ڤاێڕۆس کۆڕۆنا ژینگه‌ ئاڵشت كرد

ڤاێڕۆس کۆڕۆنا ژینگه‌  ئاڵشت كرد
2020-05-20T21:40:21+00:00

لە سای وسانن فرەیگ لە کارەیل پیشەسازی لە جهان، هەواگە وەشیوەیگ رون خاسەوبوی، لە وینەیل مانگە دەسکردەیلە کەمەوبوین دووانە ئۆکسید نایتڕۆجین لەجهان دیاردەێد، ئەویش گاز ژەهرینیگە ، لە شیوەی سەرەکی لە ماشین و کارگاگان پەیا بوود.
قەیران کۆڕۆنا بویە هۆکاریگ ئەرا کەمەوبوین رێژەی دووانە ئۆکسید کاربۆن لە ناو هەوا لەجهان، وبونەی وسانن ئابووری وەشیوەیگ گەورا لە فرە له‌ وڵاتەیل، رێژەی دەرچین ئی گازە کەمەو کرد، جوور ئەوە ک لە وەخت قەیرانە دارایه‌گه‌ی جهان له‌ ساڵ ٢٠٠٨ ، ته‌نیا لە چین خەسی ئی گازە کەمەوبوی وەڕێژەی ٢٥%، وەگورەی سایت Carbon Brief ، وەلی پێشبینی كریه‌ید ک ئی کەمەوبوینە تا هاتنەوەی چالاکیە ئابووریەگان و ئەرا ماوەیگ دیاریه‌ .
لە وەختیگ ئایەمەیل لەناو ماڵەیل خوەیان کەرەنتینە کردن لە وەر کۆڕۆنا، ریەگە وازەوبوی ئەرا ئه‌وه‌ ك بەشیگ لە ئاژەڵ تا ئی جهانە بناسێد، وه‌خاتر کەمەوبوین جویلەی هاتوچو لە جادەیلە، یه‌ش رزگار ئاژەڵەیل بویچک کرد، ک لە خەو ساڵانەیان هەڵسیەێن، جوور ژوژوەگان، ك له‌ تلیان ژیر ماشینەیل رزگار بین، ودویر نیە ئیسە سۆنەگان پرسیارکەن ئایمەیل هانه‌ كوو؟ جوینکە کەمەوبوین کوتە نانەگان لە باخچەیلەگە ناچاریان کردگە خوەیان و مەلەوەرەیلیگ تر بچن‌ مینەی دان ئه‌را خوەیان بکەن.
چالاکوانەیل ژینگە پارێزی ئومێدوارن ک ڤاێڕۆس کۆڕۆنا بوودە هۆکاریگ ئەرا کەمەو کردن بازرگانی و ئاژەڵ دەیشتەیلە لە گشت جهان، چوینکە فرە لەو ئاژەڵەیلە هانە ژیر هەڕەشەی فەوتانن.
دویای چەن روژیگ لە وەجیهاوردن بڕیار ئیتالیا ئەرا بەسانن یەکجاری، هاتن و چوین، وینەیل جووی ئاوەگان لە شار بوندوقیە بڵاو بوی، ک ئەرا یەکەم جا ئاوەگە وە روشنی دیاردا، ئەویش وەهۆکار کەمەوبوین جویلەی گەشتەیل، دویای وسانن جویلەی بن ئاو ناو شارەگە، ک هیشت ئاژەڵە دەریایه‌گان وەئازادی مەلەبکەن.
گشت ئاڵشتبویەگان لەی ماوەی دویاییه‌ خاسنەوین، ک یەکیگ لە کارە خراوەگەی پەتاگە ، زیایبوین جیماگە پلاستیکیەگانه‌، هەر لە دەسکیش پزشکی تا قوتیەگان، ئەویش وەهۆی وەکارهاوردن خواردنەیل ئاماده‌ و خێراگانه‌ لەی وەختەیلە، تەنانەت قاوەخانەگان جوور مقەیەتییگ لە پەتاگە ، کوب پلاستیگ وەکار هاوردن.

Shafaq Live
Shafaq Live