گوچانيگ زيره‌ك ئه‌را نابينايه‌يل وه زووان كوردى
شه‌فه‌ق نيوز/ خوه‌ندكاره‌يل له‌ڕێ به‌هره‌مه‌نى و فكره‌يل زانستييانه‌و له هه‌رێم كوردستان عراق ئسپات ئه‌وه ئه‌كه‌ن ك ئه‌وان ئه‌تويه‌نن داهێنان بكه‌ن ئه‌گه‌ر ده‌رفه‌ت وه‌پيان بدريه‌ێد و پشتگيرى بكريه‌ن له‌لايه‌ن ده‌سڵاته‌يل په‌يوه‌نديدار له وڵاته‌گه، ك له‌ى ماوه‌ى دوياخريشه شماره‌يان زياى بويه وه گووره‌ى دويا ئاماره‌يل.
سه‌روه‌ر عزه‌ت خوه‌ندكار له دويا قوناغ له خوه‌نين ئاماده‌يى، ك تويش كه‌م ديده‌نى هاتگه وه ريژه‌ى 90 له‌سه‌د، هه‌ر له مناڵييه‌و خى داسه ئه‌لكترۆنيات تا دوياجار تويه‌نست گوچانيگ ئه‌لكترۆنى به‌رنامه‌دار وه زووان كوردى دروس بكا، ك ده‌سميه‌ت چه‌و كزه‌يل هاوشيوه‌ى و نابينايه‌يل بيه‌ێد له كوردستان رێ بكه‌ن وه‌بى ئه‌وه‌گ په‌نا وه كه‌سيگ تر بووه‌ن.
عزه‌ت ك گوچانيگ ها ده‌سيه‌وه‌و خوه‌ى دروسى كردگه ئه‌را سكاى نيوز عه‌ره‌بى، باس له چوينێتى نه‌فوه‌رگرتن له‌ى داهێنان نموونه‌يى كرد ك به‌رنامه‌داره‌و له‌تى ئامێريگ دانرياگه ئه‌را ئاگاداركردنه‌وه له هه‌ر لاشه‌ى غه‌ريبيگ له‌وه‌خت ريكردن.
سه‌ره‌وه‌ر وت: ئى گوچانه له‌ڕێ ئامێريگه‌و به‌رنامه‌داره‌و ئاگادار نابيناگه ئه‌كا له‌هه‌ر لاشه‌يگ له‌ڕێ ئشاره‌ت ده‌نگى بيجگه زانياريه‌يل تر جوور وه‌خت و تاريخ و پله‌ى گه‌رمى و چشته‌يل تر، باس له‌وه‌يش كرد تائيسه له دروسكردن 70 گوچان ئه‌لكترۆنى له‌ى جووره سه‌ركه‌فتگه.
خاوه‌ن به‌هره‌يل له كوردستان وه‌وه‌يشه‌و نه‌وسيان، به‌ڵكوو له شار " ته‌كيه " له ده‌ورگرد سلێمانى، سامان عه‌لى ك كابرايگه نابينا، تويه‌نست ئێزگه‌يگ ناوخوه‌يى له‌بان شه‌پۆل FM دروس بكا وه كه‌ره‌سه‌يل ئاسايى.
سامان عه‌لى ئويشێد: هه‌ر له مناڵييه‌و ئاشق ئيزگه بويه‌و هه‌ميشه هويرى له‌لاى راديۆ و ته‌له‌فزيۆن بويه، ك دوياجاريش سه‌ركه‌فتگه له دروسكردن ئێزگه‌يگ دوياى ئه‌زموونه‌يل فريه‌يگ له‌ى بواره.
سامان عه‌لى وت: ئامانج له دروسكردن ئى ئێزگه‌ى ناوخوه‌ييه وه‌خاتر ته‌وعيه‌و ئاگاداركردنه‌وه‌ى بڕيگ له هاوڕيه‌يليه له خاوه‌ن به‌هره‌يل ئه‌را ئاگاداركردنيان له‌باره‌ى كاره‌يليگ تايبه‌ت وه به‌هره‌يل و داهێنانه‌يليان.
هه‌ر له‌ى باوه‌تيشه‌و يه‌كێتى نابينايه‌يل له سلێمانى، له‌رێ كۆنگره‌و سيمناره‌يلێ هه‌وڵ قه‌ناعه‌تكردن وه ده‌سڵاته‌يل ئه‌ياد، وه‌ئه‌وه‌گ نابينايه‌يل له جايه‌ڵ جوانه‌يل توانايى ديرن ئه‌را داناينيان له پله‌ى پيشكه‌فتگ له ئداره‌ى هه‌رێم.
له‌و باوه‌تيشه‌و، هاوبه‌ش عه‌لى سه‌رۆك يه‌كێتى نابينايه‌يل له سلێمانى, وت: يه‌كێتيه‌گه سه‌دان خاوه‌ن باوه‌ڕنامه‌ى زانكۆيى و خاوه‌ن زانست و ئه‌قڵ داهێنه‌ر له‌خوه‌ى گرتگه.
هاوبه‌ش عه‌لى وت: ئيمه دڵنيايم له توانايى ئى خاوه‌ن به‌هره‌يله له‌بان ئه‌نجامداين ئه‌ركه‌يل ئدراى و سه‌ركردايه‌تيكردن كۆمه‌ڵگا له‌وه‌ختيگ ك ئه‌گه‌ر حكومه‌ت ده‌رفه‌ت وه‌پيان بيه‌ێد، به‌ڵكوو ئه‌تويه‌نن كاروبار كوردستان وه‌ره‌و خاستر بووه‌ن.
جى باسه، وه گووره‌ى ئاماره‌يل فه‌رمى، شماره‌ى نابينايه‌يل له سه‌رانسه‌ر هه‌رێم ره‌سيه‌سه زياتر له 50 هه‌زار كه‌س، ك شه‌ش هه‌زار له‌ليان كه‌فتنه‌سه پارێزگاى سلێمانى.
