یی له‌و ناوچه‌يله‌ له‌لایگ تره‌و‌، (له‌تیف فاتح فه‌ره‌ج) ئاشكرايه‌وكرد، وه‌داخ فره‌ێگه‌و‌‌ میدیای كوردی نه‌تويه‌نستگه‌ نه‌ له‌هه‌رێم‌ كوردستان‌و نه‌ له‌ناوچه‌یل‌ ده‌‌یشت‌ ئیداره‌ی‌ هه‌رێم كار له‌مل ڕه‌وش په‌روه‌رده‌ بكا.

 

بارودوخ ئه‌منی له‌ناوچه‌یل‌ ده‌‌یشت‌ ئیداره‌ی‌ هه‌رێم كاریگه‌ری‌ ته‌واویگ دێرێ‌ له‌بان پرۆسه‌ی‌ خوه‌ندن‌و ڕه‌وش په‌روه‌رده‌ له‌ناوچه‌گه‌، (عه‌لی‌ باجه‌ڵان) شاره‌زای‌ كاروبار‌ ئه‌منی‌‌و وه‌ڕێه‌و‌به‌ر‌ سه‌نته‌ر‌ ڕووشنهویری‌و كومه‌ڵایه‌تی‌ ماچۆی‌ شه‌به‌ك وت‌:"بێگومان بارودوخ‌ ئه‌منی‌ كاریگه‌ری‌ فره‌ێگ دێرێ‌ ئه‌ڕا بان ڕه‌وش په‌روه‌رده‌ له‌ناوچه‌گه‌، ئه‌ڕا نموونه‌ ‌ئيسه‌ وه‌خاتر‌ دۆخ‌ نه‌خوازرياگ‌ ناوچه‌گه‌وه‌، مه‌ردمه‌گه‌ی‌ ئاواره‌ بوون، يه‌يش كاریگه‌ری‌ ديرێ له‌بان پرۆسه‌ی‌ په‌روه‌رده‌ له‌و ناوچه‌يله‌، چوينكه‌ وه‌رده‌وام مه‌ترسییگ له‌دڵ‌ هاوڵاتیه‌یل‌ ناوچه‌گه‌‌".

 

عه‌لی‌ باجه‌ڵان وت‌:"ئيمه‌ له‌ناوچه‌گه‌ فره‌ پرۆژه‌ی‌ سمينار و وۆركشۆپ كرديمنه‌، له‌باره‌ی‌ دۆخ‌ ئه‌منی‌‌و په‌روه‌رده‌ییه‌و‌، ئه‌ڕا ئه‌وه‌گ‌ ئه‌و مه‌ترسیه‌ ك‌ ها له‌ده‌روين هاوڵاتیه‌يل نه‌مێنێ، ئه‌ڕا ئه‌وه‌يش داوا ‌كه‌یمن له‌حكوومه‌ت‌ هه‌رێم‌ كوردستان، ك‌ پشتگیری ناوچه‌گه‌مان بكه‌ن".

 

 

أ‌.       ج
NNA

Shafaq Live
Shafaq Live